Read Batak Karo IMAMAT 6 Bible Online

IMAMAT 6 - Batak Karo bible

IMAMAT 6

¹ TUHAN mereken peraturen-peraturen enda man Musa: [2†]

²Ise erdosa man TUHAN erkiteken la ia nggit ngulihken barang si isimpanken temanna kalak Israel i bas ia, ntah pe itangkona barang temanna e, ntah pe ibuatna barang temanna arah penipun,

³ntah pe idatca barang si bene tapi ersumpah ia alu guak maka nina la lit idatca barang e, maka kalak si bage arus erbahan persembahen man TUHAN.

⁴[4-5] Adi lit kalak erdosa alu ngelakoken ntah apai gia bagi si tersena enda ndai arus maka iulihkenna kai si idatna alu dalan si la bujur e. Tupung kesalahenna e terdat, i bas wari e ka pe arus dem igalarina man empuna ndai, janah itambahi ka pe seperlimana nari.

⁶Ibabana lah man imam sada bajar biri-biri ntah pe kambing si la lit sitik pe man pandangen, jadi sada persembahen pertebusen man TUHAN. Ergana itetapken rikutken erga si sah.

⁷Ipersembahken imam lah persembahan e guna dosa kalak ndai, e maka ialemi me dosana.

⁸Iperentahken TUHAN man Musa

⁹gelah ibereken man Harun ras man anak-anakna peraturen-peraturen kerna persembahen tutungen. Tadingken lah persembahen tutungen sada berngi i babo batar-batar, janah apina arus ijaga gelah tetap gara.

¹⁰Kenca bage, alu erpaken jubah lenen ras saluar lenen, imam arus ngagui abu si erminak si tading i babo batar-batar e, jenari itamaken ku deher batar-batar e.

¹¹Kenca bage maka ganti paken ia, jenari ibabana abu e ku darat ingan erkemah, ku ingan si bersih rikutken aturen agama.

¹²Api i das batar-batar arus ijaga gelah tetap gara janah ola pelepas nimpet. Tep-tep erpagi-pagi imam arus namaken ranting ku je, ngatur persembahen tutungen e i babo ranting, ras nutung tabeh-tabeh persembahen persadan.

¹³Api arus ijaga maka tetap gara i babo batar-batar, janah ola pelepas nimpet.

¹⁴Enda me aturen-aturen kerna persembahen pangan: Sekalak imam i bas kesusuren Harun nari mpersembahken pangan man TUHAN i lebe batar-batar persembahen.

¹⁵Kenca bage ibuatna lah tepung e sempukul ras minak bage pe kumenen si i babo tepung e, e maka itutungna i das batar-batar persembahen tandana enggo kerina ipersembahken man TUHAN. Bau persembahen e merim iakap TUHAN.

¹⁶[16-17] Si lebihna arus ipan imam-imam. Tepung e arus ibahan jadi roti si la itama ragi, jenari ipan i bas ingan si badia, i kesain Kemah Perjumpan. Kai si enggo ibereken TUHAN i bas persembahen pangan e nari, jadi bagin imam-imam. Badia kal e, bali ras persembahen dosa ntah pe persembahen erkiteken salah.

¹⁸I bas paksa-paksa si reh enda, apai pe kesusuren Harun si dilaki banci manca selaku baginna i bas persembahen pangan e. Kalak si deban si manca la banci lang isakiti, erkiteken kuasa kebadianna.

¹⁹Ibereken TUHAN aturen-aturen enda man Musa,

²⁰guna penangkuhen imam i bas kesusuren Harun nari. I bas wari penangkuhenna iberekenna lah man TUHAN sada kilo tepung (seri buena ras persembahen pangan si tep-tep wari), setengah erpagi-pagi setengah karaben.

²¹Campurken ras minak, itasakken tare belanga. Kenca bage iripukken, jenari ipersembahken jadi persembahen pangan. Bau persembahen e merim iakap TUHAN.

²²I bas paksa-paksa si reh enda pe, persembahen si bagenda arus isehken tep-tep kesusuren Harun si jadi Imam si Mbelin. Persembahen e arus itutung ngayak keri jadi persembahen man TUHAN.

²³Persembahen pangan si ipersembahken imam la banci sitik pe ipan, kerinana arus itutung.

²⁴Iperentahken TUHAN man Musa

²⁵gelah iberekenna man Harun ras anak-anakna peraturen-peraturen si arah teruh enda, e me kerna persembahen erkiteken dosa. Asuh-asuhen guna persembahen dosa arus igeleh arah Utara batar-batar persembahen, ingan nggeleh asuh-asuhen persembahen tutungen. Persembahen e seh kal badiana.

²⁶Imam si mpersembahken asuh-asuhen e arus man persembahen e i bas ingan si badia e me i kesain Kemah Perjumpan.

²⁷Ise kalak ntah kai saja si ngkuit daging asuh-asuhen e lanai banci ipergunaken guna pemaken biasa. Asa kai uis si kena dareh asuh-asuhen e arus icuci i bas ingan si badia.

²⁸Asa kai kudin taneh penanggeren daging e la banci la ipecahken, janah adi itangger tare kudin gelang-gelang la banci la igus-gusi, jenari iburihi alu lau.

²⁹Kasa kai dilaki i bas keluarga imam banci ipanna persembahen enda; persembahen e seh kal badiana.

³⁰Tapi adi lit dareh e i baba ku bas Kemah Perjumpan, jenari igunaken i bas lakon pengalemi dosa, daging asuh-asuhen e la banci ipan, tapi arus itutung.