Read Batak Karo JEREMIA 34 Bible Online

JEREMIA 34 - Batak Karo bible

JEREMIA 34

¹Nina TUHAN man bangku tupung Raja Nebukadnesar ras tenterana i Babilon nari bage pe tenterana kerina, tentera bangsa-bangsa dingen bangsa-bangsa si enggo i teruh kuasana, sangana nerang Jerusalem ras kuta-kuta si ndeher rassa. [64†]

²TUHAN Dibata nu Israel ngataken man bangku maka aku lawes ngataken man Sedekia raja Juda, “Aku TUHAN, Kuendesken me kuta enda man raja Babilon jenari icilukna me.

³Kam labo pulah. Kam itangkap jenari iendesken man bana. Jumpa kam pedempak ayo dingen ngerana sababah ras ia; e maka kam ibaba ku Babilon.

⁴O Sedekia, dengkehkenlah kai si Kukataken e. Labo kam mate i bas perang.

⁵Kam mate alu dame; bali ras kalak nutung kumenen man nini-ninindu e me raja-raja si arah lebendu, bage me pe kam, itutungna nge kumenen man bandu. Itangisina kam nina: ‘Enggo mate rajanta’ Aku TUHAN kap si enggo melasken kata enda.”

⁶Kenca bage kupeseh kata enda ndai man Raja Sedekia i Jerusalem.

⁷Tupung e tentera raja Babilon sangana nerang kuta e. Lakis ras Aseka pe iserangna. Kuta si dua e nari ngenca kuta si tading erbenteng i Juda.

⁸Raja Sedekia ras kalak Jerusalem enggo erbahan sada perpadanen mbebasken

⁹budak-budakna kalak Heber, subuk dilaki entah diberu gelah olanai lit kalak Heber iperbudak seninana kalak Heber.

¹⁰Kerina bangsa e ras peminpin-peminpinna enggo ersada arihna mbebasken budakna, dingen lanai ndigan pe iperbudakna. Tuhu ibebaskenna budak-budak e,

¹¹tapi dungna erkusur ka ukurna, ibuatna ka budak e jenari ipaksana gelah jadi budak ka.

¹²Kenca bage TUHAN,

¹³Dibata nu Israel nuruh aku ngataken kata enda man bangsa e, “Enggo Kubahan perpadanen ras nini-ninindu, tupung Kupulahi ia i Mesir nari dingen tupung Kubebasken ia i bas perbudaken nari. Kukataken man bana,

¹⁴maka tep-tep pitu tahun sekali arus ibebaskenna kerina budak Heber si enggo erdahin enem tahun man bana. Tapi nini-ninindu la diatena Aku, la ibegikenna katangKu. [65†]

¹⁵Piga-piga wari si enggo lepas enggo ikusurndu ukurndu jenari idahikenndu bagi si ngena ateKu. Kerina kam enggo ersada arihndu mbebasken seninandu bangsa Israel si jadi budak, ibahanndu pe perpadanen i adep-adepenKu i bas Rumah Pertoton ingan Aku isembah.

¹⁶Tapi dungna erkusur ka ukurndu janah ihinandu Aku. Ibuatndu ka mulihi budak-budak si enggo ibebaskenndu bagi sura-surana. Ipaksandu ka ia jadi budak mulihi.

¹⁷E maka, Aku TUHAN ngatakenca maka kam la erkemalangen man bangKu. La iberekenndu kebebasen man seninandu kalak Israel. Merandal. Genduari Kubereken man bandu kebebasen, e me: kebebasen lako mate i bas perang, penakit ras kelihen. Kubahan maka ngeri iakap kerina bangsa i doni enda ngidah si Kubahan man bandu.

¹⁸[18-19] Pegawai-pegawai Juda ras Jerusalem radu ras pegawai istana, imam-imam dingen kerina peminpin-peminpinna enggo erbahan sada perpadanen ras Aku alu erdalan arah kelang-kelang dua ngkeret lembu si enggo ibelah duakenna. Tapi enggo icedakenna perpadanen e dingen la icikepna padanna. E maka Kulakoken man bana bagi perbahanenna nandangi lembu e.

²⁰Kuendesken ia kempak musuh-musuhna si munuh ia atena, janah perik ras rubia-rubia si meliar mangani maitna.

²¹Sedekia raja Juda ras pegawaina pe kuendesken man kalak si atena munuhsa. Kuendesken ia man tentera Babilon si enggo ngadi nerang kam.

²²Kuperentahken maka mulih ia ku kuta enda e. Iperangna, ikuasaina jenari icilukna kuta enda e. Kubahan maka kuta-kuta Juda bali ras gurun pasir seh maka la lit sekalak pe nggeluh i je. Aku TUHAN kap si enggo melasken kata enda.”