Read Batak Karo IMAMAT 19 Bible Online

IMAMAT 19 - Batak Karo bible

IMAMAT 19

¹Ikataken TUHAN man Musa,

²gelah ipesehna man perpulungen kalak Israel bagenda, “Badia lah kam, erkiteken Aku, TUHAN Dibatandu badia kap. [34†]

³Kerina kam arus mehamat man nande ras bapandu, janah arus nginget wari Sabat, bagi si enggo Kuperentahken. Aku kap TUHAN Dibatandu. [35†]

⁴Ola tundalken Aku, jenari erkusur nembah dibata-dibata si deban; ola bahan dibata-dibata si deban i bas logam nari. Aku kap TUHAN Dibatandu. [36†]

⁵Adi igelehndu asuh-asuhen man persembahen persadan, ikutken lah peraturen-peraturen si enggo Kubereken man bandu; e maka Kualoken persembahen e.

⁶Dagingna arus maka ipan i bas wari sanga asuh-asuhen e igeleh, ntah pe pepagina. Adi lit denga iba i bas wari peteluken arus maka itutung,

⁷sabap daging si bage pantangen. Janah adi lit kalak si manca, la Kualoken persembahen e:

⁸Si manca ersalah ia, erkiteken ipeserina pangan biasa ras persembahen si khusus man TUHAN, e maka lanai ia ikira jadi bangsangKu.

⁹Adi iperanindu jumandu, ola perani seh ku duru, janah ola nai ulihi perani ruhi page si tading-tading. [37†]

¹⁰Ola nai ulihi niar-niar peken anggurndu guna pepulung anggur si tading ntah pe mumahi si enggo naktaken; tadingken e man kalak si musil ras man kalak si tandang. Aku kap TUHAN Dibatandu.

¹¹Ola nangko, ntah nipu, ntah erbual. [38†]

¹²Ola kam erpadan i bas gelarKu adi labo atendu itepatindu padanndu e; perbahanen si bage njuruken gelarKu kap. Aku kap TUHAN Dibatandu. [39†]

¹³Ola kam cari kesempaten i bas ise pe, ntah ngerampuk ia. Ola tahan gaji kalak si erdahin ras kam, sada berngi pe ola. [40†]

¹⁴Ola sumpahi kalak pasek, ola amparken kai pe i lebe-lebe kalak pentang erbanca ia tertuktuk. Mbiarlah man bangKu. Aku kap TUHAN Dibatandu. [41†]

¹⁵Bujur ras adillah pemutusenndu adi kam ngadili perkara kalak; ola kapiti kalak musil, ola mbiar man kalak bayak. [42†]

¹⁶Ola pebelang si la tuhu kerna ise pe; janah adi lit kalak si sangana iadili rutang kesah, ngerana lah adi kesaksinndu e banci nampati ia. Aku kap TUHAN.

¹⁷Ola buniken elem-elem i bas ukurndu man ise pe tapi tangkas ukur tangkas kata lah ndungi perjengilenndu ras ia, gelah ola kam erdosa erkiteken ia. [43†]

¹⁸Ola kam erbalas man ise pe, ntah pe tetap rate segat man bana, tapi kelengilah temanndu manusia, bali ras kam ngkelengi dirindu jine. Aku kap TUHAN. [44†]

¹⁹Patuhlah man perentah-perentahKu. Ola kawinkenndu asuh-asuhen si la sebangsa. Ola suan dua macam benih i bas sada juma. Ola pake paken adi dua macam kainna. [45†]

²⁰Adi lit kalak si enggo erpadan ndayaken budakna diberu man kalak si deban gelah jadi ndeharana, tapi langa igalarina tukur budak e, jenari adi ersada kula empu budak e ras budak diberu e, la banci ia iukum mate, tapi duana ia iukum, sabap diberu e budakna denga kap.

²¹Ibaba dilaki e lah sada biri-biri bajarna ku pintun Kemah Perjumpan ku adep-adepenKu jadi persembahen penebusna.

²²Gelah alu e imam ngelakoken lakon pembersihen guna ngalemi dosa kalak ndai, e maka ialemi Dibata ia.

²³Adi enggo kam seh kerina i taneh Kanaan, jenari nuan batang kayu si erbuah, ntah batang kai gia e, pantangken lah buahna i bas telu tahun si pemena. I bas si telu tahun e la banci ipanndu buahna.

²⁴Peempat tahunken, kerina buahna, endeskenlah jadi persembahen pengataken bujurndu man bangKu, TUHANndu.

²⁵Tapi i bas tahun pelimaken, banci ipanndu buahna. Adi kerina si enda ilakokenndu la banci lang reh lalana buah batang kayundu. Aku kap TUHAN Dibatandu.

²⁶Ola pan daging si lit denga darehna. Ola kam ertendung ntah pe erbahan kinigurun. [46†]

²⁷Ola keret buk sekelewet takalndu, bage pe ola keret ujung janggutndu. [47†]

²⁸Ola bahan gambar-gambar i bas dagingndu alu ncucukisa, bage pe ola lukai badanndu erkiteken lit si mate-matendu. Aku kap TUHAN.

²⁹Ola njuruken anakndu si diberu alu mahan ia jadi diberu perdenggal i bas rumah persembahen kalak perbegu; adi bage perbahanenndu, nandangi nilah me kam ku dibata-dibata si deban, janah negeri e nandangi dem alu lagu langkah si nggesuh. [48†]

³⁰Inget wari Sabat, dingen pehaga lah inganKu isembah. Aku kap TUHAN. [49†]

³¹Ola ngguru man guru si baso. Adi bage perbahanndu, lanai kam bersih rikutken aturen agama. Aku kap TUHAN Dibatandu. [50†]

³²Mehamat lah man kalak si enggo metua, janah pehaga lah Aku. Aku kap TUHAN.

³³Ola tokohi bangsa si deban si tading i bas negerindu. [51†]

³⁴Bahanlah man bana bali ras man bangsandu jine, janah kelengilah ia bagi ikelengindu dirindu jine. Inget maka kam pe pernah kesilang i negeri Mesir. Aku kap TUHAN Dibatandu.

³⁵Ola tipu kalak alu mpergunaken sibar-sibar, timbangen, ntah sukat-sukat si la payo. [52†]

³⁶Pake lah sibar-sibar, ntah timbangen, ntah sukat-sukat si bujur. Aku kap TUHAN Dibatandu, si enggo maba kam i taneh Mesir nari.

³⁷Patuhilah kerina undang-undang ras perentah-perentahKu. Aku kap TUHAN.”