Read Batak Karo IMAMAT 27 Bible Online

IMAMAT 27 - Batak Karo bible

IMAMAT 27

¹Ibereken TUHAN man Musa

²peraturen-peraturen enda man bangsa Israel. Sekalak si ibereken man TUHAN alu make sumpah khusus, banci itebusi

³[3-7] alu erga-erga bagi si tersena enda sue ras erga resmi: -- Dilaki si enggo dewasa umur dua puluh seh enem puluh tahun: lima puluh duit pirak. -- Diberu si enggo dewasa: telu puluh duit pirak. -- Anak dilaki umur lima seh dua puluh tahun: dua puluh duit pirak. -- Anak diberu singuda-nguda: sepuluh duit pirak. -- Anak dilaki ope umur lima tahun: lima duit pirak. -- Anak diberu: telu duit pirak. -- Dilaki umur erbabo enem puluh tahun: sepuluh lima duit pirak. -- Diberu umur erbabo enem puluh tahun: sepuluh duit pirak.

⁸Tapi adi kalak si ersumpah khusus e la ngasup nggalari asa si tersena ndai, baba ia ku adep-adepen imam maka ikurangina ergana asa ngasupna.

⁹Adi ia ersumpah mereken asuh-asuhen si la pantangen man TUHAN, maka tep-tep pemere e badia nge.

¹⁰E maka kalak si ersumpah e la banci nukarkenca alu asuh-asuhen si deban. Adi itukarkenna, duana asuh-asuhen ndai enggo jadi sikerajangen TUHAN.

¹¹Adi sumpahna e mereken rubia-rubia si pantangen si la banci ipersembahken man TUHAN, ibabana lah rubia-rubia e ku adep-adepen imam,

¹²gelah itetapken imam ergana rikutken ulina ntah genjengna asuh-asuhen e. Asa kai nina imam, ase me ergana.

¹³Adi itebusina atena mulihi, arus maka igalarina rikutken si enggo itetapken ndai itambahi ka seperlimana nari.

¹⁴Adi kalak ngendesken rumahna man TUHAN, imam si nentuken ergana rikutken ulina ntah genjengna rumah e. Erga si itentuken imam e la banci iobah.

¹⁵Adi itebusina ka atena e mulihken arus maka igalarina rikutken erga si enggo itetapken ndai itambahi seperlima nari.

¹⁶Adi kalak ngendesken sada bagin tanehna man TUHAN, ergana itentuken rikutken buena benih si ipake guna ngerdangisa, e me sepuluh duit pirak tep-tep dua puluh kilo benih.

¹⁷Adi taneh e iendeskenna minter kenca Tahun Penangtangen, erga si itetapken arus dem.

¹⁸Tapi adi iendesken kenca piga-piga tahun, ergana ikira imam rikutken piga tahun nari maka seh ku Tahun Penangtangen si rehna, jenari itetapken ergana kenca ikurangi.

¹⁹Adi kalak si enggo ngendesken taneh e, nebusisa atena mulihken arus maka igalarina rikutken ergana itambahi ka seperlimana nari.

²⁰Adi idayakenna taneh e man kalak si deban ope denga itebusina i bas TUHAN nari, e lanai lit hakna nebusi taneh e.

²¹I bas tahun Penangtangen si rehna, taneh e jadi sikerajangen TUHAN seh rasa lalap; e jadi sikerajangen imam-imam.

²²Adi kalak ngendesken man TUHAN taneh si enggo itukurna,

²³imam netapken ergana rikutken buena tahun ngayak seh Tahun Penangtangen si rehna, janah arus maka i bas wari e kang igalarina. Duit e jadi sikerajangen TUHAN.

²⁴I bas Tahun Penangtangen arus maka taneh e iulihken man empuna ndube ntah pe man sinursurna.

²⁵Kerina erga arus rikutken erga resmi.

²⁶Tep-tep anak si pemena asuh-asuhen e enggo kap jadi sikerajangen TUHAN; e maka ise pe la banci ngendeskenca man TUHAN jadi persembahen ukur meriah. Anak lembu, anak biri-biri, anak kambing, sikerajangen TUHAN kap.

²⁷Tapi anak si pemena i bas rubia-rubia pantangen banci itebusi alu erga si enggo itetapken itambahi seperlimana nari. Adi la itebusi banci idayaken man kalak si deban alu erga si enggo itetapken.

²⁸Ise pe la banci ndayaken ntah nebusi kai si enggo iendeskenna jadi hak TUHAN guna ikernepken, subuk e manusia, asuh-asuhen, ntah taneh erkiteken enggo jadi hak TUHAN e rasa lalap. [87†]

²⁹Sedangken manusia pe adi enggo iendesken man TUHAN guna ikernepken lanai banci itebusi, tapi arus ibunuh.

³⁰Sepersepuluh i bas ulih tanehndu nari, subuk page, subuk buah kayu, e jadi sikerajangen TUHAN. [88†]

³¹Adi apai gia i bas si sepersepuluh e itebusi kalak atena, arus maka itebusina rikutken erga si enggo itetapken, itambahi seperlimana nari.

³²Sada tep-tep sepuluh asuh-asuhen TUHAN empuna. Adi asuh-asuhen e ikira, maka tep-tep si pesepuluhken, e jadi sikerajangen TUHAN.

³³La banci iaturken empuna asuh-asuhen e, maka si la mehulina saja si terpilih, janah la banci itukari. Adi itukarkenna, duana jadi sikerajangen TUHAN, janah lanai banci itebusi mulihi.

³⁴Enda me kerina perentah-perentah si ibereken TUHAN man Musa i datas Deleng Sinai guna iikutken bangsa Israel.