Read Batak Karo IMAMAT 20 Bible Online

IMAMAT 20 - Batak Karo bible

IMAMAT 20

¹Ikataken TUHAN man Musa

²gelah ipesehna man bangsa Israel bagenda, “Ise si mereken anakna guna ipake i bas nembah man Dibata-dibata Molekh, ise kam ntah bangsa si deban si tading ras kam, la banci la ibenteri ia alu batu ngayak mate.

³Ise mereken anakna man Molekh, erbanca KemahKu si badia melket ras njuruken gelarKu si badia, erkusur Aku jadi imbangna, janah lanai ia ikira jadi bangsangKu.

⁴Tapi adi la iperdiateken perpulungen kai si enggo ibahanna e, janah la ia ibunuhna,

⁵Aku jine erkusur ngelawan ia ras kerina keluargana bage pe kerina kalak si ersada ukur ras ia. Ia lanai setia man bangKu dingen nembah man Molekh, jadi lanai ia Kukira bangsangKu.

⁶Ise ngguru man guru si baso, jadi imbangKu ia, janah lanai ia Kukira bangsangKu.

⁷Jagalah maka kam tetap badia, sabap Aku kap TUHAN Dibatandu.

⁸Patuh lah man undang-undangKu, erkiteken Aku kap TUHAN si erbanca kam badia.”

⁹Ibereken TUHAN tole peraturen-peraturen enda, “Ise numpahi bapana ntah nandena, arus ibunuh; ia jine nanggung salahna erkiteken kematenna e. [53†]

¹⁰Ise erlua-lua ras ndehara temanna kalak Israel si deban, si dilaki ras si diberu arus iukum mate duana. [54†]

¹¹Sekalak dilaki si erlua-lua ras sekalak i bas diberu bapana, ia njuruken bapana, e maka ia arus ibunuh ras diberu temanna erlua-lua ndai. Duana ia nanggung kesalahen kerna kematenna e. [55†]

¹²Ise si erlua-lua ras ndehara anakna, duana ia arus ibunuh, erkiteken perbahanenna e la tengka e maka ia nanggung kesalahen kerna kematenna e. [56†]

¹³Adi sekalak dilaki ersada kula ras dilaki duana ia enggo ngelakoken perbahanen si mbau si ciga ate, e maka arus ibunuh duana. Duana ia nanggung kesalahen kerna kematenna e. [57†]

¹⁴Adi lit kalak ngempoi sekalak diberu janah nande diberu e pe iempoina ka, arus maka teluna ia itutung ngayak mate, erkiteken perbahanenna si njuruken e. Perbahanen si bage ola pediat jadi i tengah-tengahndu. [58†]

¹⁵Adi kalak ersada kula ras asuh-asuhen arus maka ia ibunuh ras asuh-asuhen e. [59†]

¹⁶Adi sekalak diberu icubakenna ersada kula ras asuh-asuhen, arus maka ia ibunuh ras asuh-asuhen ndai. Ia nanggungsa kesalahenna kerna kematenna e.

¹⁷Ise ngempoi turangna subuk turangna pedauh bapa ntah pedauh nande, iuru-urulah ia, jenari ipelawes i bas perpulungen bangsa Israel nari. Ia enggo ersada kula ras turangna jine, e maka arus ia nanggung kiniseran bekas perbahanenna e. [60†]

¹⁸Adi lit kalak ersada kula ras diberu si sanga nguda bulanna, arus maka duana ipelawes i bas perpulungen bangsa Israel nari, erkiteken ilanggarna peraturen-peraturen kerna kebadian. [61†]

¹⁹Adi lit kalak ersada kula ras bibina, arus maka itanggungna kiniseran bekas perbahanenna si la tengka e. [62†]

²⁰Ise ersada kula ras ndehara senina bapana, ijurukenna kap senina bapana e, e maka ia ras diberu e arus nebus kesalahenna; apai pe ia duana la nadingken anak adi ia mate.

²¹Ise ngempoi diberu seninana, mate ia alu la nadingken anak pupusna. Ia enggo ngelakoken perbahanen si la bersih rikutken aturen agama janah ijurukenna seninana.” [63†]

²²Nina TUHAN, “Pakelah kerina undang-undang ras perentah-perentahKu gelah ola kam iutahken negeri Kanaan, kuja kam sangana Kubaba.

²³Ola kam nggeluh rikutken adat kalak si nggeluh i je; Kupelawes bangsa perbegu e gelah banci kam bengket ku negeri e, erkiteken ciga ateKu ngidah pengelakona si jahat e.

²⁴Tapi enggo Aku erpadan mereken negeri si mehumur e jadi sikerajangenndu, e maka Kubereken man bandu. Aku kap TUHAN Dibatandu, janah enggo Kuserapken kam i bas bangsa-bangsa si deban nari.

²⁵E maka arus tangkas ietehndu apai asuh-asuhen ras perik-perik si la pantangen ras pantangen. Ola pan asuh-asuhen ntah perik-perik si pantangen. Enggo Kukataken si e pantangen, e maka adi ipanndu, erbanca kam la bersih.

²⁶Badia lah kam alu nggeluh khusus man bangKu saja, sabap Aku, TUHANndu, badia kap. Enggo Kupeserap kam i bas bangsa-bangsa si deban nari, gelah kam sikerajangenKu saja ngenca.

²⁷Adi sekalak dilaki ntah diberu jadi guru pertendung e me nungkun man begu kalak si enggo mate, arus ibenteri alu batu ngayak mate; ise si ngelakoken si bage arus nanggung kesalahenna kerna kematenna.”