Read Batak Karo JEREMIA 25 Bible Online

JEREMIA 25 - Batak Karo bible

JEREMIA 25

¹Kenca peempat tahunken Joyakim anak Josia jadi raja Juda kualoken kata i bas TUHAN nari kerna kalak Juda. (E me tahun si pemena Nebukadnesar jadi raja Babilon.) [38†]

²Ningku kempak kerina kalak Juda ras kalak Jerusalem,

³“Mulai i bas tahun si pesepuluh teluken Josia anak Amon enggo jadi raja Juda, dage enggo dua puluh telu tahun dekahna, seh wari enda, TUHAN enggo ngerana man bangku janah la pernah la kusehken e man bandu. Tapi diatendu pe lang.

⁴Aminna pe lalap iterusken TUHAN nuruh suruh-suruhenNa nabi-nabi man bandu, la idengkehkenndu, diatendu pe lang.

⁵Ikatakenna man bandu gelah itadingkenndu kegeluhen si jahat, bage pe kejahaten si ilakokenndu, gelah banci terus kam nggeluh i bas negeri si enggo ibereken TUHAN man bandu ras man nini-ninindu, jadi sikerajangenndu si tetap.

⁶IkatakenNa man bandu, maka ola kam nembah dingen erdahin man dibata-dibata si deban janah ola ibahanndu merawa TUHAN erkiteken nembah man gana-gana si nibahanndu. Adi erkemalangen kam man TUHAN e maka la kam iukumNa.

⁷Tapi TUHAN ngatakenca maka la kam nggit megiken Ia. Tapi ipekekendu rawaNa alu erbahan gana-ganandu dingen maba ukumen man bandu jine.

⁸E maka nina TUHAN si Erdolat, “Erkiteken la Aku ibegikenndu,

⁹Kusuruh bangsa i Utara nari dingen suruh-suruhenKu Nebukadnesar raja Babilon; Kubaba ia gelah iperangna Juda ras rayatna bage pe bangsa-bangsa sekelewetna. Bangsa enda ras bangsa sekelewetna Kukernepken me, jenari Kutadingken ia runtuh rasa lalap, Kubahan ngeri iakap kalak ngenenca, maka ia jadi saling-salingen kalak. Aku kap TUHAN si enggo melasken ranan enda.

¹⁰Kupengadi sora surak-surak si meriah, sora keriahen pesta nereh empo, lanai lit minak lampuna, la nai lit i je gandum. [39†]

¹¹Kerina negeri e enggo jadi bekas-bekas runtuh, janah jadi taneh melungen. Ia ras bangsa-bangsa sekelewetna pe jadi suruh-suruhen raja Babilon pitu puluh tahun dekahna. [40†]

¹²Kenca bage Kuukum Babilon ras rajana erkiteken dosa-dosana. Kukernepken kerina negeri e jenari Kutadingken jadi bekas-bekas runtuh rasa lalap.

¹³Kuukum Babilon alu cilaka, rikutken ukumen si enggo Kurencanaken man bangsa-bangsa bali ras si enggo Kukataken arah Jeremia. Kerina cilaka e enggo isuratken i bas kitap enda.

¹⁴Erbalas Aku man Babilon sue ras si ibahanna. Ia pe jadi suruh-suruhen bangsa-bangsa dingen suruh-suruhen raja-raja si mbelin.”

¹⁵ TUHAN Dibata Israel ngerana man bangku nina, “Enda calung anggur si isin alu rawangKu. Bereken e man bangsa-bangsa ku ja kam Kusuruh, jenari suruh inemna.

¹⁶Tupung inemna, mbewat-mbewat ia, janah bene ukurna, erkiteken perang si Kubereken ngelawan ia.”

¹⁷E maka kubuat calung e i bas tan TUHAN nari, kubereken man kerina bangsa-bangsa ku ja aku enggo isuruh TUHAN, dingen kubereken ia minem tare calung e.

