Read Batak Karo JEREMIA 30 Bible Online

JEREMIA 30 - Batak Karo bible

JEREMIA 30

¹Bagenda nina TUHAN Dibata nu Israel man bangku,

²“Suratken i bas sada kitap kerina si enggo Kukataken man bandu.

³Seh me paksana bangsangKu Israel ras Juda iulihken bagi si ndube. Kubaba me ia mulih ku negeri si enggo Kubereken man nini-ninina janah jadi pusakana e mulihken. Aku TUHAN kap si enggo melasken kata enda.”

⁴Nina TUHAN kempak kalak Israel ras Juda,

⁵“Enggo Kubegi sora serko kebiaren. Sora serko perbahan gentar, labo perbahan dame.

⁶Genduari sungkunlah dingen ukurkenlah! Banci kin dilaki mupus? Engkai maka Kuidah kerina kalak mecek beltek bali ras diberu si sangana mupus? Engkai maka mbulan ayo kalak kerina?

⁷Enggo seh paksana seh me wari si mejin wari-wari si apai pe la terpeseri rassa, sada paksa keguluten man bangsangKu, tapi nggeluh nge ia.”

⁸Nina TUHAN si Mada Kuasa, “Adi enggo seh warina, Kupenggelken me pasangen si i bas kuduk bangsa e janah Kutangtangi rante-rante si ngiket ia. E maka lanai ia jadi budak bangsa si deban.

⁹Tapi isembahna Aku TUHAN Dibatana, janah sekalak i bas kesusuren Daud nari Kutangkuhken jadi raja.

¹⁰Ola mbiar o bangsangKu, o kalak Israel, ola kam gentar. Kupulahi me kam i bas negeri si ndauh e nari, i bas negeri inganndu tertaban nari. Mulih me kam ku kutandu, janah dame kam i je teneng me kam la ise pe erbahanca kam mbiar. [49†]

¹¹Aku ras kam, janah Kukelini me kam. Negeri-negeri inganndu Kukerapken Kukernepken me. Tapi kam lang. Ugapa pe Kuukum nge kam tapi adi Kuukum kam bujur nge ukumen si Kubereken. Aku, TUHAN kap si enggo melasken kata enda.”

¹²Nina TUHAN man bangsaNa, “Lukandu seh kal kelekna ugahndu la terpepalem.

¹³Lanai lit kalak si pekena-kena kam, lanai lit tambar man barehndu, lanai lit arapen banci kam malem.

¹⁴Kerina si rate ngena man bandu enggo ngelupaken kam, lanai kam diatena pe. Enggo Kulawan kam desken sada musuh; ukumen man bandu mberat, erkiteken dosandu mbue dingen kejahatenndu pe mbelin.

¹⁵Olanai kam jungut-jungut kerna ugahndu, lanai lit tambar man bandu. Bagenda pengukumKu man bandu erkiteken dosandu si mbue dingen kejahatenndu si mbelin.

¹⁶Tapi genduari kerina si nelen kam itelen me, kerina imbang-imbangndu iangkut jadi tabanen. Kerina kalak si nindih kam itindih me, dingen kerina kalak si ngerampuk kam irampuk me.

¹⁷Aminna pe musuh-musuhndu ngataken, ‘Sion enggo terbuang la lit si mperdiatekenca.’ Tapi Aku kap si pepalem kam Aku si nambari lukandu Aku TUHAN kap si enggo melasken kata enda.”

¹⁸Nina TUHAN, “Kubaba me mulih bangsangKu ku negerina, mekuah ateKu kempak kerina keluargana. Jerusalem ipanteki ka i bas inganna, dingen istanana pe ipekena.

¹⁹Kalak si ringan i je ngendeken ende-ende pujin, meriah me sorana ersurak. Erkiteken pemasu-masunKu ertuah me ia, pasu-pasungKu mereken kemulian man bana.

²⁰Kuulihken gegeh bangsa enda bagi si nai-nai e maka paguh ka ia mulihi. Kerina kalak si nindih ia Kuukum.

²¹ [21-22] Si merentah ia reh i bas bangsana nari jine rajana i bas ia nari idahina Aku adi Kudilo ia, sabap ise kin pang ndeheri Aku adi la Kudilo? BangsangKu kap ia, Aku kap jadi Dibatana. Aku TUHAN kap si enggo melasken kata enda.”

²³ [23-24] Rawa TUHAN angin kaba-kaba kap, angin si erpiu-piu nderpa takal kalak jahat. Angin e la ngadi erpiu ndahiken dahinna, adi langa seh sura-surana. Kedungenna pagi tangkas me e kerina man bangsaNa.