Read Batak Karo JEREMIA 21 Bible Online

JEREMIA 21 - Batak Karo bible

JEREMIA 21

¹Sedekia, raja Juda nuruh Pashur anak si Malkia ras Imam Sepanya anak si Maaseya ndahi aku. Pemindonna man bangku arah kalak enda nina,

²“Pindoken sitik man TUHAN entah mawen banci ilakokenNa man banta tanda kuasa lako maksa gelah mundur Nebukadnesar, raja Babilon ras tenterana si sangana ngkepung kuta enda.” [30†]

³Kenca TUHAN enggo ngerana man bangku e maka kukataken man persuruhen e,

⁴gelah ikatakenna man Sedekia kata TUHAN, Dibata nu Israel, “O Sedekia, Aku jine si naluken kam ras tenterandu, si sangana erperang ngelawan raja Babilon ras tenterana. Kupegun-gun me senjata tenterandu i tengah kuta enda.

⁵Aku me si ngelawan kam alu gegehKu, alu nembehKu, alu rawa ras runtusKu.

⁶Asa si nggeluh i bas kuta enda Kubunuh me. Subuk manusia ras rubia-rubia mutus me kesahna erkiteken penakit si mejin.

⁷Tapi kam ras pegawai-pegawaindu si la mate ibahan perang, kelihen, ras penakit -- Kupediat kam itangkap Raja Nebukadnesar ras imbang-imbangndu si atena munuh kam. Nebukadnesar me si meltepken kesahndu. La ipulahina kam, la icidahkenna perkuah ate, la kam iampunina. Aku TUHAN kap si enggo melasken ranan enda.”

⁸Kenca bage ikataken TUHAN man bangku gelah kukataken man bangsa e, “Dengkehkenlah! Aku TUHAN, Kupepilihken dalan si man dalanenndu. Dalan kempak kegeluhen entah dalan kempak kematen.

⁹Ise si tading i bas kuta enda mate erkiteken perang, kelihen tah penakit. Tapi ise si lawes ngendesken bana man kalak Babilon si merang kuta enda, ia la ibunuh, si langlangna enggo ikelinina kesahna.

¹⁰Enggo Kutetapken i bas ukurKu, maka la Kupulahi kuta enda, tapi Kukernepken. Ibereken me ia man raja Babilon jenari icilukna radas ku taneh. Aku kap TUHAN si enggo melasken ranan enda.”

¹¹ [11-12] Isuruh TUHAN aku melasken kata enda man keluarga raja Juda kesusuren Daud: “Aku TUHAN, dengkehkenlah kai si Kukataken. Perdiatekenlah maka tep-tep wari ilakokenndu si bujur. Pulahilah kalak si kena tipu i bas penipu nari. Adi la bage perbahanenndu kejahaten si ibahanndu erbahan gurlah rawangKu desken api si gara si la ternimpeti nari.

¹³O Jerusalem, si ipanteki i babo baluren-baluren desken batu si pantek i babo taneh kendit. Tapi Aku kap si ngelawan kam. Iakapndu la lit ise pe si ngasup ngelawan kam entah ngerontasken pertahanenndu.

¹⁴Tapi Kuukum kam erkiteken perbahanenndu. Kuciluk me istanandu e maka ipan api me kasa kai si lit sekelewetndu. Aku TUHAN kap si enggo melasken kata enda.”