Read Batak Karo JEREMIA 35 Bible Online

JEREMIA 35 - Batak Karo bible

JEREMIA 35

¹Tupung Joyakim anak Josia jadi raja Juda, ngerana TUHAN man bangku nina, [66†]

²“To dahi terpuk Rehab dingen ngerana rassa. Kenca bage baba ia ku sada bilik i bas Rumah Pertoton jenari bereken ia minem anggur.”

³E maka kubaba terpuk Rehab ku bas Rumah Pertoton -- gelarna e me Jaasama anak Jeremia si deban, e me anak Habasinia, dingen kerina anak-anak ras senina-seninana.

⁴Jenari kubaba ia bengket ku bas Rumah Pertoton. Kubaba ia kempak bilik ajar-ajar Nabi Hanan anak Igdalia. Bilik e inganna i datas ruangen Maaseya anak Salum, sekalak si penting i bas Rumah Pertoton janah ndeher ras bilik pegawai-pegawai si deban.

⁵Kenca bage kuampeken calung-calung ras guci-guci si dem lau anggur i lebe-lebe kalak Rehab, jenari ningku, “Inemlah anggur enda.”

⁶Tapi nina njabapsa, “Kami la minem anggur. Nini-nini kami Jonadap anak Rehab ngataken man kami, maka kami ras kesusuren kami asa lalap la banci minem anggur.

⁷Ikatakenna maka kami la banci majekken rumah pe, la banci erjuma i bas negeri enda dingen labo banci nuan entah nukur peken anggur. Iperentahkenna maka tetap kami nggeluh i bas kemah-kemah, gelah kami banci nggeluh ndekah i bas negeri enda desken kalak pertandang.

⁸Kerina perentah Jonadap enggo ikutken kami. Kami la pernah minem anggur, subuk ndehara kami, bagepe anak-anak kami si dilaki entah si diberu.

⁹[9-10] La ipajekken kami rumah man ingan kami tading -- kami nggeluh i bas kemah-kemah -- la lit peken anggur kami, la lit juma kami, la lit gandum kami. Kerina si iperentahken nini-nini kami Jonadap ipatuhi.

¹¹Tapi tupung Raja Nebukadnesar nerang negeri enda, iputusken kami lawes ku Jerusalem, lompat i bas kalak Babilon dingen kalak Siria nari. E me sabapna maka kami tading i Jerusalem enda.”

¹² [12-13] Kenca bage TUHAN si Mada Kuasa Dibata nu Israel nuruh aku lawes ngatakenca man kalak Juda ras Jerusalem, “Aku TUHAN nungkun man bandu. Engkai maka la kam nggit megiken Aku janah patuh man perentahKu?

¹⁴Kesusuren Jonadap, enggo patuh nandangi kai si iperentahken, gelah ola ia minem anggur, dingen seh kal ku bas wari enda la inemna. Tapi la erngadi-ngadi Kusehken katangKu man bandu, tapi la ikutkenndu.

¹⁵La erngadi-ngadi Kusuruh, suruh-suruhenKu ku tengah-tengahndu janah enggo ikatakenna man bandu gelah itadingkenndu dalan geluhndu si jahat jenari gelah ilakoken kai si bujur. Enggo ipersingetina kam gelah ola nembah ras ngelai dibata-dibata si deban, gelah kam banci tetap nggeluh i bas negeri si enggo Kubereken man bandu ras man nini-ninindu. Tapi la ibegikenndu, dingen diatendu pe Aku lang.

¹⁶Kesusuren Jonadap matuhi perentah nini-ninina, tapi kam la erkemalangen kempak Aku.

¹⁷E maka genduari Aku TUHAN si Mada Kuasa, Dibata nu Israel, Kudabuhken me ku babo Juda ras Jerusalem kerina cilaka si enggo Kupadanken. Si e Kubahan erkiteken la ibegikenndu rananKu la kam ngaloi tupung Kulebuh.”

¹⁸Kenca bage kukataken man terpuk Rehab kai si enggo ikataken TUHAN si Mada Kuasa Dibata nu Israel, “Enggo ikutkenndu perentah si ibereken nini-ninindu Jonadap man bandu, enggo ikutkenndu kerina perentahna, dingen enggo ilakokenndu kerina si iperentahken man bandu.

¹⁹E maka Aku TUHAN si Mada Kuasa Dibata nu Israel erpadan maka tetap lit anak-anak Jonadap si dilaki si ngelai Aku.”