Read Batak Karo JEREMIA 22 Bible Online

JEREMIA 22 - Batak Karo bible

JEREMIA 22

¹ [1-2] Isuruh TUHAN aku lawes ku istana raja Juda, kesusuren Daud. I jah Kuturiken man raja, man pegawai-pegawaina ras kalak Jerusalem, gelah ibegikenna kai si ikataken TUHAN:

³“Aku kap TUHAN si merentahken kam erbahan bujur ras adil. Pulahi kalak si tertipu i bas penipunna nari. Ola tindih dingen ola bahan si la mehuli nandangi kalak pertandang, anak melumang ras diberu balu-balu. Ola amburken dareh kalak si la ersalah i bas negeri si badia enda.

⁴Adi tuhu-tuhu ikutkenndu bagi si Kukataken enda kesusuren Daud tetap ngerajai negeri enda. Radu ras pegawai-pegawaina, rayatna tetap banci mentasi pintun gerbang istana enda alu gereta kuda ras ngersak kuda.

⁵Tapi adi la ikutkenndu kai si Kuperentahken ersumpah Aku man bandu maka, runtuh me istana enda. Aku kap TUHAN si melasken kata enda. [31†]

⁶Man bangKu, keluarga Juda seri kap jilena ras negeri Gileat bage pe ras deleng-deleng Libanon. Tapi Kubahan maka ingan enda jadi melungen lanai lit i je kai pe nggeluh.

⁷Kusuruh kalak engkernepkenca. Ibabana kapak lako nabah batang kayu aras si mejilena jenari iambengken ku bas api.

⁸Kenca si e, kerina kalak si mentas arah e si sungkunen sapih-sapih ia ngkai maka Aku TUHAN ngelakoken perbahanen si bagenda nandangi kuta si mbelin enda.

⁹Jabapna e me erkiteken itundalkenndu perpadanendu ras Aku, Dibatandu, jenari nembah dingen erdahin kam man dibata-dibata si deban.”

¹⁰O kalak Juda ola tangisi Raja Josia; ola ceda atendu kerna kematenna. Tapi tangisilah anakna Joas, si enggo ibaba kalak lawes; lanai ia pernah mulih, lanai pernah idahna negeri inganna tubuh ndube.

¹¹Nina TUHAN kerna Joas anak Josia si nggancihken bapana jadi raja, “Ia enggo lawes i Juda nari janah ndigan pe lanai mulihken. [32†]

¹²Ia mate i bas negeri ku ja ia ibaba janah ndigan pe lanai pernah idahna negeri enda.”

¹³Cilakalah kalak si manteki rumahna alu kinilabujuren si nambahi bilikna alu kinilepaken si nuruh kalak erdahin la ngalo kai pe, alu la mereken upahna.

¹⁴Cilakalah kalak si ngataken, “Kupanteki me rumah mbelin man bangku, ruangna mbas dingen ertingkat.” Rumah e ipasangna jendelana, ilapisi alu kayu aras, icatna alu cat megara si mejile.

¹⁵Iakapndu kin kam banci jadi raja si mehuli kune ipantekindu istana alu kayu aras si mejile, jilen asangken rumah kalak si deban? Bapandu malem atena ras sangap kal ia nggeluh. Ia lalap bujur dingen adil perbahanenna. Kasa kai si idahikenna, jore kerina.

¹⁶Kalak musil iadilina alu bujur, e maka mehuli me sikerajangenna. Ma e kin ertina nandai Aku?

¹⁷Tapi kam, kepentingenndu ngenca idahndu, dareh kalak si la ersalah iamburkenndu, bangsandu itindihindu alu mesangat, Aku TUHAN kap si enggo melasken kata enda.

¹⁸Kenca bage ngerana TUHAN kerna Joyakim anak Josia, raja Juda, “La lit kalak si erceda ate kerna kematenna, la lit si ngataken, ‘Andiko teman! Andiko seninangku!’ La lit kalak nangisi ia, la lit kalak serko ngataken, ‘Andiko tuan! Andiko rajangku!’ [33†]

¹⁹Bali penanemken kalak ia ras nanemken kelede; isarenken kalak jenari iambengken arah pintu gerbang Jerusalem.

²⁰O kalak Jerusalem, to ku Libanon janah serko, laweslah ku Basan janah ngandung. Erlebuhlah i datas deleng Moap nari, perban kerina temanndu enggo italuken.

²¹Tupung kam i bas kesenangen denga ngerana TUHAN bandu, tapi la diatendu pe, bage me si ilakokenndu gedang-gedang geluhndu la pernah kam erkemalangen man TUHAN.

²²Peminpin-peminpinndu iembusken angin, teman-temanndu ibaba jadi tabanen perang. Kutandu lanai ermulia, tapi ijuruken, erkiteken kerina kejahaten si ibahanndu.

²³Tapi kam si tading i tengah-tengah batang aras si ibaba i Libanon nari; andiko kuahna ate man bandu tupung si mesui engkenai kam, bali suina iakapndu ras diberu sangana mupus.”

²⁴Nina TUHAN man Raja Joyakin anak Joyakim raja Juda, “Asa tuhu aku Dibata si nggeluh, aminna pe kam cincin setempel i bas tanKu si kemuhun, Kueldek me kam, [34†]

²⁵jenari kuendesken man kalak si nibiarindu, kalak si ersura-sura munuh kam. Kuendesken kam man Nebukadnesar, raja Babilon ras tenterana.

²⁶Kam ras nandendu Kupaksa ku bas pembuangen. Kubenterken kam ku negeri kalak, si la inganndu tubuh, janah i jah me kam duana mate.

²⁷Merincuh kal kam mulih ku negeri enda, tapi ndigan pe lanai kam pernah mulih.”

²⁸Ningku, “Bali kin Raja Joyakin ras guci si idampesken, si la ise pe merluken ia? Engkai maka ia ras anak-anakna iangkut ku pembuangen ku negeri si la itandaina?”

²⁹O negeri, negeri, negeri! Dengkehkenlah kai si ikataken TUHAN,

³⁰“Kalak enda iukum alu kebenen anak-anakna, ia jadi dilaki si la sangap. La lit si jadi kesusurenna, si nggancihken ia jadi raja Juda selaku kesusuren Daud Aku kap TUHAN si melasken kata enda.”