Read Batak Karo JEREMIA 28 Bible Online

JEREMIA 28 - Batak Karo bible

JEREMIA 28

¹I bas tahun si e ka, bulan si pelimaken, tahun peempatken pemerentahen Raja Sedekia sekalak nabi i kuta Gibeon nari gelarna Hanania anak Assur, ngerana man bangku i bas Rumah Pertoton. I adep-adepen imam-imam ras jelma si nterem, ikataken Hanania man bangku, [45†]

²maka TUHAN si Mada Kuasa Dibata nu Israel, enggo melasken kata enda nina, “Kuasa raja Babilon enggo Kuperperken.

³I bas dua tahun enda Kubaba me mulihken ku ingan enda kerina ugas-ugas Rumah Pertoton si enggo iangkut Raja Nebukadnesar ku Babilon.

⁴Raja Juda, Joyakin anak Joyakim, radu ras kalak Juda si enggo ibuang ku Babilon, Kubaba mulih. Tuhu Kuperperken me kuasa raja Babilon. Aku TUHAN kap si enggo melasken ranan enda!”

⁵Kenca bage iadep-adepen imam ras kerina kalak si tedis i bas Rumah Pertoton e kukataken man Hanania ningku,

⁶“Merandal! Kuarap TUHAN ngelakoken bagi si ikatakenndu e. Aku pe kuarapken kal payo isi nubuatndu e, janah kerina ugas-ugas Rumah Pertoton ras kerina bangsa e si enggo iangkut ku Babilon jadi tabanen ibaba min mulih.

⁷Tapi dengkehken kai si kukataken man bandu ras man kalak si nterem enda.

⁸Nabi-nabi si ernubuat nai ope denga kam ras aku, enggo ernubuat kerna perang, kelihen ras penakit si engkenai bangsa-bangsa dingen raja-raja si erkuasa.

⁹Tapi nabi si ernubuat kerna dame, ia iakui nabi tuhu-tuhu si isuruh TUHAN adi si inubuatkenna e tuhu jadi.”

¹⁰Kenca bage ibuat Hanania pasangen si i bas kudukku ipenggelkenna seh meripuk;

¹¹jenari ikatakenna i adep-adepen jelma si nterem nina, “Enggo ikataken TUHAN maka bagenda me pengeripukkenNa pasangen si enggo itamaken Raja Nebukadnesar ku babo kuduk bangsa-bangsa janah si enda ilakokenNa ope dua tahun nari.” Kenca ikatakenna si e lawes aku.

¹²Piga-piga dekah kenca si e TUHAN nuruh aku

¹³lawes ngataken man Hanania bagenda, “Ikataken TUHAN maka pasangen kayu ngasup kam merperkenca tapi igantikenNa alu pasangen besi.

¹⁴TUHAN si Mada Kuasa, Dibata nu Israel ngatakenca maka itamakenNa bangsa-bangsa jadi budak raja Babilon, Nebukadnesar. Ikataken TUHAN maka rubia-rubia si meliar pe ibahanNa nembah man Nebukadnesar.”

¹⁵Kenca bage kukataken tole man Hanania, “Begiken Hanania! Kam labo persuruhen TUHAN janah ibabaindu bangsa enda tek man si la tuhu.

¹⁶Dage TUHAN jine ngatakenca maka iambengkenNa me ateNa kam. Ope keri tahun enda, enggo kam mate, sabap enggo iajuk-ajukndu bangsa enda berontak ngelawan TUHAN.”

¹⁷E maka mate Hanania i bas bulan pepituken i bas tahun si e ka.