Read Batak Karo JEREMIA 10 Bible Online

JEREMIA 10 - Batak Karo bible

JEREMIA 10

¹O bangsa Israel, dengkehkenlah kata TUHAN man bandu.

²Nina, “Ola ikut-ikutndu perbahanen bangsa-bangsa si deban. Ola kam mbiar nandangi tanda-tanda i langit, Aminna pe bangsa-bangsa si deban gentar.

³Agama bangsa-bangsa e, agama si sia-sia. Si isembahna, e me kayu si itabah i bas kerangen nari, si igana alu pahat tukang kayu;

⁴si ihiasina alu pirak ras emas, ipeteguhi alu paku maka ola ia guling.

⁵Gana-gana e bali kap ras tembut-tembut i bas peken mandike, la banci ia ngerana; ikanting-kanting nge ia, erkiteken la ia beluh erdalin. Ola kam mbiar man bana: Labo banci kena kai pe kam ibahanna, labo ngasup ia mahan si mehuli pe man bandu.”

⁶O TUHAN la lit si terpeseri ras Kam. Kam kap si mbisa, gelarNdu mbelin dingen ergegeh.

⁷Ise kin la erkemalangen man baNdu, o Raja nu bangsa-bangsa? Patut Kam ihamati. La lit si terpeseri ras Kam, subuk ras kalak pentar nu bangsa-bangsa, bage pe ras raja-rajana. [18†]

⁸Kerina ia bodoh dingen lenge. Kai kin banci iajarken gana-gana kayu man bana?

⁹Gana-ganana ilapisi alu pirak i Sepanyol nari, dingen alu emas i Upas nari, kerina gana-gana e bekas tan tukang erbahanca. Iuisi alu uis gara entah uis mbiring, bekas itenun kalak si beluh ertenun.

¹⁰Tapi Kam O TUHAN, Kam kap Dibata si tuhu-tuhu, Kam Dibata si nggeluh, Kam raja rasa lalap. Kune merawa Kam, doni enda pe mugur-ugur; la tertahanken bangsa-bangsa rawaNdu. (

¹¹Arus maka ikatakenndu man bana maka labo gana-gana e si nepa langit ras doni, e maka ikernepken me ia. Masap me ia kerina i babo doni enda nari.)

¹²Pertibi enda ijadiken Dibata alu gegehNa, alu kepentarenNa itepaNa doni enda. Ia kap si engkimbangkenca langit kerina.

¹³Alu perentahNa ergeruhguh lau i datas langit, ibabaNa embun i tampuk doni nari. IbabaNa kilap ernala i bas udan, isuruhNa angin rembus i bas penimpanenNa nari.

¹⁴Ngidah si e, motu dingen bodoh kal iakap kalak man bana. Kalak si erbahan gana-gana juru kal iakapna, erkiteken gana-gana si ibahanna e labo si tuhu-tuhu, dingen la erkesah.

¹⁵Kerina gana-gana e sia-sia dingen arus iciduri; kerina ia la banci la ikernepken tupung TUHAN reh ngukumsa.

¹⁶Dibata nu Jakup la bage. Ia kap si njadiken kerina si nasa lit; enggo ipilihNa Israel jadi bangsaNa. TUHAN si Mada Kuasa kap gelarNa.

¹⁷“O kalak Jerusalem! Kam enggo ikepung. Pepulunglah erta-ertandu.

¹⁸Ipelawes TUHAN kam i bas negeri enda nari. IperentahNa kam seh maka sekalak pe lanai lit tading. TUHAN kap si ngerana.”

¹⁹Nderkuh kalak Jerusalem nina, “Andiko, kelekna luka kami! Ugah kami lanai banci malem. Iakap kami mbarenda ngasup denga kami nahankenca.

²⁰Enggo meruntuh kal kemah kami, tinalina enggo peltep. Anak-anak kami enggo keri kal kerina lawes? lanai lit si tading masang tenda, lanai lit si nangkutken kire-kire.”

²¹Ningku njabapsa, “Peminpin kami motu kap, la ipindona penegu-negu TUHAN. E me sabapna ia guling, dingen bangsa kami enggo merap.

²²Dengkehkenlah! Enggo seh berita. Sora keguntaren? Guntar si mbelin arah negeri Utara nari, tenterana reh ngeruntuhken Juda gelah jadi gurun pasir jadi ingan tading serigala.”

²³Kueteh O TUHAN, maka labo manusia si nentuken nasipna; labo manusia si engkuasai geluhna.

²⁴O TUHAN pandang bangsaNdu, tapi ola mekeleksa. Tupung Kam merawa ola kami ukumNdu, sabap adi bage dung me kami.

²⁵Piserkenlah rawaNdu kempak bangsa-bangsa si la nembah man baNdu kempak kalak si nulak Kam. Enggo ibunuhna bangsaNdu, enggo getem kal kami ibahanna, dingen enggo radas kal negeri kami ibahanNa.