¹⁸Jerusalem dingen kerina kuta-kuta Juda radu ras raja-raja dingen peminpin-peminpinna kerina ibere minem tare calung e. E maka jadi gurun pasir me kerina ingan e, sengget ras jengang kalak ngidahsa. Gelarna ipake kalak i bas sumpah -- seh ngayak wari enda.

¹⁹ [19-26] Enda me kerina kalak si deban si terpaksa minem tare calung e: Raja Mesir, pegawai-pegawaina ras peminpin-peminpinna, kerina kalak Mesir ras kalak pertandang si tading i Mesir. Kerina raja-raja negeri Us, kerina raja-raja Pilisti i kuta-kuta Askelon, Gasa, Ekron dingen kerina kalak si nggeluh denga i Asdot. Kerina kalak Edom, Moap ras Amon; kerina raja-raja Tirus ras Sidon, kerina raja-raja i negeri kepar Lawit Tengah. Kuta-kuta Dedan, Tema, ras Bus, kerina kalak sipangkas gendek bukna, kerina raja-raja Arab, kerina raja suku-suku i bas gurun pasir. Kerina raja-raja Simri, Elam, Media, kerina raja-raja i Utara nari, sada-sadai, subuk ndauh entah ndeher. Kerina bangsa i babo pertibi enda arus minem tare calung e. Si perpudina kal raja Babilon me si minem tare calung e.

²⁷Kenca bage nina TUHAN man bangku, “Kataken man bangsa e, maka Aku kap TUHAN Dibata nu Israel si merentahkenca gelah ia minem seh mabuk dingen mutah, ngayak guling lanai keke, erkiteken perang si Kubereken ngelawan ia.

²⁸Kune la ia nggit ngaloken calung e i bas tanndu nari janah minem taresa, kataken man bana maka TUHAN si Mada Kuasa si ngatakenca maka terpaksa ia minem taresa.

²⁹Kubenaken me erdahin encedai kutangKu jine. Iakapna kin maka la ia kena ukumen? La banci lang iukum me ia, sabap Kubereken perang ku kerina bangsa i babo pertibi enda. Aku TUHAN si Mada Kuasa kap si enggo melasken kata enda.”

³⁰Kam, o Jeremia, la banci la imomokenndu tep-tep kali si enggo Kukataken. Arus maka iturikenndu man bangsa enda. Erdengum me TUHAN i langit nari, erlenggur me Ia i datas langit si meganjangna nari. Erdengum me Ia ngelawan bangsaNa. Ersurak-surak me Ia desken sekalak si ngerik buah anggur. Kerina kalak i babo doni enda megisa.

³¹SoraNa erdengung seh ku tampuk doni enda. TUHAN erpekara ras bangsa-bangsa, kerina bangsa-bangsa iadukenNa, kerina kalak jahat ibunuhNa. TUHAN kap si melasken kata enda.”

³²Ikataken TUHAN si Erdolat maka reh me cilaka ngkenai bangsa-bangsa sada-sadai, angin meter reh i tampuk doni nari.

³³Tupung e pagi mait kalak si enggo ibunuh TUHAN, kencah i ujung doni nari ku ujungna si deban. La lit sekalak pe si erceda ate man bana, la lit si pepulungsa, la lit si ngkuburkenca. Amparen ia i babo taneh bali ras sampah-sampah si ergun-gun.

³⁴Serkolah, o kam peminpin-peminpin, o kam si mpermakani bangsangKu; serkolah megang! Erceda atelah dingen erguling-gulinglah i bas taneh; seh me paksana kam igeleh, igeleh desken biri-biri si mbur.

³⁵Lanai lit dalanndu pulah.

³⁶[36-37] I bas ceda ate ndehereng janah nderkuh me kam erkiteken rawa TUHAN engkernepken bangsandu dingen negerindu si dame jadi runtuh.

³⁸TUHAN enggo nadingken bangsaNa desken singa nadingken gua inganna cebuni. Perang si man kebiarenken dingen rawa TUHAN si gurlah enggo nalihken negeri e jadi gurun pasir.