Read Batak Karo IMAMAT 23 Bible Online

IMAMAT 23 - Batak Karo bible

IMAMAT 23

¹Ibereken TUHAN man Musa

²aturen-aturen wari raya agama, si arus irayaken bangsa Israel tupung bangsa e pulung ersembah man TUHAN. Nina Musa,

³“Enem wari arus kam erdahin, tapi arus iingetndu maka wari si pepituken, e me wari pekesahken, wari Sabat. I bas wari e ola kam erdahin, tapi pulunglah kam lako ersembah man TUHAN. Wari Sabat e TUHAN empuna, aminna i japa pe kam tading. [66†]

⁴Momokenlah wari raya si tersena enda i bas paksa-paksa si enggo itentuken.”

⁵“Wari Paskah irayaken guna pehaga TUHAN. Wari raya e ibenaken tupung wari enggo mulai gelap tep-tep wari sepuluh empat i bas bulan si pemena. [67†]

⁶I bas wari sepuluh lima ibenaken ka Wari Raya Roti si La Itama Ragi. Pitu wari dekahna la banci ipanndu roti si itama ragi. [68†]

⁷I bas wari si pemena arus kam pulung lako ersembah man TUHAN, janah la banci idahindu dahinndu.

⁸Bahan persembahen pangan man TUHAN pitu wari dekahna. I bas wari si pepituken arus ka kam pulung guna ersembah man TUHAN, janah la banci idahindu dahinndu.

⁹ [9-10] Kenca kam seh i bas negeri si ibereken TUHAN man bandu, janah kenca iperanindu gandumndu, berekenlah pungo si pemena man imam.

¹¹Imam mpersembahken pungo e jadi sada persembahen man TUHAN, maka ngena ate TUHAN man bandu. Imam nehken persembahen e sada wari kenca lepas wari Sabat.

¹²Tupung ipersembahkenndu gandum e, persembahken ka pe i bas wari e sada anak biri-biri umur sada tahun jadi persembahen tutungen. Anak biri-biri e la banci lit sitik pe man pandangen.

¹³Radu ras si e arus ka pe ipersembahkenndu dua kilo tepung si icampur ras minak saitun, jadi persembahen pangan. Persembahen enda merim iakap TUHAN. Tambah si e arus ka pe ipersembahkenndu sada liter lau anggur.

¹⁴Ola pan gandum si mbaru e, subuk matah, isauk, ntah ijadiken cimpa, adi langa iberekenndu persembahen-persembahen enda ndai man Dibata. Peraturen enda arus ipatuhi sinursurndu seh rasa lalap.”

¹⁵“Beligai pitu minggu kenca ipersembahkenndu pungo gandum si pemena ndai. [69†]

¹⁶Dage i bas wari si pelima puluhken, e me sada wari kenca lepas wari Sabat si pepituken, bahan ka persembahen gandum si mbaru man TUHAN.

¹⁷Tep-tep keluarga arus maba dua ngkibul roti jadi persembahen si iendesken man TUHAN. Tep-tep ngkibul roti tepungna dua kilo, tama ragina, jenari itasakken, janah persembahken man TUHAN selaku persembahen ulih peranin si pemena.

¹⁸Tambah-tambah roti ndai, kerina anak kuta arus mpersembahken pitu anak biri-biri umur sada tahun, sada jenggi lembu, dua kambing. Kerina si enda la banci lit sitik pe si man pandangen, janah ipersembahken man TUHAN jadi persembahen tutungen, rikut ras persembahen buah gandum ras lau anggur. Kerina persembahen enda merim iakap TUHAN.

¹⁹Tambah si e persembahken ka pe sada bajar kambing jadi persembahen pengalemi dosa, janah dua anak biri-biri umur sada tahun jadi persembahen persadan.

²⁰Sekalak imam mpersembahken roti ras anak biri-biri si dua e jadi persembahen man TUHAN guna imam-imam. Persembahen enda tuhu-tuhu badia.

