Read Batak Karo JEREMIA 31 Bible Online

JEREMIA 31 - Batak Karo bible

JEREMIA 31

¹Nina TUHAN, “Seh me paksana maka Aku me jadi Dibata man kerina suku-suku Israel janah ia me jadi bangsangKu.

²I bas padang gurun enggo Kucidahken diringKu man kerina kalak si pulah i bas pedang nari. Tupung kalak Israel merincuh ngadi,

³Kucidahken diringKu man bana i bas ingan si ndauh nari. O kalak Israel, keleng kap ateKu kam gelgel nari, e maka tetap nge Kucidahken man bandu perkuah ateKu.

⁴Kupanteki ka me kam sekali nari. Ibuatndu ka me gendangndu jenari landek-landek alu meriah.

⁵Isuanindu ka mulihi peken anggurndu i uruk-uruk Samaria. Kerina kalak si nuanca ipanna me ulih buah anggurna.

⁶Tuhu seh me paksana kalak si erjaga erlebuh i datas deleng Eperaim nari nina, ‘Ota kita nangkeng ku Sion, ndahi TUHAN Dibatanta.’ ”

⁷Nina TUHAN, “Rende ersuraklah erkiteken Israel, Ia si mbisana i bas kerina bangsa-bangsa. Endekenlah ende-enden pujinndu, nindu, ‘ TUHAN enggo mulahi bangsaNa ikeliniNa kerina si tading.’

⁸Kubaba ia i Utara nari, Kupepulung ia i tampuk doni nari. Kalak pentang ras cempang-cempang ikut ras ia, diberu si mehuli kulana bage pe si nandangi mupus. Mulihken ia jadi bangsa si mbelin.

⁹Tupung Kubaba bangsangKu mulih, ngandung ia iherna ertoto Kubabai ia ku lau maler arah dalan si mejile maka la ia tertuktuk. Aku desken sekalak bapa man Israel, dingen Eperaim anakKu sintua.”

¹⁰Nina ka TUHAN tole, “O bangsa-bangsa dengkehkenlah, beritakenlah katangKu ku tepi lawit si ndauh. Kukerapken bangsangKu, tapi Kupepulung ka mulihken. Kukawali ia desken permakan engkawali rarasenna.

¹¹Enggo Kutebusi bangsa Israel, i bas bangsa si gegehen asangken ia, enggo Kukelini ia.

¹²Reh me ia kerina dingen rende ersurak i Deleng Sion. Senang iakapna ngenanami pemerengKu, Kubereken man bana gandum, anggur ras minak saitun, rarasen biri-biri ras lembu. Ia desken peken si la kurang lau kai pe atena lit.

¹³Singuda-nguda landek-landek dingen malem kal atena. Dilaki, anak perana ras parang mbelin senang iakapna kerina. Kuapuli ia jenari Kusalihken kecedan atena jadi keriahen, kepiceten jadi kesenangen.

¹⁴Imam-imam Kubesuri alu si entabeh bangsangKu ndatken kerina keperlunna. Aku TUHAN kap si melasken kata enda.”

¹⁵Nina TUHAN, “Terbegi sora i Rama nari, sora tangis si meriso. Itangisi Rahel anakna, enggo bene kal kerina, e maka iapuli pe atena lang. [50†]

¹⁶Olanai kam ngandung, apusi iluhndu. Kerina si ibahanndu man anak-anakndu labo sia-sia; mulih me ia kerina i negeri musuh nari.

¹⁷Lit kap pengarapen man Israel, anak-anakndu mulih me, Aku, TUHAN kap si enggo melasken kata enda.

¹⁸Kubegi kalak Israel ngandung nina: ‘O TUHAN, bali kap kami ras rubia-rubia si la iasuhi, tapi iajarkenNdu kami gelah patuh. Baba min kami mulih; kami enggo sikap mulih ku Kam, perban Kam, TUHAN Dibata kami.

¹⁹Itadingken kami Kam, tapi enggo kami merincuh mulih. Kenca iukumNdu kami tungkuk kami rate ceda. Mela dingen juru iakap kami, erkiteken dosa si ibahan kami tupung kami nguda denga.’

²⁰O Israel, anak kesayangenKu, buah barangKu si keleng ateKu. Tep-tep Kusingetken gelarndu, Kuinget kam i bas keleng ate; i bas kam lalap ukurKu, mekuah kal ateKu.

