Read Batak Karo JEREMIA 27 Bible Online

JEREMIA 27 - Batak Karo bible

JEREMIA 27

¹Kenca Sedekia anak Josia jadi raja Juda, reh kata TUHAN man bangku, [44†]

²gelah kubahan sada pasangen ras tinalina, maka kutamaken ku kudukku.

³Kenca bage isuruh TUHAN aku nehken kataNa man raja Edom, Moap, Amon, Tirus ras Sidon, arah persuruhen si enggo reh ku Jerusalem njumpai Sedekia.

⁴TUHAN si Mada Kuasa, Dibata nu Israel nuruh aku merentahken persuruhen-persuruhen e gelah ipesehna man rajana kata si ikataken TUHAN nina,

⁵“Alu gegeh ras kuasangKu enggo Kutepa doni, manusia ras kerina rubia-rubia si nggeluh i je, jenari Kubereken man kalak si Kupilih.

⁶Aku kap si namaken kerina bangsa-bangsa enda i teruh kuasa suruh-suruhenKu, Raja Nebukadnesar i Babilon nari. Rubia-rubia si meliar pe Kutetapken gelah erdahin guna ia.

⁷Kerina bangsa-bangsa erdahin guna ia, bage pe guna anakna, terus ku kempuna ngadi-ngadi seh paksana bangsana runtuh. Kenca bage maka bangsana erdahin guna bangsa-bangsa si megegeh dingen raja-raja si mbelin.

⁸Tapi adi lit bangsa entah kerajan la nggit nembah dingen nareken kudukna ngaloken pasangen i bas raja Babil, bangsa si bage Kuukum salu perang, kelihen dingen penakit, seh ngayak Kupediat Nebukadnesar ngkernepkenca seh keri.

⁹Ola begiken nabi-nabindu ntah kalak si ngataken maka itehna wari si pepagi, subuk e arah nipi entah alu ngelebuh begu-begu kalak mate entah alu ertendung, si ngataken maka ola kam nggit talu iteruh raja Babilon.

¹⁰Itipuna nge kam, dingen ibahanna kam iangkut ndauh i bas negerindu nari. Kupelawes me kam dingen ikernepken me kam.

¹¹Tapi adi lit bangsa si nggit nembah man raja Babilon janah erdahin guna ia, e maka Kupediat ia tading i bas negerina jine, nuan-nuan dingen nggeluh i je. Aku kap TUHAN si enggo melasken ranan enda.”

¹²Kata enda pe kupeseh man Sedekia raja Juda ningku, “Nembahlah man raja Babil. Erdahinlah guna ia ras rayatna maka kam nggeluh.

¹³Pangen kin kam ras rayatndu mate i bas perang, kelihen dingen penakit? Enda kap si ikataken TUHAN kerna bangsa-bangsa si la nggit talu iteruh kuasa raja Babilon.

¹⁴Ola begiken nabi-nabi si nuruh kam gelah ola talu iteruh kuasana. Itipuna nge kam.

¹⁵TUHAN jine kap si ngatakenca maka nabi-nabi e labo persuruhenNa, dingen ibualina nge kam i bas gelar TUHAN. E maka ipelawesNa me kam jenari ibunuhNa, kam ras nabi-nabi perguak e.”

¹⁶E maka kukataken kata TUHAN man imam-imam dingen bangsa e ningku, “Ola dengkehken nabi-nabi si ngataken maka ugas-ugas Rumah Pertoton lanai ndekahsa ibaba nge i Babilon nari. Ibualina nge kam.

¹⁷Ola dengkehken ia! Talulah iteruh kuasa raja Babilon e maka nggeluh! Madin kin iakapndu kuta enda jadi runtuh?

¹⁸Adi payo kin ia nabi dingen lit kin katangKu i bas ia, suruh dage sungkunina Aku TUHAN si Mada Kuasa, maka la Kubere ugas-ugas si tading denga i Rumah Pertoton, i bas istana raja dingen i Jerusalem iangkut ku Babilon. (

¹⁹[19-20] Tupung Raja Nebukadnesar ngangkut Joyakin anak Joyakim raja Juda dingen peminpin-peminpin Juda ras Jerusalem ku Babilon ugas-ugas si la ikut ibabana e me: binangun Rumah Pertoton, tong tembaga, gereta-gereta, ras piga-piga erta-erta Rumah Pertoton.)

²¹Begiken kai si Kukataken, Aku TUHAN si Mada Kuasa Dibata nu Israel, kerna ugas-ugas si tading denga i bas Rumah Pertoton ras i bas istana raja i Jerusalem:

²²ibaba me kerina ku Babilon janah tading i je seh ia Kuperdiateken ka. Kenca bage Kubaba ia mulih janah Kuulihken ku bas ingan enda. Aku TUHAN kap si enggo melasken kata enda.”