Read Batak Karo JEREMIA 26 Bible Online

JEREMIA 26 - Batak Karo bible

JEREMIA 26

¹La ndekah kenca Joyakim anak Josia jadi raja Juda, [41†]

²nina TUHAN man bangku, “Tedis kam i kesain Rumah Pertoton jenari momokenlah kerina kata si Kuperentahken man kalak si reh i kuta-kuta Juda nari lako ersembah i je. Sengkebabah ranan pe ola lit tading.

³Banci jadi idengkehkenna jenari itadingkenna perbahanen si jahat. Kune bage perbahanenna, Kuobah ukurKu kerna sura-surangKu ngkernepken ia erkiteken kejahaten si ilakokenna.”

⁴Isuruh TUHAN aku melasken rananNa man bangsa enda: “Aku kap TUHAN, si enggo ngatakenca maka la banci la kam erkemalangen man bangKu alu ngikutken ajar si enggo Kuajarken man bandu.

⁵Arus iperdiatekenndu ranan suruh-suruhenKu, nabi-nabi si la erngadi-ngadi Kusuruh ku tengah-tengahndu. La pernah ikutkendu kai si ikatakenna.

⁶Adi tetap kam la megiken katangKu, Kulakoken me man Rumah Pertoton enda bagi si Kubahan man Silo, dingen kerina bangsa i babo doni enda make gelar kuta enda jadi sumpah.” [42†]

⁷Kerina kalak, nabi-nabi ras imam-imam si lit i bas Rumah Pertoton megisa kai si kukataken enda.

⁸E maka kenca aku enggo dung melasken ranan si enggo iperentahken TUHAN, minter aku itangkapna iherna serko-serko nina, “Terpaksa kam ibunuh erkiteken kai si ibelaskenndu e!

⁹Engkai maka ikatakenndu i bas gelar TUHAN, maka Rumah Pertoton enda jadi bali ras Silo, dingen kuta enda ikernepken janah sekalak pe lanai lit nggeluh i je?” Kenca bage iulung jelma si nterem e aku.

¹⁰Kenca peminpin-peminpin Juda megi kai si enggo jadi, reh ia kiam i bas istana raja nari ku bas Rumah Pertoton e, dingen ibuatna ingan arah Pintu Gerbang si Mbaru.

¹¹Nina imam-imam ras nabi-nabi e kempak bangsa e dingen kempak peminpin-peminpinna, “Kalak enda patut iukum rutang kesah erkiteken pengeranana ngelawan kutanta enda. Enggo ibegindu e alu cupingndu jine.”

¹²E maka ningku, “TUHAN kap si nuruh aku ngatakenca kerina si nibegindu kubelasken ngelawan Rumah Pertoton dingen kuta enda.

¹³Arus maka iobahndu pergeluh dingen perbahanenndu jenari la banci la kam erkemalangen man TUHAN Dibatandu. Adi bage perbahanenndu e maka iobahNa perukurenNa kerna pengeradas si ateNa idabuhkenNa man bandu.

¹⁴Tapi adi aku, lit kap i bas kuasandu! Lakokenlah kai si iakapndu payo ras bujur.

¹⁵Tapi si pasti e me: adi ibunuhndu aku, kam ras kalak si ringan i bas kuta enda erdosa munuh kalak si la ersalah, sabap TUHAN nge sinuruh aku mereken persinget enda man bandu.”

¹⁶E maka nina peminpin-peminpin ras bangsa e kempak imam ras nabi-nabi e, “Kalak enda ngerana man banta i bas gelar TUHAN Dibata; la kap oratna ia ibunuh.”

¹⁷Kenca bage piga-piga pertua bangsa e tedis jenari ikatakenna man kalak si pulung i je nina:

¹⁸“Tupung Hiskia jadi raja Juda Nabi Miha i Moreset nari ngerana man bangsa e maka TUHAN si Erdolat enggo melasken ranan enda nina, ‘Sion itenggalai bali ras juma, Jerusalem jadi pinugun batu runtuh, deleng Rumah Pertoton jadi kerangen.’ [43†]

¹⁹Raja Hiskia ras kalak Juda la munuh Miha. Tapi Hiskia malang man TUHAN jenari ipindona perkuah ateNa. E maka iobah TUHAN ukurNa kerna cilaka si ateNa idabuhkenNa man bangsa e. Genduari nandangi ndabuh me cilaka e man banta jine.” (

²⁰Kalak si deban si ngerana i bas gelar TUHAN ngelawan kuta ras bangsa e bali ras si ibahan Jeremia e me Uria anak si Semaya i Kiriat Jearim nari.

²¹Tupung Raja Joyakim ras tenterana dingen pegawai-pegawaina megi kai si ikataken Uria ibunuh raja atena ia. Tapi perbahan ibegi Uria sura-sura raja e, e maka mbiar kal ia, lompat ia ku Mesir.

²²Tapi isuruh Raja Joyakim si Elnatan anak Ahbor ras piga-piga kalak si deban ngelegi Uria ku Mesir.

²³Ibaba kalak ndai Uria mulih man Raja Joyakim. Ibunuhna Uria jenari ibenterkenna maitna ku kuburen rayat.)

²⁴Tapi erkiteken aku isampati Ahikam anak si Sapan, aku la iendesken man jelma si nterem gelah ibunuh.