Read Batak Karo IMAMAT 17 Bible Online

IMAMAT 17 - Batak Karo bible

IMAMAT 17

¹Iperentahken TUHAN man Musa

²gelah iberekenna man Harun ras anak-anakna bage pe man kerina bangsa Israel peraturen-peraturen si tersena i jenda.

³[3-4] Kalak Israel si nggeleh lembu, biri-biri, ntah kambing, jadi persembahen man TUHAN i ja gia, seakatan i lebe-lebe pintun Kemah Perjumpan e, enggo ilanggarna undang-undang. Ia enggo ngamburken dareh, e maka lanai ia ikira jadi bangsa Dibata.

⁵Perentah enda ertina e me, maka kalak Israel arus mpersembahken man TUHAN asuh-asuhen si biasana igelehna i mbalmbal. Genduari arus ibabana e man imam ku pintun Kemah Perjumpan, gelah igelehna jadi persembahen persadan.

⁶Imam arus ngamburken dareh e ku empatna dingding batar-batar persembahen i pintun Kemah e, ras bage pe nutung tabeh-tabehna gelah ndarat bau si merim iakap TUHAN.

⁷Bangsa Israel lanai banci enggeleh asuh-asuhenna i mbalmbal, jadi persembahen man begu kambing. Erkiteken perbahanen si bage tandana la erkemalangen man TUHAN kap. Arus maka iikutken bangsa Israel peraturen enda seh rasa lalap.

⁸Subuk bangsa Israel bage pe bangsa si deban si tading ras kalak enda, si mpersembahken persembahen tutungen ntah persembahen si debanna

⁹man TUHAN amin i japa pe seakatan i pintun Kemah Perjumpan, kalak si bage lanai ia ikira jadi bangsa Dibata.

¹⁰Subuk bangsa Israel, bage pe bangsa si deban si tading ras ia, ise si man daging si lit denga darehna, TUHAN jadi imbangna janah lanai ia ikira jadi bangsaNa. [20†]

¹¹Asa kai si nggeluh, kegeluhenna lit i bas darehna, janah e me sabapna maka iperentahken TUHAN maka kerina dareh iamburken ku das batar-batar guna ngalemi dosa-dosa bangsa e. Dareh erkiteken e me kegeluhen, nangtangi dosa kap. [21†]

¹²E me sabapna maka ikataken TUHAN man bangsa Israel, maka subuk ia bage pe bangsa si deban si tading ras ia, la banci man daging si lit denga darehna.

¹³Subuk bangsa Israel, bage pe bangsa si deban si tading ras ia, si ndat rubia-rubia ntah perik si la pantangen i bas perburun arus iamburkenna darehna janah itamburina alu taneh.

¹⁴Kerina si nggeluh kegeluhenna lit i bas darehna, janah e me sabapna maka ikataken TUHAN man bangsa Israel, maka la banci ipan bangsa e daging kai pe si lit denga darehna, janah kalak si manca lanai ia ikira jadi bangsaNa.

¹⁵Subuk kalak Israel bage pe kalak si deban si tading ras kalak enda, adi ipanna daging bangke rubia-rubia subuk si mate bana ntah si ibunuh rubia-rubia si meliar, arus maka icucina pakenna, jenari ridi tapi arus itimaina lebe ben maka ia enggo bersih rikutken aturen agama.

¹⁶Adi la bage ibahanna, la banci lang itanggungna akibatna.