Read Batak Karo IMAMAT 9 Bible Online

IMAMAT 9 - Batak Karo bible

IMAMAT 9

¹I bas wari si pewaluhken, kenca lakon penangkuhen e enggo dung, Musa ndilo Harun ras anak-anakna bage pe peminpin-peminpin Israel.

²Nina man Harun, “Buatlah sada jenggi lembu nguda ras sada bajar biri-biri si la lit sitik pe man pandangen, persembahken e man TUHAN. Lembu e gunana man persembahen kerna dosa, janah biri-biri e man persembahen tutungen.

³Kenca bage kataken man bangsa Israel gelah maba sada bajar kambing man persembahen kerna dosa; sada lembu umur sada tahun, ras sada biri-biri umur sada tahun si la lit sitik pe man pandangen, man persembahen tutungen,

⁴janah sada jenggi lembu ras sada bajar biri-biri, man persembahen persadan. Bangsa e arus mpersembahken si enda kerina man TUHAN radu ras persembahen pangan si icampur ras minak. Arus ilakokenna enda erkiteken TUHAN encidahken baNa i bas wari e man bangsa enda.”

⁵E maka ibaba kalak enda ku lebe-lebe Kemah Perjumpan kerina si iperentahken Musa, janah kerina bangsa e pulung i je nembah man TUHAN.

⁶Nina Musa, “TUHAN enggo merentahken kam guna ngelakoken si enda kerina, gelah banci idahndu terang sinalsal kemulianNa.”

⁷Jenari nina man Harun, “To ku batar-batar persembahen ah, persembahken persembahen kerna dosa ras persembahen tutungen guna nasapken dosandu ras dosa bangsa e. Persembahken lah persembahen enda guna nasapken dosa-dosa bangsa e, sue ras si iperentahken TUHAN.” [4†]

⁸E maka lawes Harun ku batar-batar persembahen e, igelehna jenggi lembu nguda e si ikhususken jadi persembahen kerna dosana jine.

⁹Anak-anakna mereken dareh lembu e man bana, e maka icebukkenna jari-jarina ku bas darah e, jenari itamakenna sitik ku tanduk batar-batar, janah si lebihna iamburkenna ku teruh batar-batar persembahen.

¹⁰Kenca bage itutungna i babo batar-batar persembahen tabeh-tabehna, piahna, bagin atena si mehulina, sue ras si enggo iperentahken TUHAN man Musa.

¹¹Tapi daging ras kuling-kulingna itutungna i darat ingan erkemah e.

¹²Jenari maka igelehna ka asuh-asuhen si jadi persembahen tutungen guna dirina jine. Anak-anakna mereken dareh asuh-asuhen e man bana, jenari icurcurkenna ku empatna dingding batar-batar persembahen e.

¹³Ibereken anak-anakna ka takal asuh-asuhen ndai ras bagin-bagin si debanna, e maka itutung Harun e kerina i babo batar-batar persembahen.

¹⁴Kenca bage iburihina isi beltek asuh-asuhen e, nahena si arah pudi, e maka itutung i babo batar-batar i babo kerina persembahen tutungen si deban.

¹⁵Kenca bage maka ipersembahkenna persembahen bangsa e. Ibuatna kambing si man persembahenken guna pengalemi dosa kalak enda, igelehna, e maka ipersembahkenna, bali ras si enggo ibahanna nandangi persembahen kerna dosa-dosana jine.

¹⁶Ibabana ka pe asuh-asuhen guna persembahen tutungen e. Ipersembahkenna e rikutken peraturenna.

¹⁷Ipersembahkenna persembahen pangan e jenari ibuatna tepung e sempukul, e maka itutungna i babo batar-batar persembahen. (Persembahen enda e me selaku tambahen persembahen tutungen si tep-tep wari.)

¹⁸Igelehna jenggi lembu ras bajar biri-biri e jadi persembahen persadan bangsa e. Anak-anakna mereken dareh asuh-asuhen e man bana, e maka icurcurkenna ku empatna dingding batar persembahen e. [5†]

¹⁹Bagin-bagin si lit tabeh-tabehna i bas lembu ras biri-biri e iamparken Harun

²⁰i babo tenten asuh-asuhen e, e maka ibabana kerina ku batar-batar. Itutungna tabeh-tabeh e i babo batar-batar,

²¹e maka iendeskenna tenten ras nahe pudi si kemuhen asuh-asuhen e jadi pemere si khusus man TUHAN guna imam-imam bagi si enggo iperentahken Musa.

²²Kenca enggo dung kerina ipersembahken Harun persembahen-persembahen e, iangkatna tanna i babo bangsa e, ipasu-pasuna. E maka nusur ia. [6†]

²³Musa ras Harun bengket ku bas Kemah Perjumpan. Sanga kalak enda ndarat i bas nari, ipasu-pasuna bangsa e, janah terang sinalsal kemulian TUHAN teridah man kerina bangsa e.

²⁴Rempet ipesusur TUHAN api, janah ipan api e persembahen tutungen ndai ras kerina bagin-bagin tabeh-tabeh si lit i das batar-batar e. Kenca idah kalak enda kejadin e ersurak-surak ia, jenari erjimpuh ia, ayona seh ku taneh.