Read Batak Karo JEREMIA 24 Bible Online

JEREMIA 24 - Batak Karo bible

JEREMIA 24

¹Icidahken TUHAN man bangku dua raga isin buah ara si iamparken i lebe-lebe Rumah Pertoton. (Si enda jadi kenca Nebukadnesar, raja Babilon enggo ngangkut Joyakin anak Joyakim raja Juda, jadi tabanen ku Babilon, rikut ras peminpin-peminpin, pande besi, bage pe kalak si beluh-beluh.) [37†]

²Raga si pemena isin buah ara si seh kal jilena, e me buah si tangtangna tasak. Raga si sada nari isina buah ara macik-macik dingen sitik pe la terpan.

³Nina TUHAN man bangku, “Kai si iidahndu, Jeremia?” Ningku ngaloisa, “Kuidah buah ara. Si mejile lanai tanggung jilena. Si macik seh kal macikna, maka sitik pe la terpan.”

⁴Kenca bage nina TUHAN man bangku,

⁵“Aku kap TUHAN Dibata Israel, kalak si enggo iangkut ku Babilon Kupeseri ras buah ras si mejilena janah Kuperdiateken ia alu kiniulin.

⁶Kujagai ia janah Kubaba ia mulih ku negeri enda. Kupanteki me ia dingen la Kuruntuhken. Kusuan me ia, la Kuruah.

⁷Kupeturah i bas pusuhna maka merincuh ia nandai Aku, maka Aku kap TUHAN. E maka ia kap jadi bangsangKu dingen Aku jadi Dibatana, sabap mulihken ia man bangKu alu bulat ukurna.

⁸Tapi bali ras buah ara si macik enda si sitik pe la terpan perbahan macikna, bage me perbahanenKu nandangi Sedekia raja Juda, rikut ras peminpin-peminpinna ras man kalak Jerusalem si debanna si tading i negeri enda entah pe si enggo miser ku Mesir.

⁹Kudabuhken man bana cilaka maka nggirgir kerina bangsa-bangsa babo doni enda. Kerina kalak nguru-ngurusa, kalak ngguro-guroken ia, nggombang-gombangi ia i bas ingan i ja ia enggo Kukerapken. Kerina bangsa-bangsa e make gelarna jadi sumpah.

¹⁰Kubereken man bana perang, kelihen, dingen penakit seh maka sada pe lanai lit tading i negeri enda si enggo Kubereken man bana ras man nini-ninina nai.”