Read Batak Karo IMAMAT 26 Bible Online

IMAMAT 26 - Batak Karo bible

IMAMAT 26

¹Nina TUHAN, “Ola bahan berhala, ntah gana-gana ntah tugu, ntah batu si igambar jadi sembah sembahenndu. Aku kap TUHAN Dibatandu. [83†]

²Inget wari-wari raya agama, mehamat lah man inganndu ersembah man bangKu. Aku kap TUHAN.

³Adi nggeluh kam rikutken undang-undangKu janah patuh man perentahKu, [84†]

⁴Aku mereken udan i bas paksana gelah banci mbuah sinuan-sinuanndu, meramis buah kayundu.

⁵Perban bage buena ulih sinuan-sinuanndu, seh maka rani denga pe kam enggo ka seh paksa mutiki anggur. Mutiki anggur denga pe kam, enggo ka seh paksa merdang. Datndu kasa kai atendu ipanndu. Kam pe nggeluh alu mejuah-juah i negerindu.

⁶Dame Kubereken man bandu i bas negerindu. Entabeh pertunduhndu, perban la lit ise si man kebiarenndu. Kulesapken kasa rubia-rubia si merawa i taneh e. Perang pe lanai pagi lit i je.

⁷Menang kam ngelawan musuhndu.

⁸Lima kalak kam ngasup naluken seratus kalak, seratus naluken sepuluh ribu kalak, janah kerina musuhndu mate ipan pedangndu.

⁹Kupasu-pasu kam maka kam ertuah. Kusehken perpadanen si enggo Kupadanken man bandu.

¹⁰Ulih sinuan-sinuan melala tuhu-tuhu, seh maka la terkeriken setahun. E maka arus iambengkenndu si la keri i bas peranin si enggo ndekah maka siat ulih peranin si mbaru.

¹¹Aku nggeluh ras kam i tengah-tengahndu i bas kemahKu si badia, janah la Kutadingken kam.

¹²Aku nemani kam; Aku jadi Dibatandu, kam jadi bangsangKu. [85†]

¹³Aku TUHAN Dibatandu, si maba kam ndarat i taneh Mesir nari maka kam lanai jadi budak. Kupenggelken pasangen si nindih kam, maka banci tedis perdalanndu.”

¹⁴Nina TUHAN, “Adi la kam patuh man perentahKu, Kuukum.

¹⁵Adi la kam nggit ngikutken undang-undangKu ras perentahKu, janah ilanggarndu perpadanen si Kubahan ras kam,

¹⁶Kuukum kam. Kubahan maka cilaka kam alu mereken penakit si la terpepalem ras penakit panas si erbanca kam pentang dingen sia-sia kegeluhenndu. Ierdangkenndu benihndu, tapi labo erguna man bandu, sabap italuken musuhndu nge kam, janah ipanna kai si enggo isuanndu.

¹⁷Erkusur Aku ngelawan kam, gelah kam italuken musuh. Kam ijajah kalak si rate nembeh man bandu. Erkiteken seh kal biarndu, kiam naring kam, amin pe la lit si ngayakisa.

¹⁸Adi kenca bage pe lalap kang la kam patuh, e maka Kulipat gandaken ukumen e pitu kali asa si ndai.

¹⁹Kulesapken kuasa si imegahkenndu; udan lanai reh, tanehndu pe kerah piher bali ras besi.

²⁰Sia-sia kerina dahin si idahikenndu alu ngkeris panas, erkiteken tanehndu la mereken ulih, batang kayu pe la erbuah.

²¹Adi lalap ilawanndu Aku, dingen la kam nggit erkemalangen man bangKu, Kutambahi ka ukumenndu pitu kali lipat nari.

²²Kusuruh rubia-rubia si merawa reh ku tengah-tengahndu munuhi anak-anakndu, ngkernepken asuh-asuhenndu, seh maka sitik nari ngenca kam tading, erbanca pasar-pasarndu pe enggo melungun.

