Read Batak Karo JEREMIA 29 Bible Online

JEREMIA 29 - Batak Karo bible

JEREMIA 29

¹Kutulis enda surat man imam-imam, nabi-nabi, peminpin-peminpin bangsa e, dingen man kerina kalak si enggo iangkut Nebukadnesar ku Babilon i Jerusalem nari jadi tabanen. [46†]

²Surat e kutulis kenca Raja Joyakin iangkut ku pembuangen rikut ras nandena, pegawai istana, peminpin-peminpin Juda ras Jerusalem, tukang-tukang ras pande si debanna.

³Surat e kubereken man Elasah anak Sapan ras man Gemaria anak si Hilkia. Kalak enda duana isuruh Raja Sedekia njumpai Nebukadnesar ku Babilon. Bagenda ningku i bas surat e:

⁴“TUHAN si Mada Kuasa Dibata nu Israel ngataken man kerina kalak si enggo isuruhNa iangkut tertaban ku Babilon i Jerusalem nari:

⁵‘Pajekkenlah rumah janah tetaplah kam ringan i je. Suanilah peken jenari pan ulihna.

⁶Erjabulah kam dingen mupuslah. Kenca bage pejabu ka anakndu maka ia pe mupus ka. Arus maka ertambah-tambah beliganndu labo erkurangna.

⁷Erdahinlah guna kiniulin kuta-kuta ku ja kam enggo Kubuang jadi tabanen. Ertotolah guna keperlun kuta e sabap adi sikap ia kam pe ikut sikap.

⁸Aku TUHAN Dibata nu Israel mpersingeti kam, ola pelepasndu dirindu itipu nabi-nabi si lit i tengah-tengahndu entah kalak si deban si penipu, si ngatakenca maka banci ia ernubuat kerna wari-wari si pepagi. Ola perdiateken nipi-nipina!

⁹I bas gelarKu ikatakenna si la tuhu. Labo ia Kusuruh. Aku TUHAN kap si enggo melasken kata enda.’

¹⁰Kenca bage nina TUHAN, ‘Adi enggo genep pitu puluh tahun kam i Babilon, Kuperdiateken me kam dingen padanKu pe Kusehken, maka Kubaba kam mulih ku tanehndu. [47†]

¹¹Aku ngenca meteh sura-surangKu nandangi kam, e me gelah kam senang labo gelah cilaka. RencanangKu e me mereken wari si pepagi bagi si iarapkenndu.

¹²I je erlebuh me kam kempak Aku. Reh kam ndahi Aku dingen ertoto, janah Kualoi kam.

¹³Idaramindu Aku janah jumpaindu Aku, erkiteken alu bulat ukurndu idaramindu Aku. [48†]

¹⁴Tuhu, katangKu, ijumpaindu me Aku dingen Kubaba me kam mulih i bas pembuangen nari. Kupepulung me kam i bas kerina negeri dingen i bas kerina ingan nari i je kam enggo Kukerapken. Jenari Kubaba me kam mulih ku negerindu i jenari kam ibuang. Aku TUHAN kap si enggo melasken kata enda.’

¹⁵Ikatakenndu maka enggo ibereken TUHAN nabi-nabi man bandu i Babilon.

¹⁶Dengkehkenlah kai nina TUHAN kerna raja si merentah kerajan si panteki Daud nai ras kerina kalak si tading i bas kuta e, e me senina-seninanndu si la ikut iangkut jadi tabanen raduken kam.

¹⁷Nina TUHAN si Erdolat, ‘Kubaba man bana perang, kelihen ras penakit. Jenari Kubahan ia bali ras buah ara si la terpan perbahan macikna.

¹⁸Kuelis-elis ia salu perang, kelihen dingen penakit. E maka kerina bangsa-bangsa i doni enda ngeri iakapna ngenehenca. Ku belang-belang doni enda Kuhuntakken ia. Kerina kalak sengget dingen nggirgir erkiteken kai si jadi man bana. Kerina kalak nguru-nguru ia dingen gelarna ipake kalak i bas sumpah.

¹⁹Si enda jadi man bana sabap la ia patuh man katangKu si la erngadi-ngadi Kupeseh man bana arah nabi-nabi persuruhenKu. La ia nggit megikenca.

²⁰O kam kerina si enggo Kusuruh iangkut ku Babilon, dengkehkenlah Aku, TUHAN si melasken kata enda.’

²¹ TUHAN si Erdolat, Dibata nu Israel enggo melasken kata kerna Ahap anak si Kelaya dingen Sedekia anak si Maaseya, si enggo ngerana i bas gelarKu alu kata la tuhu. IkatakenNa maka iendeskenna ia duana ku bas kuasa Nebukadnesar, raja Babilon, si munuh ia i lebe-lebe matandu.

²²Adi kalak si iangkut jadi tabanen i Jerusalem nari ku Babilon isumpahina atena kalak bagenda nina, ‘Jadilah man bandu ibahan TUHAN bali ras man Sedekia ras Ahap si itutung raja Babilon geluh-geluhen!’

²³Bagenda me jadina man bana erkiteken salah dosana si mejin -- erlua-lua ia, jenari ibelaskenna kata la tuhu i bas gelar TUHAN. E ngelawan peraten TUHAN kap. Idah TUHAN kap kai si ibahan kalak enda janah Ia saksina ngelawanca. TUHAN kap si enggo melasken kata enda.”

²⁴ [24-25] TUHAN si Mada Kuasa Dibata nu Israel peseh kataNa man bangku kerna Semaya anak kuta Nehelam, si enggo ngirim surat i bas gelarna jine man kalak Jerusalem dingen man Imam Sepanya anak Maaseya dingen man kerina imam-imam si deban. I bas surat e nina Semaya man Sepanya:

²⁶“TUHAN kap si enggo nangkuhken kam jadi imam nggancihken Joyada, kam kap genduari kepala i bas Rumah Pertoton. Tugasndu kap maka kerina kalak adon si pekulah-kulah jadi nabi arus iiket salu rante besi i kerahungna.

²⁷Engkai dage maka la bage perbahanenndu kempak Jeremia kalak Anatot si enggo ngerana selaku nabi man bangsa e?

²⁸Arus ia ipengadi ngerana sabap enggo ikatakenna man kami si i Babilon maka ndekah denga nge kami jadi tabanen i jenda, e maka arus ipajekken kami rumah janah tetap kami tading i jenda, isuani kami peken dingen man buahna.”

²⁹Iogeken Sepanya surat e man bangku.

³⁰Jenari isuruh TUHAN aku

³¹[31-32] nenahken kataNa man kerina kalak si tertaban i Babilon kerna Semaya nina, “Aku kap TUHAN, Kuukum me Semaya ras kerina sinursurna. Labo ia persuruhenKu tapi ngerana ia bandu tempa-tempa ia sekalak nabi jenari ibabaina kam tek man kata la tuhu. Masap me sinursurna i tengah-tengahndu nari. Lanai idahna perkara-perkara si mehuli si ateKu Kulakoken man bangsangKu, sabap iajukna bangsangKu ngelawan Aku. Aku TUHAN kap si enggo melasken kata enda.”