Read Batak Karo IMAMAT 3 Bible Online

IMAMAT 3 - Batak Karo bible

IMAMAT 3

¹Adi lit kalak mpersembahken lembuna jadi persembahen persadan, lembu si ipersembahken e, subuk jenggina tah beruna, la banci lit sitik pe man pandangen.

²Kalak si maba persembahen e arus namaken tanna i babo takal lembu e, jenari igelehna i lebe pintun Kemah Perjumpan. Darehna arus icurcurken imam-imam kesusuren Harun ku empatna dingding batar-batar e.

³Kenca bage ipersembahkenna lah man TUHAN bagin-bagin si tersena enda jadi persembahen pangan, e me: kerina tabeh-tabeh si maluti tukana,

⁴piahna ras tabeh-tabeh si leket i je ras bagin atena si mejilena.

⁵Imam-imam arus nutung kerina si e i babo batar-batar radu ras persembahen tutungen e. Bau persembahen tutungen e merim iakap TUHAN.

⁶Adi persembahen e biri-biri tah kambing, banci beruna tah pe bajarna, tapi sitik pe la lit man pandangen.

⁷Adi kalak mpersembahken biri-biri,

⁸arus itamakenna tanna i babo takal asuh-asuhen e, jenari igelehna i lebe-lebe Kemah Perjumpan. Darehna icurcurken imam ku empatna dingding batar-batar e.

⁹Kenca bage ipersembahkenna bagin-bagin asuh-asuhen si tersena enda jadi persembahen pangan man TUHAN e me: tabeh-tabehna, tabeh-tabeh ikur si ikeret tingtang tulan ikur, kerina tabeh-tabeh si maluti tukana, ramramenna,

¹⁰piahna ras tabeh-tabehna si leket i je, ras bagin atena si mejilena.

¹¹Imam si ngelakoken dahin e arus nutung kerina si enda i babo batar-batar persembahen jadi persembahen pangan man TUHAN.

¹²Adi kalak mpersembahken kambing,

¹³itamakenna lah tanna i babo takal kambing e, jenari igelehna i lebe-lebe Kemah Perjumpan. Darehna icurcurken imam-imam ku empatna dingding batar-batar persembahen.

¹⁴Kenca bage ipersembahkenna bagin si tersena enda jadi persembahen pangan man TUHAN, e me: kerina tabeh-tabeh si maluti tukana, isi beltekna,

¹⁵piahna ras tabeh-tabehna, ras bagin atena si mejilena.

¹⁶Imam ndai nutung si enda kerina i babo batar-batar jadi persembahen pangan si erbanca meriah ukur TUHAN. Kerina tabeh-tabehna TUHAN empuna.

¹⁷Sada pe la banci kalak Israel man tabeh-tabeh tah pe dareh. Aturen enda arus ipatuhi bangsa Israel kerina asa lalap i japa pe ia ringan.