Read Batak Karo JEREMIA 13 Bible Online

JEREMIA 13 - Batak Karo bible

JEREMIA 13

¹Isuruh TUHAN aku nukur gendit lenen dingen makesa. Tapi ikatakenNa maka gendit e la banci kena lau.

²E maka kutukur dingen kupake.

³Kenca bage ngerana ka TUHAN man bangku nina,

⁴“To ku Lau Eprat janah buniken gendit e i jah i bas sada lubang batu.”

⁵E maka lawes aku dingen kubuniken deher Lau Eprat.

⁶Piga-piga dekah kenca si e, isuruh TUHAN aku ku Lau Eprat muat gendit ndai.

⁷E maka lawes aku dingen tupung kubuat i bas inganku munikenca mbarenda, enggo macik gendit e, lanai erguna.

⁸Kenca bage ngerana ka TUHAN man bangku nina,

⁹“Bagenda me pengkernepkenKu kiniganjangen ukur Juda ras Jerusalem.

¹⁰Bangsa si jahat e lanai erkemalangen man bangKu. Mekeng pusuhna dingen gelgel jahat pengelakona. Isembahna janah erdahin ia guna dibata-dibata si deban. E maka genduari enggo seri ia ras gendit enda; lanai erguna.

¹¹Bali ras gendit enda leket i bas awak bage me Kubahan leketna kalak Israel ras Juda ras Aku. Kulakoken si e gelah ia jadi bangsangKu janah ipujina ras ihamatina gelarKu. Tapi la ia erkemalangen man bangKu.”

¹²Nina TUHAN Dibata man bangku, “O Jeremia, turiken man kalak Israel maka tep-tep guci lau anggur atena iisi salu lau anggur. Ikatakenna me maka ietehna nge tep-tep guci lau anggur la banci la iisi salu lau anggur.

¹³Kataken man bana maka Aku TUHAN si mereken man bangsa e lau anggur seh ngayak mabuk; subuk raja-rajana, subuk kesusuren Daud, imam-imam, nabi-nabi bage pe kerina kalak si tading i Jerusalem.

¹⁴Kenca bage Kuperperken ia desken guci si perper erkiteken siantuken ras guci. Subuk nguda entah metua, lanai ateKu mekuah, lanai ia Kukelengi, la erndobahen Kukernepken ia kerina.”

¹⁵O kalak Israel, TUHAN kap si enggo ngerana! Peteruklah ukurndu dingen dengkehkenlah Ia.

¹⁶Erkemalangenlah man TUHAN Dibatandu, ope denga iberekenNa kegelapen man bandu. Ope denga kam tertuktuk i deleng-deleng si gelap. Ope denga terang si iarap-arapkenndu salih jadi gelap la teralang.

¹⁷Adi la ibegikenndu, ngandung me aku i bas ingan si terbuni, tangis ngandung aku janah iluh mambur erdire-dire, erkiteken bangsa TUHAN enggo ibaba tertaban.

¹⁸Nina TUHAN, “Kataken man raja ras kempak nande raja gelah ia nusur i bas kursi kinirajanna nari, sabap mahkotana si mejile enggo ndabuh i bas takalna nari.

¹⁹Kuta-kuta arah Selatan Juda enggo ikepung. E maka ise pe la nai banci mentas arah e. Kerina kalak Juda enggo iangkut ku pembuangen.”

²⁰O Jerusalem, nehenlah! Musuhndu reh i Utara nari! I ja kin rarasen si ipermakanindu, e me bangsa si iagahkenndu?

²¹Kai nari belas-belasndu adi bangsa si iakapndu temanndu, naluken janah engkuasai kam? Mesui kal iakapndu desken sekalak pernanden sangana mupus.

²²Kune nungkun-nungkun pusuhndu, ngkai maka si enda kerina jadi man bandu, ngkai maka irigatken kalak uisndu janah igagahina kam, jabapna e me erkiteken mekeleksa dosandu.

²³Banci kin kalak mbiring ngobah kulitna gelah ola nai mbiring? Banci kin arimo nasapken rupana si mekambing? Kune banci, e maka kam si semal ngelakoken si jahat, banci nge erlajar erbahan kai si mehuli.

²⁴Ikerapken TUHAN me kam desken segal si iembusken angin si rehna i gurun pasir nari.

²⁵IkatakenNa maka e me jadi sikerajangenndu. Enda me keputusenNa erkiteken kam enggo ngelupaken Ia janah ernalem man dibata-dibata si la tuhu.

²⁶TUHAN jine si erbahanca kam manjang-anjang maka mela akapndu.

²⁷IdahNa ilakokenndu si nembeh ateNa. IdahNa kam ngadap ku lebe-lebe gana-gana kalak perbegu i datas uruk-uruk ras i tengah juma, desken sekalak dilaki erlua-lua ras ndehara temanna, desken mberguh kuda iadep-adepen beruna. O kalak Jerusalem, cilaka me kam! Ndigan kam banci bersih?