²³Adi kenca ukumen si e pe la ibegikenndu Aku, tapi tetap isungsangndu Aku,

²⁴e maka Aku pe erkusur ka ngelawan kam. Kutambahi ka ukumenndu seran pitu kali asa si nggona,

²⁵Kubahan perang ngukum kam perban ilanggarndu perpadanenta. Adi pulung kam i kutandu, Kubereken penakit si la terpepalem, maka terpaksa kam ngendesken bana man musuh-musuhndu.

²⁶Kukurangi persedian nakanndu, seh maka sepuluh diberu sada saja ngenca iperlukenna ingan nasakken kerina roti si lit i bas ia. E me ibagi-bagikenna, janah enggo pe keri ipanndu tetap denggo kam melihe.

²⁷Adi bage pe tetap denga iperimbangndu Aku, dingen la nggit erkemalangen man bangKu,

²⁸e maka erkiteken nembehna ateKu, erkusur Aku ngelawan kam janah Kutambahi ka ukumenndu pitu kali suin asa si nggona.

²⁹Erkiteken lihena ipanndu anakndu.

³⁰Kukernepken inganndu ersembah si i das uruk-uruk, Kuruntuhken batar-batar inganndu nutung kumenen, Kuambekken mait-maitndu ku sembah-sembahenndu si enggo mbulak. Aku dem ciga ate,

³¹Kukernepken kuta ras inganndu ersembah, janah la Aku nggit ngaloken persembahenndu.

³²Kukernepken tuhu-tuhu tanehndu, seh maka musuh si ngianisa pe sengget ngidah kecedan e.

³³Kubahan perang dingen Kukerapken kam ku negeri kalak si deban. Kernep kerina kutandu, janah tanehndu jadi melungen.

³⁴ [34-35] Ertahun-tahun dekahna tanehndu ndatken sabatna sedang kam jine la iberendu taneh e sabat. Sanga kam ibuang ku negeri musuh, taneh e itadingken dingen ndatken sabatna.

³⁶Kam si ibuang ku negeri kalak si deban. Kubahan maka dem kam alu kebiaren, seh maka sora bulung-bulung iembus angin saja pe ibegindu, kiam kam. Kiam kam tempa-tempa iayak-ayak musuh i bas perang, e maka guling kam, amin pe la lit musuh si ngayakisa.

³⁷Siantuken kam sapih-sapih kam amin ise pe labo lit si ngayaki kam, janah la kam ngasup ngelawan musuh-musuhndu si apai pe.

³⁸Mate kam i taneh pembuangen, itelen taneh musuh-musuhndu.

³⁹Kalak si tading si nggeluh denga i bas negeri musuhndu, masap me dungna, erkiteken dosandu ras dosa nini-ninindu.

⁴⁰Tapi iakuken sinursurndu pagi dosana ras dosa-dosa nini-ninina si nimbak Aku ras berontak man bangKu,

⁴¹si erbanca Kulawan ia, janah Kubuang ia ku negeri musuh-musuhna. Kedungenna, kenca kesusurenndu e ipeteruk dingen enggo idalanina ukumenna erkiteken dosa ras pemberontakenna,

⁴²i je me maka Kuinget PerpadanenKu ras Jakup, Isak ras Abraham. E maka Kupelimbarui PerpadanenKu, e me kap maka Kubereken negeri e man bangsangKu. [86†]

⁴³Tapi kalak si ngiani taneh e arus iambengken lebe, maka banci taneh e ndalani pengadi-ngadin sabatna, dingen kalak e arus ndalani ukumenna seh genep, erkiteken itulakna undang-undangKu ras perentahKu.

⁴⁴Amin bage pe, tupung ia ringan denga i negeri musuh-musuhna, labo Kutadingken terus kalak enda, labo Kukernepken ia. Sabap adi bage mosar kap PerpadanenKu ras ia, sedangken Aku me TUHAN Dibatandu.

⁴⁵Kuperbarui denggo PerpadanenKu si Kubahan ras nini-ninina, sanga aku maba ia ndarat i taneh Mesir nari, encidahken kuasangKu man kerina bangsa, gelah aku TUHAN, jadi Dibatana.”

⁴⁶Enda me kerina undang-undang ras perentah si ibereken TUHAN man Musa i datas Deleng Sinai si man ikutenken bangsa Israel.