Read Batak Karo JEREMIA 32 Bible Online

JEREMIA 32 - Batak Karo bible

JEREMIA 32

¹I bas tahun pesepuluh teluken Sedekia jadi raja Juda, e me pesepuluh waluh tahunken Nebukadnesar jadi raja Babilon, ngerana TUHAN man bangku. [56†]

²I bas paksa si e tentera raja Babilon sangana nerang Jerusalem janah aku sangana itutup i bas kesain pengawal istana kerajan.

³Raja Sedekia nutup aku dingen nuduh aku kerna kata Dibata si enggo kubelasken, “Kupelepas me kuta enda italuken raja Babilon.

⁴Janah Raja Sedekia pe la pulah. Iendesken me ia ku bas tan raja Babilon. Jumpa ia pedempak ayo dingen ngerana sebabah.

⁵Sedekia iangkut ku Babilon, dingen i jah me ia tading seh ngayak Aku mperdiateken ia. Aminna pe ilawanna bangsa Babilon tapi labo lit untungna man bana. Aku TUHAN kap si enggo melasken ranan enda.”

⁶Nina TUHAN man bangku,

⁷“Seninandu Hanamel anak Salom senina bapandu, reh me mindo gelah itukurndu jumana si i Anatot i bas daerah Benyamin, sabap kam me kade-kadena si ndeherna dingen lit hakndu nukur taneh e man gunandu.”

⁸E maka sue ras kata TUHAN, reh Hanamel ndahi aku ku kesain e janah mindo gelah kutukur juma e. Arah e kueteh maka TUHAN tuhu-tuhu enggo ngerana man bangku.

⁹Kutukur taneh e i bas Hanamel nari jenari kutimbang duit man galarna. Ergana sepuluh pitu duit pirak.

¹⁰Kuteken dingen kutama matere surat perpadanen e i adep-adepen saksi, jenari kutimbang duitna alu timbangen.

¹¹E maka kubuat duana surat jual beli e subuk si isegel si isina e me kerna kontrak ras kecibal juma e, bage pe si la isegel,

¹²jenari kubereken man Baruh anak si Neria kempu si Mahsea. Kubereken e man bana e lebe-lebe Hanamel ras saksi-saksi si ikut neken surat perpadanen jual beli e dingen i lebe-lebe kalak si sangana kundul i kesain e.

¹³I lebe-lebena kerina, ningku kempak Baruh,

¹⁴“TUHAN si Mada Kuasa, Dibata nu Israel enggo nuruh kam muat surat-surat e, subuk surat si isegel bagepe si la isegel, jenari namakenca ku bas sada guci taneh dah, gelah banci isimpan guna tahun-tahun si reh.

¹⁵TUHAN si Mada Kuasa Dibata nu Israel enggo ngatakenca maka rumah, juma dingen peken anggur pe itukur ka i bas negeri enda.”

¹⁶Kenca enggo kubereken surat perpadanen jual beli ndai man Baruh ertoto aku ningku,

¹⁷“O TUHAN si Erdolat, Kam kap si enggo njadiken langit ras doni alu gegeh dingen kuasaNdu. La kap lit si metahat man baNdu.

¹⁸Enggo icidahkenNdu keleng ateNdu si tetap man meribu-ribu kalak, tapi iukumNdu ka kalak erkiteken dosa orang tuana. Kam kap Dibata si mbelin dingen erkuasa; gelarNdu TUHAN si Mada Kuasa.

¹⁹IbahanNdu rencana-rencana si mbelin janah ilakokenNdu perkara-perkara si mbisa. IdahNdu kai pe si ilakoken kalak dingen erbalas Kam rikutken perbahanenna.

²⁰Nai enggo ilakokenNdu tanda kuasa dingen tanda sengget i Mesir dingen iteruskenNdu ngelakokenca ngayak wari enda, subuk i Israel bage pe i tengah-tengah kerina bangsa-bangsa. E maka i ja pe itandai kalak nge Kam.

²¹Alu erbahan tanda-tanda sengget si erbahanca gentar musuh kami, ipakeNdu gegeh kuasaNdu maba bangsa Israel ndarat i Mesir nari.

²²IberekenNdu man bana taneh si mehuli dingen mehumur sue ras perpadanenNdu man nini-ninina.

²³Tapi tupung ia seh ku bas negeri e dingen enggo ibuatna e jadi sikerajangenna la ikutkenna perentahNdu, ntah nggeluh sue ras ajarenNdu. Sada pe la ilakokenna kai si isuruhNdu, e maka idabuhkenNdu kecedan man bana.

