Read Batak Karo JEREMIA 14 Bible Online

JEREMIA 14 - Batak Karo bible

JEREMIA 14

¹Nina TUHAN kempak Jeremia kerna kelegon:

²“Ceda ate Juda kuta-kutana nandangi mate, rayatna ampar rate ceda i babo taneh. Jerusalem serko mindo penampat.

³Kalak bayak nuruh suruh-suruhenna ngelegi lau, lawes suruh-suruhen e ku sumur, tapi la lit jumpasa lau; bene ukurna, bene pengarapenna, itutupna ayona, mulih ia lume gucina.

⁴Erkiteken lalap la udan, e maka kerah kerina taneh. Kalak perjuma mesui pusuhna, itutupna ayona.

⁵Balua si mbaru nubis i bas mbalmbal pe, itadingkenna anakna, perban la lit dukut.

⁶Kelede si meliar tedis i datas uruk-uruk, mengkap-mengkap kesahna desken serigala; pengenehen matana enggo lanai mesinting perban la lit si man panganna.

⁷Serko bangsangKu man bangKu nina, ‘Aminna pe kesalahen-kesalahen kami nalahken kami, sue ras padanNdu, sampati min kami, o TUHAN. Enggo rusur Kam itundalken kami, erdosa kami man baNdu.

⁸Kam kap ngenca pengarapen Israel; Kam kap si mulahi kami i bas kiniseran nari. Engkai maka bali Kam ras pertandang i negeri kami? Engkai maka bali Kam ras kalak pertandang sada berngi ngenca tading i negeri enda?

⁹Engkai maka Kam bali ras kalak si enggo bene ukurna, desken tentera si la ergegeh lako nampati? O TUHAN, tentu Kam tetap ras kami, bangsaNdu kap kami, ola min kami tadingkenNdu.’ ”

¹⁰Nina TUHAN kerna bangsa enda, “Ngena kal atena kiam nadingken Aku. La ka ikuasaina man bana. E maka la kal meriah ateKu ibahanna. Kuinget salah-lepak si ibahanna e maka Kuukum ia erkiteken dosa-dosana.”

¹¹Nina TUHAN kempak aku, “Ola kam ertoto kerna bangsa enda man bangKu.

¹²Aminna pe ia puasa labo Kudengkehken sorana serko mindo penampat. Aminna pe ipersembahkenna persembahen tutungen ras persembahen pangan labo meriah ukurKu. Tapi Kukernepken ateKu ia alu perang, kelihen ras penakit.”

¹³Ningku, “O TUHAN si Erdolat, ietehNdu kap maka nabi-nabi ngataken man bangsa enda, maka erkiteken padanNdu, la lit perang, la lit kelihen, tapi dame ngenca i negeri enda.”

¹⁴Ngaloi TUHAN nina, “Nabi-nabi e erkata guak i bas gelarKu. La kap ia Kusuruh. La lit Kubereken perentah man bana. Sengkebabah ranan pe la lit Kukataken man bana. Pengidah si iturikenna labo i bas Aku nari rehna. Nubuat si iturikenna la kap tuhu, tapi awih-awih perukurenna saja ngenca.

¹⁵Aku TUHAN si ngerana man bandu, kerna kai si arus Kubahan man nabi-nabi si labo Kusuruh, tapi si ngeranai i bas gelarKu. Ikatakenna maka perang ras kelihen labo ngkenai negeri enda, Kukernepken me ia alu perang ras kelihen.

¹⁶Kalak si man bana enggo seh kata nabi-nabi enda iukum bali ras nabi si la Kusuruh ndai. Maitna iambengken ku dalan-dalan i Jerusalem, ise pe la lit si nanemkenca. Bagenda me si jadi man kerina kalak e, subuk man ndeharana, anakna si dilaki ras diberu. Kubahan maka ialokenna upah kejahatenna.”

¹⁷Iperentahken TUHAN man bangKu nuriken man bangsa e kerna ateku ceda, e maka ningku, “Iluhku mambur erdire-dire, suari ras berngi tangis ngandung kal aku, sabap luka bangsangku seh kal bagesna, ugahna lanai terpepalem.

¹⁸Kune ndarat aku ku mbalmbal, kuidah mait kalak si mate i bas perang. Kune aku lawes ku kuta-kuta, kuidah kalak mate lumben. Nabi-nabi ras imam-imam ndahiken dahinna, tapi la iangkana kai si ibahanna.”

¹⁹O TUHAN, enggo kin tuhu-tuhu kal Juda itulakNdu? Nembeh kal kin ateNdu kempak Sion? Engkai maka bage kal kelekna kami ilukaiNdu, luka si lanai banci malem? Idarami kami dame, tapi labo si mehuli jadi. Iarapken kami kejuah-juahen, tapi kebiaren si reh man kami.

²⁰O TUHAN, enggo kami erdosa man baNdu, iakuken kami dosa-dosa kami, bage pe dosa-dosa nini-nini kami.

²¹Ingetlah padanNdu ola kami ijurukenNdu. Ola ibahanNdu mela iakap Jerusalem, ingan Kursi KinirajanNdu si Mulia. Ola cedaken perpadanen si enggo ibahanNdu man kami.

²²Gana-gana bangsa-bangsa la sada pe ngasup mereken udan. Langit e pe la ngasup mereken udan. O TUHAN Dibata kami, itamaken kami pengarapen kami man baNdu, erkiteken Kam ngenca ngasup mereken si e kerina.