Read Batak Karo IMAMAT 4 Bible Online

IMAMAT 4 - Batak Karo bible

IMAMAT 4

¹Iperentahken TUHAN man si Musa

²gelah ngataken man kalak Israel, maka kalak si erdosa janah ngelanggar pedah-pedah TUHAN alu la sengaja, arus ngikutken aturen-aturen enda.

³Adi Imam si Mbelin si erdosa e, kerina jelma si nterem pe ikut erdosa. Erkiteken si e arus ipersembahkenna sada jenggi lembu nguda si la lit sitik pe man pandangen. Ipersembahkenna e man TUHAN guna nasapken dosana.

⁴Ibabanalah lembu e ku pintun Kemah Perjumpan. Kenca bage iamparkenna lah tanna i babo takal lembu e, jenari i bas ingan e lembu e igelehna i adep-adepen TUHAN.

⁵Ibuat Imam si Mbelin lah sitik dareh lembu e, jenari ibabana ku bas Kemah.

⁶Icebukkenna lah jari-jarina ku bas dareh e, e maka ipirpirkenna pitu kali ku lebe-lebe kire-kire si badia.

⁷Kenca bage itamakenna sitik dareh e ku tanduk batar-batar ingan nutung kumenen i bas Kemah Perjumpan e. Si lebihna iamburkenna ku teruh batar-batar persembahen tutungen si lit i lebe-lebe pintun Kemah.

⁸Kerina tabeh-tabeh lembu e arus ibuatna, tabeh-tabeh si maluti tukana,

⁹piahna ras tabeh-tabeh i bas piah e, bage pe bagin atena si mejilena.

¹⁰Imam arus nutung kerina tabeh-tabeh i das batar-batar persembahen tutungen bali ras penutungna tabeh-tabeh asuh-asuhen si igeleh guna persembahen persadan.

¹¹Tapi ibuat lah kerina kuling-kulingna, dagingna, takalna, pahana, isi beltekna ras tukana,

¹²jenari ibabana kerina ku darat ingan erkemah, ku ingan si bersih rikutken aturen agama, ingan ngamburken abu. I je me itutungna i babo ranting si gara.

¹³Adi si erdosa e kerina perpulungen Israel, janah ersalah erkiteken ngelanggar pedah TUHAN alu la sengaja,

¹⁴kenca dosa e ieteh minter kerina perpulungen maba sada jenggi lembu si nguda guna ipersembahken. Babana lah e ku Kemah Perjumpan.

¹⁵Itamaken peminpin-peminpin perpulungen e lah tanna i babo takal lembu e, jenari igelehna i bas ingan e.

¹⁶Jenari ibaba Imam si Mbelin sada bagin dareh lembu e ku bas Kemah Perjumpan.

¹⁷Icebukkenna jari-jarina ku bas dareh e, e maka ipirpirkenna pitu kali ku lebe-lebe kire-kire.

¹⁸Itamana lah sitik dareh ndai ku tanduk batar-batar kumenen si lit i bas Kemah Perjumpan, e maka ibana iamburken ku teruh batar-batar persembahen tutungen si lit i lebe-lebe pintun Kemah.

¹⁹Kenca bage ibuatna lah kerina tabeh-tabehna, itutungna kerina i babo batar-batar ingan persembahen.

²⁰Bagi pengelakokenna nandangi jenggi lembu persembahen kerna dosa, bage ka lah pengelakokenna nandangi jenggi lembu enda. Alu bage ipersembahkenna persembahen kerna dosa bangsa e kerina, janah bangsa e ialemi.

²¹Kenca bage ibabana lah lembu e ku darat ingan erkemah, e maka itutungna, bali ras penutungna lembu persembahen kerna dosana sendiri. Enda me persembahen guna pengalemi dosa perpulungen.

²²Adi si erdosa e sekalak peminpin, janah ersalah ia erkiteken ngelanggar sada bagin perentah TUHAN alu la sengaja,

²³kenca dosana e ipebetehken man bana, arus maka minter ibabana persembahen sada kambing bajarna si la lit sitik pe man pandangen.

²⁴Iamparkenna lah tanna i babo takal kambing e, janah kenca bage igelehna lah kambing e arah Utara batar-batar, ingan asuh-asuhen persembahen tutungen igeleh. Enda me persembahen pengalemi dosa.

²⁵Icebukken imam lah jari-jarina ku bas dareh asuh-asuhen e, jenari itamakenna lah ku tanduk batar-batar e. Lebihna iamburkenna lah ku teruh batar-batar persembahen e.

²⁶Kenca bage maka itutungna lah kerina tabeh-tabehna i das batar-batar persembahen, bali ras penutungna tabeh-tabeh asuh-asuhen si igeleh guna persembahen persadan. Bagenda me arusna imam mpersembahken persembahen kerna dosa sekalak peminpin. Alu bage ialemi me dosa peminpin ndai.

²⁷Adi sekalak rayat biasa erdosa, janah ersalah erkiteken ngelanggar sada bagin pedah TUHAN alu la sengaja, [1†]

²⁸kenca dosana e ipebetehken, arus maka minter ipersembahkenna sada kambing beru-beru si la lit sitik pe man pandangen.

²⁹Iamparkenna tanna i babo takal kambing e, e maka igelehna arah Utara batar-batar persembahen e, ingan asuh-asuhen persembahen tutungen igeleh.

³⁰Icebukken imam lah jari-jarina ku bas dareh asuh-asuhen e, kenca bage itamakenna ku tanduk batar-batar e.

³¹Kenca bage iaguina lah kerina tabeh-tabehna, bagi pengaguina tabeh-tabeh asuh-asuhen si igeleh man persembahen persadan. E maka itutungna lah tabeh-tabeh i babo batar-batar persembahen, gelah merim iakap TUHAN. Bagenda me arusna imam mpersembahken persembahen guna dosa kalak ndai, janah ialemi me ia.

³²Adi kalak mpersembahken sada biri-biri kerna dosana, arus maka biri-biri e beruna si la lit sitik pe man pandangen.

³³Iamparkenna lah tanna i babo takal biri-biri e, e maka igelehna lah arah Utara batar-batar, ingan asuh-asuhen persembahen tutungen igeleh.

³⁴Icebukken imam lah jari-jarina ku bas dareh asuh-asuhen e, kenca bage itamakenna lah ku tanduk batar-batar. Ibana iamburkenna lah ku teruh batar-batar persembahen e.

³⁵Kenca bage iaguina lah kerina tabeh-tabehna, bali ras pengaguina tabeh-tabeh biri-biri si igeleh guna persembahen persadan. Kenca bage maka itutungna lah tabeh-tabeh e i babo batar-batar bali ras persembahen pangan si ipersembahken man TUHAN. Bagenda me arusna imam mpersembahken persembahen kerna dosa kalak ndai, janah ialemi me ia.