Read Batak Karo IMAMAT 22 Bible Online

IMAMAT 22 - Batak Karo bible

IMAMAT 22

¹Iperentahken TUHAN man Musa

²gelah ikatakenna man Harun ras man anak-anakna, “Ola ipeterukndu gelarKu si badia; e maka mehamat lah perbahanndu nandangi persembahen si badia si ipersembahken bangsa Israel man bangKu. Aku kap TUHAN.

³Ise kesusurenndu si ndeheri persembahen si badia si iendesken bangsa Israel man bangKu, tapi ia sangana la bersih, la nari banci ia ndigan pe ndahiken dahin batar-batar persembahen. Si enda arus iikutken seh rasa lalap. Aku kap TUHAN.

⁴Ise i bas kesusuren Harun nari sakit kulit banci langket ntah pe lit nehtehen i bas kulana nari, la banci ipanna kai pe i bas persembahen e nari, adi langa ia malem. Sekalak imam la bersih adi ikuitna kalak mate ntah ndarat air manina,

⁵ntah terdegessa rubia-rubia pantangen ntah pe kalak si la bersih.

⁶Imam si la bersih, ia la bersih ngayak ben. Janah kenca e pe la banci ipanna persembahen si badia si apai pe seh ia enggo ridi.

⁷Kenca matawari enggo sundut e maka ia enggo bersih ka. Kenca bage enggo banci ipanna persembahen si badia e, perbahan e me kap panganna.

⁸La ia banci man daging asuh-asuhen si mate bana, ntah ibunuh asuh-asuhen si meliar. E erbanca ia lanai badia. Aku kap TUHAN.

⁹Kerina imam arus ngikuti peraturen-peraturen si enggo Kubereken. Adi lang, ersalah ia, janah e erbanca ia mate, erkiteken ilanggarna peraturen si badia. Aku kap TUHAN si enggo pebadiaken ia.

¹⁰Anggota keluarga imam ngenca si banci man kerina persembahen si badia e. Kalak si deban sada pe la banci manca, amin pe ras imam e ia tading, ntah pe si erdahinna.

¹¹Tapi budak imam si itukurna alu duitna jine, ntah si tubuh i bas rumahna, banci ipanna pangan si ialoken imam e.

¹²Anak imam si sereh man dilaki si la imam, la banci apai pe ipanna persembahen si badia e.

¹³Tapi anak diberu si enggo mbalu, ntah isirangken dilakina janah la lit anakna, adi enggo ia mulihi tading ras bapana janah jadi tanggungenna, banci ipanna pangan si ialoken bapana erkiteken keimamenna. Anggota-anggota keluarga imam e ngenca banci man pangan e.

¹⁴Adi lit kalak la keluarga imam man persembahen e alu la sengaja, arus maka igalarina man imam e asa erga si ipanna e, tambah seperlimana.

¹⁵La banci iliami imam-imam persembahen si badia e

¹⁶alu mereken persembahen e ipan kalak si la patut manca.”

¹⁷Iperentahken TUHAN man Musa

¹⁸gelah ikatakenna man Harun ras anak-anakna bage pe man kerina bangsa Israel peraturen-peraturen enda, e me: Adi lit kalak Israel ntah kalak si deban si tading ras ia i negeri Israel, mpersembahken persembahen tutungen, subuk persembahen guna nehken padan, ntah pe persembahen arah ukur ersuruh, asuh-asuhen si ipersembahken e arus maka la lit sitik pe man pandangen.

¹⁹Maka persembahen ndai ialoken TUHAN, arus maka persembahen ndai ola beruna janah sitik pe ola lit man pandangen.

²⁰Adi asuh-asuhen si cacat ipersembahkenndu, la ialoken TUHAN. [65†]

²¹Adi lit kalak mpersembahken persembahen persadan man TUHAN, subuk persembahen guna nehken padan, ntah pe persembahen erkiteken ukur ersuruh, adi ialoken TUHAN atena persembahen e, asuh-asuhen e arus maka la lit sitik pe man pandangen.

²²Ola kal persembahken man TUHAN asuh-asuhen si pentang, ntah pengkar, ntah lanai je deba ring-ringna, ntah benjol-benjol kulitna, ntah ugahen, ntah pe darangen. Ola persembahken asuh-asuhen si bage jadi persembahen pangan i das batar-batar.

²³Banci ipersembahkenndu asuh-asuhen si kertang kertut, ntah si la mejile potongenna jadi persembahen erkiteken ukur ersuruh, tapi adi jadi persembahen guna nehken padan, e la banci.

²⁴Ola persembahken man TUHAN asuh-asuhen si enggo iburihi. Si e la banci ipediat jadi i bas tanehndu e.

²⁵Ola persembahken jadi persembahen pangan asuh-asuhen si ibereken bangsa si deban. Asuh-asuhen si bage ianggap cacat, janah la ialoken.

²⁶ [26-27] Adi ermurik lembu, ntah biri-biri, ntah kambing, la banci isirangken anakna e ras indungna pitu wari; tapi kenca e banci ialoken jadi persembahen pangan.

²⁸Ola persembahken i bas sada wari, lembu ras anakna, biri-biri ras anakna, kambing ras anakna.

²⁹Adi ipersembahkenndu persembahen pengataken bujur man TUHAN, ikutken lah aturenna, maka kam ialoken;

³⁰panlah persembahen e i bas wari e ka, ola tadingken sitik pe ngayak pagi.

³¹Nina TUHAN, “Patuhi lah perentahKu. Aku kap TUHAN.

³²Ola juruken gelarKu si badia. Arus maka iakui bangsa Israel kerina maka Aku badia. Aku kap TUHAN si erbanca badia;

³³Aku kap si maba kam ndarat i Mesir nari gelah Aku jadi Dibatandu. Aku kap TUHAN.”