Read Batak Karo IMAMAT 21 Bible Online

IMAMAT 21 - Batak Karo bible

IMAMAT 21

¹Iperentahken TUHAN man Musa gelah ikatakenna man imam-imam kesusuren Harun, “Sekalak imam la banci ibahanna bana jadi la bersih alu ngikutken upacara penguburen keluargana,

²pala si mate e nandena, bapana, anakna si dilaki ntah si diberu, seninana,

³ntah turangna si langa erjabu si ringan ras ia.

⁴Ola ibahanna bana la bersih erkiteken kematen kalak si jadi keluargana arah perjabun.

⁵Imam la banci ncukur buk takalna ntah nggunting ujung janggutna, ntah ngelukai badanna tanda ate ceda. [64†]

⁶Arus maka ia badia, la banci ijurukenna gelarKu. Ia mpersembahken persembahen pangan man bangKu, e maka arus ia badia.

⁷Sekalak imam la banci ngempoi diberu si gelgel nari pendahinna erlua-lua ntah diberu si lanai singuda-nguda, ntah diberu si enggo mulih i bas perbulangenna nari. Imam badia kap.

⁸Sekalak imam arus maka badia iakap jelma si nterem, erkiteken ia mpersembahken persembahen pangan man bangKu. Aku kap TUHAN. Aku badia, aku pe erbanca maka bangsangKu badia.

⁹Adi anak imam pendahinna erlua-lua, anak ndai njuruken bapana; e maka arus ia itutung ngayak mate.

¹⁰Imam si Mbelin si enggo itangkuhken alu ncurcurken minak ku takalna dingen makeken paken imam man bana, e maka la banci la sikap isurina bukna, dingen la banci icaingkenna uisna guna encidahken maka i sangana rate ceda.

¹¹[11-12] Ia enggo iendesken man bangKu, e maka la banci la bersih ibahanna man bana. Bage pe la banci itadingkenna KemahKu, jenari bengket ku rumah i ja lit kalak mate, amin pe si mate e bapana ntah nandena, sabap perbahanen si bage ncemarken kebadian KemahKu.

¹³Iempoina lah sekalak singuda-nguda si langa keliamen.

¹⁴La banci iempoina diberu si enggo mbalu, ntah diberu si enggo mulih i bas perbulangenna nari ntah pe diberu si gelgel nari pendahinna erlua-lua. Singuda-nguda si sada suku ras ia ngenca banci iempoina.

¹⁵Adi lang, anak-anakna, si arusna kin badia, jadi kalak si la bersih. Aku kap TUHAN, janah enggo Kuserapken ia jadi Imam si Mbelin.”

¹⁶Iperentahken TUHAN man Musa

¹⁷gelah ikatakenna man Harun, bagenda, “Anakndu si cacat la banci mpersembahken persembahen pangan man bangKu. Peraturen enda arus ipake seh rasa lalap.

¹⁸Kalak cacat la banci ngelakoken dahin persembahen, e me: kalak pentang, kalak cempang, cacat ayona ntah badanna,

¹⁹kalak si mate tanna ntah nahena,

²⁰kalak mbengkung, kalak kertang kertut, kalak si lit penakit matana ntah penakit kulitna, ntah pe kalak si enggo ikebiri.

²¹Kasa kai kesusuren Imam Harun si lit cacat badanna, la banci mpersembahken persembahen pangan man bangKu.

²²Tapi kalak si bage banci ipanna pangan si enggo ipersembahken man bangKu, subuk persembahen pangan si badia ntah pe persembahen pangan si seh kal badiana.

²³Tapi erkiteken cacatna, la banci ideherina kire-kire si badia e; la banci pe ideherina batar-batar persembahen. La banci iliamina kebadian barang-barang si badia e, sabap Aku kap TUHAN, janah enggo Kupebadiaken ingan e.”

²⁴Enda me si ikataken Musa man Harun ras man anakna ras man kerina bangsa Israel.