Read Batak Karo IMAMAT 7 Bible Online

IMAMAT 7 - Batak Karo bible

IMAMAT 7

¹Enda me peraturen-peraturen kerna persembahen penebusen. Persembahen enda tuhu-tuhu badia.

²Asuh-asuhen guna persembahen enda igeleh arah Utara batar-batar persembahen, e me ingan nggeleh asuh-asuhen persembahen tutungen. Darehna iamburken ku empatna dingding batar-batar persembahen e.

³Serapken tabeh-tabehna kerina, tamaken ku das batar-batar: tabeh-tabeh si i bas ikurna, tabeh-tabeh si maluti isi beltekna,

⁴piahna ras tabeh-tabeh si lit i je, bage pe bagin atena si mejilena.

⁵Imam arus nutung kerina tabeh-tabeh e i das batar-batar jadi persembahen penebusen man TUHAN.

⁶Kasa kai dilaki i bas keluarga imam, banci ipanna persembahen e, tapi arus ipan i bas ingan si badia, perbahan badia kal kap persembahen e.

⁷Bagi peraturen persembahen kerna dosa, bage me pe peraturen persembahen penebusen. Duana seri peraturenna, e me: daging asuh-asuhen e jadi sikerajangen imam si mpersembahkenca.

⁸Kuling-kuling asuh-asuhen si ipersembahken jadi persembahen tutungen jadi sikerajangen imam si mpersembahken persembahen e.

⁹Tep-tep persembahen pangan si enggo itasakken i dapur, ntah pe si isikapken i bas kudin, ntah pe i bas belanga e jadi sikerajangen imam si mpersembahkenca ku Dibata.

¹⁰Tapi kerina persembahen pangan si la itasakken, subuk si icampur ras minak, ntah si kerah, e kerina jadi sikerajangen kesusuren Harun, janah arus maka ibagi seri sapih-sapih ia.

¹¹Si isuratken arah teruh enda e me peraturen-peraturen persembahen persadan si ipersembahken man TUHAN.

¹²Adi kalak erbahan perbahanen enda jadi persembahen pengataken bujur man Dibata arus pe ipersembahkenna radu ras asuh-asuhen si ipersembahken e, roti si la itama ragi: subuk roti si mekapal si ibahan i bas tepung nari campur ras minak saitun, ntah pe roti si menipes isapuken sitik alu minak saitun ku je, ntah pe cimpa si ibahan i bas tepung nari campur minak saitun.

¹³Tambah si e arus pe ipersembahkenna roti si itasakken la tama ragi.

¹⁴Ipersembahkenna lah sada bagin i bas tep-tep erbage roti ndai jadi persembahen khusus man TUHAN, jadi sikerajangen imam si ngamburken dareh asuh-asuhen e ku batar-batar.

¹⁵Daging asuh-asuhen e arus maka ipan i bas wari i ja ia ipersembahken; la banci itadingken sitik pe seh pepagina.

¹⁶Adi kalak mpersembahken persembahen persadan erkiteken nehken padanna, ntah pe selaku persembahen erkiteken ukurna ersuruh, labo arus maka kerina daging e ipan i bas wari i ja ia ipersembahken, tapi asa kai si tading banci ipan pepagina.

¹⁷Kerina daging si tading i bas wari si peteluken arus maka itutung.

¹⁸Adi daging persembahen e ipan i bas wari si peteluken, la ialoken Dibata persembahen kalak ndai. Persembahen e la esah tapi ianggap la bersih rikutken aturen agama. E maka ise saja manca arus nanggung akibat-akibatna.

¹⁹Adi daging e sidegesen ras barang-barang si la bersih rikutken aturen agama, lanai banci ipan, tapi arus maka itutung. Asa kai kalak bersih rikutken aturen agama banci ipanna daging e,

²⁰tapi adi kalak la bersih manca lanai ia ikira bangsa Dibata.

²¹Bage pe, ise ngkuit kai saja si la bersih, subuk asalna i bas manusia nari ntah i bas asuh-asuhen nari, jenari ipanna daging si ipersembahken e, ia lanai ikira bangsa Dibata.

²²Tole ibereken TUHAN peraturen-peraturen si tersena arah teruh enda man Musa,

²³guna kalak Israel. Tabeh-tabeh lembu, biri-biri, ntah kambing la banci ipan.

²⁴Tabeh-tabeh asuh-asuhen si mate bana, ntah mate erkiteken ibunuh rubia-rubia si meliar la banci ipan, tapi banci ipergunaken guna keperlun si deban.

²⁵Sabap ise manca tabeh-tabeh asuh-asuhen si enggo ipersembahken jadi persembahen pangan man TUHAN, lanai ia ikira bangsa Dibata.

²⁶Amin i japa pe kalak Israel tading, la banci ipanna dareh perik-perik ntah dareh asuh-asuhen. [3†]

²⁷Ise si ngelanggar peraturen enda lanai ia ikira bangsa Dibata.

²⁸Ibereken TUHAN tole peraturen si arah teruh enda man Musa

²⁹guna bangsa Israel. Ise si mpersembahken persembahen persadan arus maka sada bagin ibabana jadi persembahen si khusus man TUHAN.

³⁰Ibabana lah si e alu tanna jine jadi persembahen pangan. Tabeh-tabeh e arus ibabana tare tenten asuh-asuhen e maka ipersembahkenna jadi persembahen khusus man TUHAN.

³¹Arus maka itutung imam tabeh-tabeh e i babo batar-batar persembahen, tapi tentenna jadi sikerajangen imam-imam.

³²Nahe pudi si arah kemuhen asuh-asuhen e, ibereken jadi sumbangen khusus,

³³man imam si mpersembahken dareh ras tabeh-tabeh persembahen persadan ndai.

³⁴Tenten asuh-asuhen e, nahena kemuhen si arah pudi, e me pemere khusus si enggo ibuat TUHAN i bas bangsa Israel nari ibereken man imam-imam. Enda me si arus ibereken bangsa Israel man imam seh rasa lalap.

³⁵Enda me bagin pangan si ipersembahken man TUHAN si ibereken man Harun ras anak-anakna i bas warina ia itangkuhken jadi imam-imam.

³⁶I bas wari e iperentahken TUHAN man Israel gelah mereken bagin persembahen enda man imam-imam e. Peraturen enda arus ipatuhi bangsa Israel seh rasa lalap.

³⁷Bagenda me peraturen-peraturen persembahen tutungen, persembahen pangan, persembahen kerna dosa, persembahen penebusen, persembahen penangkuhen, ras persembahen persadan.

³⁸TUHAN mereken perentah enda ndai man Musa i das Deleng Sinai, i gurun pasir, e me i bas warina Musa nuruh bangsa Israel mpersembahken persembahen-persembahenna.