²¹I bas wari e la banci idahindu dahinndu, tapi kam arus pulung guna ersembah man TUHAN. Kerina kesusurenndu arus ngikutken peraturen enda seh rasa lalap, subuk i ja pe ia tading.

²²Adi iperanindu jumandu, ola perani si arah duru, janah gandum si tading denga olanai ulihi ranisa. Tadingken si e kerina man kalak si musil-musil bage pe man kalak pertandang. TUHAN kap Dibata si arus isembahndu.” [70†]

²³ [23-24] “Wari si pemena i bas bulan si pepituken, arus irayakenndu selaku wari pekesahken. I bas wari e kam arus pulung guna ersembah man TUHAN kenca erkata sora terompet.

²⁵Persembahkenlah pangan man TUHAN, janah ola dahi dahinndu i bas wari e.”

²⁶ [26-27] “Tep-tep tahun i bas wari sepuluh bulan sepuluh sada, e me wari pengalemi dosa man jelma si nterem. I bas wari e kai pe la banci ipan. Pulung dingen ersembahlah man TUHAN, janah persembahkenlah pangan man baNa. [71†]

²⁸Ola erdahin i bas wari e, sabap i bas wari e kap ilakoken lakon pengalemi dosa man jelma si nterem.

²⁹Ise man i bas wari e, ia lanai ikira i bas bangsa Dibata.

³⁰Ise si erdahin i bas wari e, TUHAN jine kap si munuh ia.

³¹Kerina kesusurenndu arus patuh man peraturen enda aminna ijapa pe ia tading.

³²Kenca matawari sundut i bas wari siwah seh ngayak matawari sundut ka i bas wari sepuluh, kerina kalak arus ngadi erdahin, janah kidekah si e, kai pe la banci ipan.”

³³ [33-34] “Wari Raya Sapo-sapo mulai i bas wari sepuluh lima bulan pitu; dekahna pitu wari. [72†]

³⁵I bas wari si pemena i bas wari raya e, kerina arus pulung lako ersembah man TUHAN, janah la banci erdahin.

³⁶Pitu wari dekahna arus tep-tep ipersembahkenndu pangan man TUHAN. I bas wari si pewaluhken arus ka kam pulung guna ersembah man TUHAN janah mpersembahken persembahen pangan. Wari e, e me wari perpulungen guna ersembah, janah la banci kam erdahin. (

³⁷Enda me wari-wari raya agama. Tupung wari-wari raya e ipehagandu TUHAN alu pulung ras-ras dingen mpersembahken persembahen pangan, persembahen tutungen, buah gandum, persembahen gelehen, bage pe lau anggur, sue ras si iperluken tep-tep wari.

³⁸Wari-wari raya enda irayaken tambah-tambah wari Sabat. Persembahen-persembahenndu tupung wari raya e pe labo ikira selaku persembahen si biasa iberekenndu, umpamana persembahen erkiteken padan si enggo ipadankenndu, bage pe persembahen erkiteken ersuruh ukurndu nehkenca man TUHAN.)

³⁹Kenca enggo iperanindu jumandu, rayakenlah wari Raya Sapo-sapo e, mulai i bas wari sepuluh lima bulan pitu. Wari si pemena e me wari si ipergunaken lako pekesahken saja. [73†]

⁴⁰I bas wari e buatlah buah pangan i bas batang kayundu nari, keretlah lambe bage pe dahan-dahan kayu si melala bulungna, jenari rayakenlah wari raya e guna pehaga TUHAN Dibatandu.

⁴¹Wari raya e pitu wari dekahna. Kerina kesusurenndu arus patuh man peraturen enda seh rasa lalap.

⁴²Kerina kalak Israel arus tading i bas sapo-sapo pitu wari dekahna.

⁴³Alu bage ieteh kesusurenndu me denggo maka tupung nini-ninina itaruhken TUHAN ndarat i Mesir nari, nini-ninina e ibahan TUHAN tading i bas sapo-sapo si labo mejile. Ia me kap TUHAN Dibatandu.”

⁴⁴Bagenda me Musa mereken peraturen-peraturen wari-wari raya agama man bangsa Israel gelah arah e TUHAN ipehaga.