²⁴Kalak Babilon enggo erbahan benteng pengepungen kelewet guna ngerebut kuta enda janah iperangna. Perang, kelihen dingen penakit erbahanca kuta e ndabuh ku bas kuasana. Banci kap inenNdu, maka kerina si enggo ikatakenNdu enggo tuhu jadi.

²⁵Amin bage pe, O TUHAN si Erdolat, Kam kap si enggo nuruh aku nukur juma e i adep-adepen saksi, aminna pe ietehNdu maka kuta e nandangi ikuasai kalak Babilon.”

²⁶Kenca bage nina TUHAN man bangku,

²⁷“Aku kap TUHAN, Dibata kerina manusia. La kap lit si metahat i bas Aku.

²⁸Kubereken ateKu kuta enda man Nebukadnesar raja Babilon, ras man serdaduna. Ikuasaina me kuta enda, [57†]

²⁹jenari icilukna. Itutungna kuta enda jadi abu bage pe rumah si enggo erbahanca nembeh ateKu, perbahan itutungina kumenen man Baal i datas tarum rumah e, dingen icurcurkenna lau anggur jadi persembahen man dibata-dibata si deban.

³⁰I bas bena-benana nari kin sejarah kalak Israel ras Juda enggo nembeh ateKu ibahanna dingen merawa ateKu erkiteken kai si ilakokenna.

³¹Kalak si tading i bas kuta enda enggo nembeh ateKu ibahanna janah ipekekena rawangKu menaken kin i bas mantekisa nari. Enggo Kuputusken maka Kukernepken ateKu kuta enda.

³²Erkiteken perbahanen si jahat si enggo ilakoken kalak Juda ras Jerusalem, radu ras raja-rajana, peminpin-peminpinna, imam-imam ras nabi-nabina.

³³Ipudikenna Aku, aminna pe tetap ia Kuajari, la ia nggit erlajar dingen la ibegikenna.

³⁴Itamakenna gana-gana si ciga ateKu i bas Rumah Pertoton si enggo ipajekken man inganKu isembah dingen iliamina ingan e. [58†]

³⁵Ipajekkenna batar-batar man Baal i Baluren Hinnom, i je ipersembahkenna anakna dilaki ras diberu man Dewa Moloh. Labo ia Kusuruh ngelakoken si e dingen la pernah pe lit i bas ukurKu maka ilakokenna si bage jenari gelah erdosa kalak Juda.” [59†]

³⁶Nina TUHAN Dibata nu Israel man bangku, “O Jeremia, ikataken bangsa e maka perang, kelihen dingen penakit si mahanca kuta e ndabuh ku bas kuasa raja Babilon. Genduari dengkehken tole kai si Kukataken.

³⁷Kupepulung ateKu bangsa enda i negeri-negeri inganna enggo Kukerapken erkiteken nembeh ateKu dingen rawangKu si gara, jenari Kubaba ia mulih ku ingan enda dingen Kupelepas ia nggeluh i je alu dame.

³⁸E maka ia jadi bangsangKu dingen Aku jadi Dibatana.

³⁹Kubereken man bana sada perayaken i bas geluhna e me: enghamati Aku i bas kerina paksa, guna kiniulinna dingen kiniulin sinursurna.

⁴⁰Kubahan sada perpadanen si tetap ras ia. Lanai pernah Aku ngadi erbahan si mehuli man bana, dingen Kubahan maka erkemalangen ia man bangKu alu bulat ukurna. Alu bage lanai ndigan pe Aku itadingkenna.

⁴¹Senang Kuakap ngelakoken si mehuli man bana dingen Kutetapken maka tetap ia tading i bas negeri enda.

⁴²Bali ras cilaka si enggo Kudabuhken ku bangsa enda, bage me ateKu mereken si mehuli man bana sue ras si enggo Kupadanken.

⁴³Ikataken bangsa e maka negeri enda bali me pagi ras gurun pasir si la iingani manusia entah pe rubia-rubia, janah nandangi ibereken me man kalak Babilon. Tapi itukuri ka me pagi mulihi juma i negeri enda.

⁴⁴Itukur kalak juma e jenari itekenna surat perpadanenna, isegel, janah idilo saksi-saksi. Si enda jadi i daerah Benyamin, i bas kuta sekelewet Jerusalem, i bas kuta-kuta Juda ture-ture uruk negeri e, i berneh-berneh, dingen arah Selatan Juda. Kuulihken me bangsa enda ku negerina jine. Aku TUHAN kap si enggo melasken kata enda.”