Read Batak Karo JEREMIA 23 Bible Online

JEREMIA 23 - Batak Karo bible

JEREMIA 23

¹Andiko ukumen si ibereken TUHAN man peminpin-peminpin si engkernepken, si ngencahken bangsaNa mesangat kal!

²Bagenda me nina TUHAN kerna peminpin-peminpin si mpermakani bangsaNa, “La kap ipermakanindu bangsangKu. Enggo ihuntakkenndu janah ipelawesndu ia. Genduari Kuukum ateKu kam erkiteken kejahaten si ibahanndu.

³BangsangKu si tading denga Kupepulung i bas negeri-negeri inganna enggo Kukerapken, jenari Kubaba mulih ku tanehna jine. Ertuah janah tambah-tambah beliganna.

⁴Kutangkuhken peminpin-peminpin si mpermakani ia. BangsangKu lanai mbiar dingen nggirgir janah lanai nari ia Kuukum. Aku kap TUHAN si enggo melasken kata enda.”

⁵Nina TUHAN, “Seh me paksana Kuangkat sekalak raja si bujur i bas kesusuren Daud nari, raja e merentah alu pentar janah ngelakoken si benar ras bujur i belang-belang negeri enda. [35†]

⁶Adi ia jadi raja, terkelin me kalak Juda, bangsa Israel nggeluh i bas dame. Ia igelari me pagi, ‘ TUHAN kap keselamatenta.’ ”

⁷Nina TUHAN, “Seh me paksana maka lanai kalak ersumpah i bas gelarKu alu ngataken, “Ibas gelar Dibata si nggeluh si maba Israel ndarat i negeri Mesir nari.”

⁸Tapi ersumpah ia i bas gelarKu, Dibata si nggeluh si maba kalak Israel ndarat i negeri Utara nari dingen i bas negeri-negeri si deban nari ku ja ia enggo Kukerapken. Jenari tading me ia i bas negerina jine.”

⁹Getem pusuhku, nggirgir aku. Erkiteken TUHAN dingen kataNa si Badia, aku desken kalak mabuk desken kalak si mbuesa minem anggur.

¹⁰Negeri enda dem alu kalak si la erkemalangen man TUHAN; jahat geluhna dingen gegehna pe isalah-gunakenna. Erkiteken isumpahina TUHAN, negeri enda enggo nderkuh, dingen mbalmbal enggo kerah.

¹¹Nina TUHAN, “Nabi-nabi ras imam-imam pe lanai erdibata; i bas Rumah PertotonKu pe Kutunduk ia erbahan jahat.

¹²Dalan si idalanina medalit dingen gelap; Kubahan me maka tertuktuk dingen guling ia. Kudabuhken me cilaka ku ia, paksa pengukumen man bana nandangi seh me. Aku TUHAN kap si enggo melasken kata enda.

¹³Tapi dosa nabi-nabi kalak Samaria enggo Kuidah, ngerana i bas gelar Baal, bangsangKu papak ibabaina.

¹⁴Tapi nabi-nabi Jerusalem maciken ka perbahanenna, erlua-lua janah la bujur perbahanenna, ipegegehina kalak erbahan salah, e maka la lit ise pe singolangi kalak erbahan jahat. Man bangKu, mejin kap ia kerina bali mejinna ras kalak Sodom ras Gomora.” [36†]

¹⁵E maka enda me kata TUHAN si Erdolat kerna nabi-nabi Jerusalem, “Kusuruh ipanna sinuan-sinuan si pagit racun Kubahan inemenna. Sabap erkiteken ia maka kerina kalak i belang-belang negeri enda lanai mbiar man Dibata.”

¹⁶Nina Dibata si Mada Kuasa man kalak Jerusalem, “Ola begiken kai si ikataken nabi-nabi e. Pengarapen si la tuhu kap iberekenna man bandu. Awih-awih perukurenna saja nge si iturikenna man bandu, labo kerna kai si Kukataken.

¹⁷Man kalak si la nggit megiken katangKu, ikatakenna maka si mehuli saja nge ngenca jadi man bana. Kempak kerina kalak si mersik ukurna ikatakenna maka la pernah jadi cilaka kempaksa.”

