Read Batak Karo JEREMIA 33 Bible Online

JEREMIA 33 - Batak Karo bible

JEREMIA 33

¹Tupung aku ipenjaraken denga i bas kesain pengawal istana e, reh ka kata TUHAN man bangku,

²TUHAN si enggo njadiken dingen nepa doni enda janah encibalkenca i bas inganna. Ia kap si ngerana man bangku. Ia, si gelarna e me kap TUHAN ngataken,

³“Lebuhlah Aku e maka Kualoi kam. Kuturiken ateKu man bandu perkara-perkara si mbelin si la terantusindu.

⁴[4-5] Aku kap TUHAN Dibata nu Israel ngataken maka kerina rumah i Jerusalem dingen istana kerajan Juda iruntuhken me. Sia-sia saja kam lawes erperang ngelawan benteng-benteng si enggo ipajekken kalak Babilon. Si e erbahanca kuta enda dem alu bangke-bangke kalak si Kugudam alu pernembeh dingen rawangKu si gara. Enggo Kutundalken kuta enda erkiteken kejahaten-kejahaten si enggo ilakoken kalak si i je.

⁶Tapi Aku si nambari kuta ras rayatna dingen Kubereken mulihi man bana kejuah-juahen. Kucidahken man bana dame la teralang ras ketenengen.

⁷Kubahan maka makmur me Juda ras Israel. Jenari Kupanteki mulihi bali ras si nai.

⁸Kubersihken ia i bas dosa-dosana nari si enggo ilakokenna kempak Aku. Kualemi me dosa-dosa dingen pemberontakenna.

⁹Jerusalem jadi ulu keriahen, kehamaten, kemegahen man bangKu. Kerina bangsa i bas pertibi enda mbiar janah nggirgir tupung ibegina si mehuli si Kubahan man kalak Jerusalem janah ngidah kemakmuren si Kubereken man kuta e.”

¹⁰Nina TUHAN, “Ikataken bangsa e maka ingan enda enggo lanai bali ras gurun pasir janah lit i je nggeluh manusia ntah rubia-rubia. Payo kap katana e; kuta-kuta Juda ras dalan-dalan i Jerusalem enggo lume. La lit manusia ntah rubia-rubia nggeluh i je. Tapi i bas ingan enda ibegindu ka

¹¹sora surak-surak si meriah, dingen sora keriahen kerja erdemu bayu. Ibegindu sora rende tupung ia maba persembahen pengataken bujur ku bas Rumah PertotonKu nina, ‘Kataken bujur man TUHAN si Mada Kuasa sabap mehuli kal Ia dingen tetap asa lalap keleng ateNa.’ Aku si erbahanca maka mehumur negeri enda bali ras si nai. Aku TUHAN kap si melasken kata enda.” [60†]

¹²Nina TUHAN si Mada Kuasa, “I bas negeri si bali ras gurun pasir enda i ja la lit manusia ras rubia-rubia nggeluh, jadi ka me ia mbalmbal si meratah man ingan permakan mpermakani biri-birina.

¹³I bas kuta-kuta i datas uruk-uruk, ture deleng, i Selatan Juda, i bas daerah Benyamin, i bas kuta-kuta i sekelewet Jerusalem, dingen i bas kuta-kuta Juda, ibeligai permakan me mulihi biri-birina. Aku TUHAN kap si enggo melasken ranan enda.”

¹⁴Nina TUHAN, “Seh me paksana Aku nehken padanKu man kalak Israel ras Juda. [61†]

¹⁵Tupung e pagi Kuangkat sekalak raja si bujur i bas kesusuren Daud nari. Raja e bujur dingen adil perbahanenna i belang-belang negeri enda.

¹⁶Kalak Juda ras Jerusalem ipulahi me jenari nggeluh me ia i bas dame. Kuta e pagi igelari kalak: ‘ TUHAN kap si Engkelini kita’.

¹⁷Aku TUHAN kap si erpadan maka tetap pagi kesusuren Daud jadi raja Israel, [62†]

¹⁸dingen suku Lewi jadi imam si ngelai Aku dingen mereken persembahen tutungen, persembahen pangan, dingen persembahen gelehen man bangKu.” [63†]

¹⁹Nina TUHAN man bangku,

²⁰“Enggo Kubahan perpadanen ras suari bage pe berngi maka tetap ia reh i bas paksana. Janah ndigan pe perpadanen e la banci ceda.

²¹Bage ka nge Kubahan perpadanen ras suruh-suruhenKu Daud. Tetap nge lit kesusurenna jadi raja. Enggo Kubahan perpadanen ras imam i bas suku Lewi nari maka ia tetap si ngelai Aku, janah asa ndigan pe perpadanen e la banci ceda.

²²Ertambah-tambah me lalap beligan kesusuren suruh-suruhenKu Daud ras beligan imam-imam i bas suku Lewi nari. Seh maka lanai terbeligai, bali ras bintang-bintang i langit dingen kersik i tepi lawit pe la terbeligai.”

²³Nina TUHAN man bangku,

²⁴“La kin iperdiatekenndu kai si ikataken kalak e? Ikatakenna maka enggo Kutulak Israel ras Juda dua keluarga si enggo Kupilih. Alu bage megombang ia man bangsangKu janah lanai ikirana bagi sada bangsa.

²⁵Tapi Aku kap TUHAN si enggo erpadan ras berngi ras suari, janah enggo Kubahan undang-undang si ngatur doni ras langit.

²⁶Bagi pastina Kulakoken si e, bage me penjagangKu perpadanenKu ras kesusuren Jakup dingen suruh-suruhenKu Daud. Kupilih sekalak i bas kesusuren Daud nari si jadi raja i bas kesusuren Abraham, Isak ras Jakup. Mekuah ateKu ngenehen bangsangKu e maka Kubahan maka senang ka akapna mulihi.”