Read Batak Karo JEREMIA 20 Bible Online

JEREMIA 20 - Batak Karo bible

JEREMIA 20

¹Imam Pashur anak Immer, e me kap kepala i bas Rumah Pertoton. Tupung ibegina aku ngerana kerna perkara-perkara si enda ndai kerina,

²isuruhna kalak ngeligasi aku, jenari ipasungkenna aku i deher Pintu Gerbang Benyamin si arah datas i bas Rumah Pertoton.

³Pepagina kenca aku enggo itangtangi Pashur i bas pasungen nari ningku man bana, “Lanai Pashur gelarndu ibahan TUHAN. Tapi genduari gelarndu isambari jadi Kebiaren Arah Apai Pe.

⁴TUHAN jine si ngatakenca, ‘Kubahan maka mbiar kam man bandu dingen teman-temanndu pe mbiar ngenehen kam. Janah idahndu me ia kerina itampuli imbang-imbangna alu pedang. Kuendesken kerina kalak Juda kuteruh kuasa raja Babilon. Deba ibabana tertaban ku Babilon janah si deban itampulina alu pedang.

⁵Kupediat pe imbang-imbangna ngerampuki kerina erta-erta kuta enda, bage pe ibuatna sikerajangenna ras kebayakenna, rikut ras erta-erta raja pe, jenari iangkut ku Babilon.

⁶Kerna kam o Pashur, kam ras keluargandu itangkap jenari iangkut ku Babilon. I jah mate me kam, jenari ikuburken, ras kerina teman-temanndu si enggo pernah ibualindu.’ ”

⁷O TUHAN, enggo itipuNdu aku, e maka tertipu aku. Gegehen kap Kam asangken aku e maka enggo italukenNdu aku. Kerina kalak nokoh-nokohi aku, gedang-gedang wari iuru-uruna aku.

⁸Tep-tep ngerana, terpaksa aku serko ningku, “Kerina sigegeh gegeh, kerina ikernepken!” O TUHAN, erkiteken nehken kataNdu, gedang-gedang wari aku iuru-uru ras igombangi kalak.

⁹Tapi tupung kukataken, “Kulupakenlah TUHAN, lanai aku ngerana i bas gelar TUHAN,” e maka kataNdu desken api, si gurlah i bas pusuhku. Ngutkut i bas tulanku. Kucubaken sinik, tapi la tersinikken aku.

¹⁰Kubegi kerina kalak kusik-kusik, “Arah ja pa pe kebiaren! Ota siaduken ia man si erkuasa!” Temanku si ndeher kal pe itimaina pergulingku nina, “Entah mawen banci ia sitipu jenari sitangkap lako erbalas man bana.”

¹¹Tapi, O TUHAN, Kam kap ras aku. Kam kap gegehku, Kam kap si mbisangku. Kerina kalak si ngayak-ngayak aku la banci la guling. Lalap pagi mela iakapna. Perban la ia ngasup ngeligas aku, mela iakapna; rasa lalap la terlupakenca.

¹²O TUHAN si Mada Kuasa, Kam kap si nguji kalak alu bujur. IetehNdu kai si lit i bas pusuh ras ukurna. E maka bahan maka kuidah Kam erbalas nandangi imbang-imbangKu, sabap enggo kuendesken perkarangku ku bas tanNdu.

¹³Rendelah man TUHAN! Pujilah TUHAN! Ia kap si mulahi kalak si itindih i bas kuasa kalak jahat nari.

¹⁴Sumpahilah wari tubuhku! Olanai inget wari tupung nandengku mupus aku! [29†]

¹⁵Sumpahilah kalak si erbahan meriah iakap bapangku tupung isehkenna bana berita enda, “Dilaki! Enggo tubuh sada anakndu dilaki!”

¹⁶Balilah ia ras kuta-kuta enda, kuta si ikernepken TUHAN alu la alang-alangen. Erpagi-pagi ibeginalah sora nderkuh, ingan sora surak-surak perang,

¹⁷erkiteken la ibunuhna aku ope denga tubuh. Adi bage bertin nandengku kap min ndai jadi kuburenku.

¹⁸Engkai maka aku tubuh? Ngenanami kiniseran; ras si pagitna ngenca, engkeriken umur geluhku i bas kemelan?