Read Batak Karo JEREMIA 18 Bible Online

JEREMIA 18 - Batak Karo bible

JEREMIA 18

¹Nina TUHAN kempak aku,

²“To ku rumah pande kudin. I jah kari Kubelasken katangKu man bandu.”

³E maka lawes aku ku jah janah i je kuidah pande kudin sangana erdahin i papan penggeningen.

⁴Kune kudin taneh la mehuli jadina, e maka ibuatna taneh dah e jenari ibahanna ka kudin si deban.

⁵Kenca bage nina TUHAN man bangku,

⁶“O kalak Israel, la kin banci Kubahan man bandu bali ras perbahanen pande kudin nandangi taneh dah? I bas tanKu bali kap kam ras taneh dah i bas tan pande kudin.

⁷Kune i bas sada paksa Kukataken maka ateKu ngeruah, ngeruntuhken ntah ngkerapken sada bangsa entah kerajan,

⁸tapi adi bangsa e ngasup nadingken kejahatenna, la Kusahunken kai si enggo Kukataken e.

⁹Arah dampar si deban, kune Kukataken maka ateKu nuan entah manteki sada bangsa entah kerajan,

¹⁰tapi dungna bangsa e la erkemalangen man bangKu dingen ilakokenna si jahat, erkusur perukurenKu maka la Kulakoken kai si enggo Kukataken e.

¹¹Genduari dage, katakenlah man kalak Juda, ras man kalak Jerusalem maka enggo seh paksana Aku ersura-sura ngelawan ia, dingen enggo ersikap mereken ukumen man bana. Kataken man bana gelah ia jera. Kataken man bana maka iobahna perbahanen ras lagu langkahna.

¹²Bagenda me jabapna, ‘Lang! Labo lit gunana e. Tetaplah kami mekeng janah jahat bagi ate-ate kami.’ ”

¹³Nina TUHAN, “Sungkun bangsa-bangsa kerina, ope si enda pernah kin jadi bagenda? Kalak Israel enggo erbahan perbahanen si mejin!

¹⁴Pernah kin ancuk-ancuk deleng Libanon si erbatu-batu la lit saljuna? Pernah kin kerah lau mbergeh si maler i deleng e nari?

¹⁵Tapi bangsangKu enggo ngelupaken Aku, itutungna kumenen man gana-gana. Tertuk-tuk ia i bas dalan si idalanina; la ia erdalan i bas dalan si adi, tapi enggo nilah ku dalan si la kendit.

¹⁶Ibahanna maka enggo mejin negeri enda, rasa lalap lanai lit ergana. Kerina kalak si mentas arah e ngeri ia ngidahsa, dingen ngupir ia.

¹⁷Kukencahken me bangsangKu i adep-adepen musuh-musuhna, desken abu si iembusken angin Timur, Kutundalken me ia, lanai ia Kusampati tupung reh kiniseran.”

¹⁸Kenca bage nina bangsa e, “Ota erpekat kita ngelawan Jeremia! Lit nge pagi lalap imam si ngaturken kita, kalak pentar ngajarken kita, dingen nabi si nehken kata Dibata. Ota sidarami salahna gelah silawan ia, jenari olanai sibegiken kai si ikatakenna.”

¹⁹E maka ertoto aku ningku, “O TUHAN dengkehken pertotonku, begiken kai si ikataken imbang-imbangku kerna aku.

²⁰Ibalas kin kebujuren alu kejahaten? Amin bage pe, lubang enggo ikalina gelah aku ndabuh ku bas. Ingetndu tupung aku reh mindo man baNdu simehuli guna ia, maka ola keke rawaNdu man bana.

²¹Tapi genduari O TUHAN, bahan maka mate lumben anak-anakna. Bahan maka mate ia i bas perang. Pelepas diberu-diberu kebenen perbulangen ras anak-anakna. Pelepas parang mbelin mate ibahan penakit, dingen anak perana mate i bas perang.

²²Suruh gerombolen ngerampuki rumahna. Ola lumbaken leben. Bahan maka serko ia i bas kebiaren. Enggo ikalina lubang maka aku gedap ku bas, enggo itogengna siding lako nangkap aku.

²³Tapi, O TUHAN, itehNdu kap kerina pertakinna lako munuh aku. Ola masapken kesalahenna, ola alemi dosana. Bahan maka ia guling iadep-adepenNdu, lakokenlah man bana tupung paksana Kam merawa.”