²¹Pajekkenlah tanda-tanda i bas pasarndu, payo-payo perdiateken dalanndu si bentasindu ndube. O kalak Israel mulihlah, mulihlah ku kuta-kuta si enggo itadingkenndu.

²²Asa kai nari dekahna la tetap ukurndu, o bangsa si la setia? Enggo kutepa piga-piga perkara si mbaru dingen la bagi biasa, bagi sekalak diberu ngkawali dilaki.”

²³Nina TUHAN si Mada Kuasa, Dibata nu Israel, “Kenca Kubaba pagi bangsa e mulih ku negerina, ikatakenna ka me pagi i bas negeri Juda ras i bas kuta-kutana nina, ‘Dibatalah si masu-masu deleng Jerusalem si badia, ingan si badia inganNa tading.’

²⁴Juda ras kuta-kutana iingani me pagi mulihi. Lit me pagi i je perjuma, bage pe permakan ras biri-birina.

²⁵Kalak si enggo latih Kupegegehi, kalak si enggo kote perban melihe Kubesuri alu nakan.

²⁶E maka nina bangsa e, ‘Lawes aku medem, janah kenca medak senang dagingku.’

²⁷Aku TUHAN kap si ngatakenca maka seh me paksana maka bagi benih Kuamburken manusia ras asuh-asuhen ku negeri Israel ras Juda.

²⁸Bali ras tupung Aku ngeruah, ngeruntuhken, ngerontasken, ngeradasken dingen ngkernepken bangsa e, bage ka me Kusuan ia mulih dingen Kupanteki ka.

²⁹Adi paksa si e enggo seh, lanai bagenda nina bangsa e: Orang tua man buah anggur matah, ngilu ipen anak-anak. [51†]

³⁰Tapi, ise si man buah anggur matah, ipenna jine nge ngilu. Janah kerina kalak mate erkiteken dosana jine.”

³¹Nina TUHAN, “Seh me paksana Aku erbahan perpadanen si mbaru ras kalak Israel ras Juda. [52†] [53†]

³²perpadanen si mbaru e la bali ras perpadanen si ndekah si Kubahan ras nini-ninina tupung Kucikep tanna dingen Kubaba ndarat i Mesir nari. Aminna pe Aku bali ras perbulangenna, tapi la icikepna perpadanen e.

³³perpadanen si mbaru si ateKu Kubahan ras bangsa Israel bagenda me: Kutamaken undang-undangKu ku bas ukurna dingen Kusuratken e i bas pusuhna. Aku jadi Dibatana ia jadi bangsangKu. [54†]

³⁴La lit perlu kalak ngajari temanna sebangsa guna nandai TUHAN, sabap kerina kalak nandai Aku, menaken i bas si kitikna nari terus kempak si mbelinna. Kualemi kerina dosa-dosana dingen kerina salahna lanai Kuinget. Aku TUHAN kap si enggo melasken kata enda.” [55†]

³⁵ TUHAN mereken matawari guna nerangi suari si mereken bulan ras bintang-bintang nerangi berngi. IgawerNa lau lawit maka ergeruhguh. Gelarna e me: TUHAN si Mada Kuasa.

³⁶Erpadan Ia maka kidekah aturen enda tetap rasa lalap, bage me Israel tetap jadi sada bangsa i lebe-lebengKu.

³⁷Bali ras langit la tersibari, palas doni enda pe la terdalani, bage me Ia la nulak bangsa Israel erkiteken dosa-dosana. TUHAN kap si enggo melasken kata enda.

³⁸Nina TUHAN, “Seh me paksana maka Jerusalem ipanteki mulihi jadi kutangKu. Menaken i menara Hananel nari terus kempak pintun gerbang Suki-suki.

³⁹Baleng e terus i jenari ku kenjahe kempak uruk Garep, jenari mbeluk ku Goa.

⁴⁰Kerina baluren si enggo jadi pendawanen ras ingan pembuangen sampah bage pe kerina juma-juma i babo lau anak Kidron terus kempak Pintu Gerbang Kuda arah matawari pultak, e jadi ingan si badia man bangKu. Kuta e ndigan pe lanai iruntuhken entah iradasken.”