Read Batak Karo IMAMAT 18 Bible Online

IMAMAT 18 - Batak Karo bible

IMAMAT 18

¹Ikataken TUHAN man Musa,

²gelah ipesehna man bangsa Israel bagenda, “Aku kap TUHAN Dibatandu.

³Ola ikut-ikut perbahanen bangsa Mesir, inganndu tading ndube, ntah pe perbahanen bangsa Kanaan, ku ja kam Kubaba genduari.

⁴Ikutken lah pedah-pedahKu, dalanken lah perentah-perentahKu. Aku kap TUHAN Dibatandu.

⁵Ikutken lah pedah-pedah ras perentah-perentah si Kubereken man bandu; adi bage perbahanndu, tentu selamat geluhndu. Aku kap TUHAN.” [22†]

⁶Ibereken TUHAN peraturen-peraturen enda: Ola kam ersada kula ras keluargandu.

⁷Ola ijurukenndu bapandu alu kam ersada kula ras nandendu. Ola ijurukenndu nandendu jine.

⁸Ola ijurukenndu bapandu alu kam ersada kula ras ndeharana si deban. [23†]

⁹Ola kam ersada kula ras turangndu ntah pe ras turangndu si ibaba nande ngudandu, subuk ia ipebelin sada rumah ras kam ntah lang. [24†]

¹⁰Ola kam ersada kula ras kempundu si diberu; sabap e njuruken dirindu jine.

¹¹Ola kam ersada kula ras turangndu sada bapa pedauh nande, sabap ia pe turangndu kap.

¹²[12-13] Ola kam ersada kula ras bibindu, subuk ia turang bapandu ntah senina nandendu. [25†]

¹⁴Ola kam ersada kula ras ndehara senina bapandu, sabap ia pe nandendu kap.

¹⁵Ola kam ersada kula ras ndehara anakndu [26†]

¹⁶ntah ras ndehara seninandu. [27†]

¹⁷Ola kam ersada kula ras anak ntah kempu diberu si enggo kam ersada kula ras; banci jadi lit hubungen darehna ras kam, janah si e perbahanen si la tengka. [28†]

¹⁸Ola iempoindu senina ndeharandu jadi tambah ndeharandu, adi ndeharandu e nggeluh denga.

¹⁹Ola kam ersada kula ras diberu si sangana nguda bulanna, sabap ia la bersih rikutken aturen agama. [29†]

²⁰Ola kam ersada kula ras diberu kalak, sabap e erbahanca kam la bersih. [30†]

²¹Ola sada pe endesken anak-anakndu guna ipersembahken man Dewa Molekh, sabap perbahanen si bage njuruken man gelar Dibata, TUHAN e. [31†]

²²Ola lit dilaki ersada kula ras dilaki; ciga ate Dibata si bage. [32†]

²³Ola lit dilaki ntah diberu ersada kula ras asuh-asuhen, sabap perbahanen si la tengka e seh kal melketna. [33†]

²⁴Ola ipemelketndu bandu alu perbahanen si la bersih enda, sabap bage me perbahanen kalak perbegu si erbahanca ia la bersih. Bage me kap perbahanen kalak perbegu si ngiani taneh si lit i lebe-lebendu, janah ia ipelawes TUHAN, gelah banci kam bengket.

²⁵Perbahanen kalak erbahanca maka taneh e la bersih, e maka iukum TUHAN taneh e, janah ibahanNa maka iutahken taneh e bangsa si tading i je.

²⁶[26-27] Ilakokenna kerina perbahanen si ciga ate e, e maka negeri e lanai bersih. Tapi kam la banci bage. Kerina kam, subuk kalak Israel, ntah pe kalak asing, arus make undang-undang ras perentah TUHAN.

²⁸Alu bage maka la kam iutahken taneh e bagi iutahkenna kalak perbegu si ngianisa ope denga kam.

²⁹Ietehndu maka ise si ngelakoken apai gia perbahanen si ciga ate, lanai ia ikira jadi bangsa Dibata.

³⁰E maka nina TUHAN, “Patuh lah man perentah-perentahKu, ola usih perbahanen kalak si tading i negeri e ope denga kam. Ola ipemelketndu bandu alu ngelakoken perbahanen-perbahanen enda ndai: Aku kap TUHAN Dibatandu.”