Read Batak Karo JEREMIA 12 Bible Online

JEREMIA 12 - Batak Karo bible

JEREMIA 12

¹O TUHAN, adi ersoal ateku ras Kam kerna perkarangku, Kam nge tentu si benar. Amin bage pe ateku nungkun kerna keadilen man baNdu. Engkai maka bayak kalak jahat? Engkai maka sangap kalak si la bujur?

²IpeturahNdu e maka rurat ia, turah janah erbuah ka. Tuhu mehuli nge cakapna kerna Kam, tapi si tuhuna labo Kam diatena.

³O TUHAN itandaiNdu kap aku, idahNdu kap perbahanenku, uga kelengna ateku Kam. Tegulah kalak jahat, desken biri-biri si itegu ku penggelehen. Jagailah ia, ngayak seh paksa penggelehen.

⁴Asa kai nari dekahna kerah negeri kami? Asa kai nari dekahna melus dukut-dukut i juma? Rubia-rubia ras perik-perik mate me, erkiteken bangsa kami jahat perbahanenna. Nina, “Labo idah Dibata perbahanenta.”

⁵Nina TUHAN, “O Jeremia adi ras jelma pe talu kam erlumba, uga banci kam ngasup erlumba ras kuda? Adi i tengah mbalmbal si teneng pe la kam ngasup tedis, kai banci ibahanNdu i kerangen Baluren Lau Jordan?

⁶Sabap senina-seninandu, sima-simandu jine enggo nghianati kam. Ipersadana arihna lako ngelawan kam. Ola kam tek man bana, aminna mehuli pe rananna bandu.”

⁷Nina TUHAN, “Enggo Kutadingken Israel, enggo Kutulak bangsa pilihenKu, bangsa si Kukelengi enggo Kuendesken gelah ikuasai imbang-imbangna.

⁸Bangsa pilihenKu enggo nundalken Aku, desken singa i tengah kerangen, erdengum sorana kempak Aku, e maka nembeh ateKu ia.

⁹Bangsa pilihenKu desken perik kap, arah apai nari pe reh kuliki nangkisi ia. Dilo min kerina rubia-rubia si meliar, maka ia reh manganisa kerina.

¹⁰Nterem peminpin bangsa si deban enggo encedaken peken anggurKu. JumangKu iperjakina, tanehKu si mejile enggo jadi gurun pasir ibahanna.

¹¹Negeri e ibahanna jadi taneh si mesawang, enggo terulang i adep-adepenKu. Kerina negeri enggo jadi gurun pasir, ise pe la lit si mperdiatekenca.

¹²Enggo reh kalak si ngerampukisa, deleng-deleng gurun pasir ibentasina. Enggo Kusuruh perang ngkernepken kerina negeri e sekalak pe i je la banci dame geluhna.

¹³BangsangKu enggo nuan gandum tapi rih nge si ipepulungna. Erdahin erbintuas ia, tapi la kap lit ulihna. Erkiteken rawangKu si gara, e maka la lit ulih jumana.”

¹⁴Nina TUHAN, “Lit ateKu si man cakapenken kerna negeri-negeri sekelewet Israel si enggo encedaken negeri si nai Kubereken man bangsangKu Israel. Kubuat kerina bangsa si jahat e i tengah-tengah negerina nari desken ngeruah sinuan-sinuan, jenari Kupulahi Juda i bas ia nari.

¹⁵Tapi kenca ia enggo Kuruah, Kucidahken me perkuah ateKu man bana. Kuulihken kerina bangsa-bangsa e ku bas taneh pusaka, ku bas negerina jine.

¹⁶Kune alu bulat ukurna ialokenna agama bangsangKu, dingen ersumpah ia nina asa TUHAN nggeluh, bagi pengajarina nai bangsangKu ersumpah i bas gelar Baal, e maka bangsa-bangsa e ikut jadi bangsangKu, dingen terberita.

¹⁷Tapi adi la ia erkemalangen kempak Aku, e maka Kuruah ia seh keri, maka kernep. Aku kap TUHAN si enggo melasken kata enda.”