Read Batak Karo JEREMIA 3 Bible Online

JEREMIA 3 - Batak Karo bible

JEREMIA 3

¹Nina TUHAN, “Adi sekalak dilaki ngulihken ndeharana, jenari itadingken ndeharana ndai ia jenari sereh ka ia man dilaki si deban, lanai bo nggit perbulangenna si pemena ndube ngempoisa ka mulihi. Si e mahanca negeri e keliamen. Tapi kam o Israel, enggo nterem kal teman-temanndu dilaki. Genduari, mulihken ka kin atendu man bangKu?

²Tataplah ku das uruk-uruk. Ma enggo kerina uruk-uruk e ibahanndu jadi inganndu erlua-lua? Itimaindu dilaki-dilaki e i tepi dalan, bali ras kalak Arab nggempangi kalak gurun pasir. Enggo iliamindu negeri enda alu erlua-lua.

³E me sabapna maka udan la ipesusur, janah tupung merdang pe la nusur udan ku jumandu. Amin perlangkahndu bali ras perlua-lua, tapi la kam meteh mela.

⁴Genduari nindu man bangKu, ‘Kam kap bapangku si erkeleng ate man bangku, mulai kin kitik-kitikku nari.

⁵Labo kap rasa lalap ateNdu nembeh kempak aku, labo lalap ateNdu la erteman ras aku.’ Bage me nindu man bangKu, o Israel, tapi ipekerindu kal asa ngasupndu erbahan si jahat.”

⁶Nina TUHAN tupung Josia jadi raja, “Enggo idahndu kai si ilakoken Israel, diberu si la patuh e? Itundalkenna Aku, e maka i babo tep-tep uruk-uruk ras i teruh tep-tep batang kayu galang seri perbahanenna ras sekalak diberu si pencarinna erlua-lua. [3†]

⁷Kuakap kin maka mulihken nge ia bangKu kenca ilakokenna kerina si e, tapi lang kepe; janah Juda, e me agi diberu si ngelandih e, enggo ngidah kerina si e.

⁸Juda ngidah pe maka Aku enggo nulak Israel, janah kupelawes ia erkiteken itundalkenna Aku, jenari jadi diberu perlua-lua ia. Tapi Juda, agi Israel si ngelandih e, la mbiar ngidah si e. Ia pe ikut ka jadi perlua-lua,

⁹dingen la iakapna mela pe. Ikaruskenna negeri enda dingen erlua-lua alu nembah man batu-batu ras batang-batang kayu galang.

¹⁰I babo si e kerina Juda si ngelandih e, e me agi Israel, pekulah-kulah ngenca ia mulihken man bangKu, labo alu ate tutus. Aku TUHAN kap si ngerana.”

¹¹Nina TUHAN man bangku maka aminna pe Israel enggo nadingken Ia, enggo icidahkenna maka bujuren ia asangken Juda si ngelandih e.

¹²IsuruhNa aku lawes ngataken man Israel, “O Israel si ngelandih, mulihkenlah man bangKu, Aku perkuah dingen labo kam Kurawai rasa lalap.

¹³Si penting gelah enggo ietehndu lepakndu, maka kam erpekat ngelawan Aku, TUHAN Dibatandu. Akuken maka iteruh tep-tep batang kayu galang enggo iberekenndu kekelengenndu man dibata-dibata si deban janah la ipatuhindu perentahKu. Aku TUHAN si ngerana.”

¹⁴“Mulihkenlah, o bangsa si la setia, si kerajangenKu kam kap. Kubuat kam sekalak i bas tep-tep kuta nari, dingen dua kalak i bas tep-tep terpuk; jenari Kubaba kam mulih ku Sion.

¹⁵Aku merekenca man bandu peminpin si erkemalangen man bangKu, jenari ia si minpin kam alu kepentaren dingen pengertin.

¹⁶Gelah kenca kam nterem dingen meriah i bas negeri enda lanai icakapken kalak kerna Peti perpadanenKu. Lanai ia rukur dingen lanai iingetna Peti e, lanai ia perlu pe dingen lanai ibahanna pe si deban.

¹⁷Kenca enggo seh paksana, ikataken kalak maka Jerusalem kap “Kursi Kinirajan TUHAN”, janah kerina bangsa pulung ku je nembah man bangKu. Lanai iikutkenna perukurenna si mersik dingen jahat.

¹⁸Israel erteman ras Juda dingen ras-ras ia mulih i taneh pembuangen i Utara nari ku negeri si enggo Kubereken man nini-ninindu jadi si kerajangenna rasa lalap.”

¹⁹Nina TUHAN, “O Israel, ateKu Kualoken kam jadi anakKu, Kubereken ateKu negeri si seh kal ulina, e me negeri si mejilena i babo doni enda kerina. AteKu maka erbapa kam man bangKu, jenari ndigan pe ola nari itundalkenndu Aku.

²⁰Tapi bali ras sekalak ndehara si la setia, bage me kam la setia man bangKu. Aku, TUHAN kap si ngerana.”

²¹I datas uruk-uruk terbegi sora megang. Kalak Israel nderkuh mindo penampat, erkiteken enggo ipilihna dalan si mbengkuk, itundalkenna TUHAN Dibatana.

²²Mulihlah, o kam kerina kalak si enggo papak, Aku si pepalem kam dingen mahanca kam setia. Nindu, “Ue reh kami ndahi TUHAN, sabap ia kap Dibata kami.

²³Lanai kami mindo penampat man gana-gana i datas uruk-uruk.

²⁴Tapi nembah kami man Baal dibata-dibata si njuruken e erbahanca enggo bene kerina rarasen si ipermakani kami, bage pe anak-anak kami si dilaki ras si diberu. Kerina upah latih nini-nini kami si nai-nai pe bene kerina.

²⁵E maka arus kita ampar perbahan melana, jenari si pediat si erbahanca siakap mela e namburi kita. Kita ras nini-nininta gelgel erdosa nandangi TUHAN Dibatanta, la pernah si ikutken perentahNa.”