¹⁸Ningku, “La lit sekalak pe nabi-nabi e meteh perukuren TUHAN si terbuni. Sekalak pe labo pernah megi dingen ngantusi kataNa. La ibegikenna dingen la diatena pe kai si ikataken TUHAN.

¹⁹Rawa TUHAN angin kalinsungsung kap, angin kaba-kaba si ngamuk i babo takal kalak jahat,

²⁰janah e la peltep-peltep seh ngayak enggo dung ilakokenNa kerina si ateNa ilakokenNa. I bas paksa-paksa si reh enda iantusi bangsa enda me si e kerina.”

²¹Nina TUHAN, “Labo lit Kusuruh nabi-nabi enda, amin bage pe erdahin kang ia. Labo lit Kuturiken katangKu man bana, tapi ngerana ka nge ia i bas gelarKu.

²²Kune iantusina perukurenKu si terbuni, tentu enggo me min ndai iberitakenna katangKu man bangsangKu, janah enggo min ndai ingadiken bangsangku lagu langkah ras perbahanen sijahat.

²³Aku kap Dibata si ringan i ja pa pe, la bo ringan i bas sada ingan saja.

²⁴La lit kalak si banci cebuni gelah la Kuidah. La kin itehndu maka i japa pe Aku Kudemi Surga ras doni?

²⁵Kueteh maka nabi-nabi enda enggo erkata guak i bas gelarKu. Ikatakenna maka enggo Kuturiken katangKu i bas nipi-nipina.

²⁶Asa kai nari dekahna bangsangKu papak ibabai nabi-nabi enda alu ngataken kata si ibahan-bahanna?

²⁷Iakapna maka arah nipi-nipi si iturikenna erbahanca lupa bangsangKu kempak Aku, bali ras nini-ninina lupa man bangKu jenari erkusur nembah man Baal.

²⁸Nabi si ernipi arus maka ikatakenna e nipi ngenca, tapi nabi si megiken katangKu arus katakenna katangKu e alu tuhu. Kai gunana segal adi ibandingken ras beras?

²⁹KatangKu bali kap ras api dingen martel si mekpek batu seh getem.

³⁰Aku jadi imbang nabi-nabi si nangko ranan temanna tapi ikatakenna maka i bas Aku nari ranan e.

³¹Aku jadi imbang nabi si melasken katangku jine, tapi ikatakenna rehna i bas Aku nari.

³²Dengkehken kai si Kukataken, Aku TUHAN! Aku jadi imbang man nabi-nabi si nuriken nipi-nipina si guak kerina. Iturikenna nipi-nipina, janah ibabaina papak bangsangKu alu kata guak, dingen ranan megombang. Labo ia Kusuruh, labo ia Kuperentahken dingen labo ia erguna sitik pe man bangsa enda. Aku TUHAN kap si enggo melasken kata enda.”

³³Nina TUHAN man bangku, “O Jeremia, adi lit bangsangKu, entah nabi-nabi entah imam nungkun man bandu, ‘Kai kin kata TUHAN?’ Arus bagenda nindu ngaloisa, ‘Kam jadi baban kap man TUHAN, e maka iambengkenNa nge ateNa kam.’

³⁴Adi lit sekalak bangsangKu, entah nabi, entah imam, melasken kata: ‘baban TUHAN’, Kuukum me ia radu ras keluargana.

³⁵Tapi ise si nungkun man temanna entah man keluargana, ‘Kai jabap TUHAN? Kai si enggo ikataken TUHAN?’

³⁶E maka lanai banci ibelaskenna kata ‘baban TUHAN’, sabap kune lit si ngataken bage, Kubahan maka katangKu tuhu-tuhu jadi baban man bana. Bangsa e enggo iputar balikkenna kata Dibatana, Dibata si nggeluh, TUHAN si Mada Kuasa.

³⁷Jeremia sungkuni nabi-nabi e, nindu, ‘Kai jabap TUHAN man bandu? Kai nina TUHAN?’

³⁸Janah adi la ia patuh man perentahKu alu melasken kata, ‘baban TUHAN’ kataken man bana maka

³⁹la banci lang Kutangkap ia jenari Kuambengken i bas adep-adepenKu nari, subuk ia, bage pe kuta si enggo Kubereken man bana ras man nini-ninina.

⁴⁰Kubahan mela dingen juru iakapna, janah la terlupaken seh rasa lalap.”