Read Batak Karo JEREMIA 36 Bible Online

JEREMIA 36 - Batak Karo bible

JEREMIA 36

¹I bas tahun peempatken Joyakim anak Josia jadi raja Juda reh kata TUHAN man bangku nina, [67†]

²“Buatlah sada gulungen kertas, jenari suratken i babona kerna kai si enggo Kuturiken man bandu kerna Israel ras Juda dingen kerina bangsa-bangsa. Suratken kerina si enggo Kukataken man bandu menaken kin tangtangna nari Aku ngerana man bandu tupung Josia jadi raja seh ngayak paksa enda.

³Banci jadi tupung kalak Juda megi kerna cilaka si ateKu Kubaba man bana, itadingkenna dalanna si jahat. Adi bage Kualemi salah dosana.”

⁴E maka kulebuh Baruh anak si Neria, jenari kubelasken tep-tep kata si ibelasken TUHAN man bangku. Janah kerina si e isuratken Baruh i babo gulungen kertas ndai.

⁵Kenca bage kubereken tole perentah enda man Baruh, “Aku lanai ipediat bengket ku bas Rumah Pertoton.

⁶Tapi ateku maka kam lawes ku je, i bas warina tupung kalak e erpuasa. Alu megang ogekenlah gulungen kertas e man bana, gelah ibegina tep-tep kata si enggo ibelasken TUHAN man bangku, dingen si enggo kubelasken man bandu. Lakoken e i bas ingan i ja nari kerina kalak megi kam, subuk kalak Juda si enggo reh bengket i bas kuta-kuta nari.

⁷Banci jadi ertoto ia man TUHAN jenari jera i bas dalan si jahat nari, sabap TUHAN ngancam bangsa enda alu rawaNa si mbelin dingen gurlah.”

⁸E maka iogeken Baruh kata TUHAN i bas Rumah Pertoton, sue ras si enggo iperentahken man bana.

⁹I bas bulan pesiwahken tahun pelimaken Joyakim jadi raja Juda, bangsa e erpuasa lako ndatken keleng ate TUHAN. Kerina kalak si reh i kuta-kuta Juda nari rikut ras kalak si ringan i Jerusalem ngelakoken puasa e i Jerusalem.

¹⁰E maka iogeken Baruh gulungen surat e man perpulungen sue ras si enggo kukataken. Si e ilakokenna i bas Rumah Pertoton, i bas bilik Gemaria anak si Sapan nari. Gemaria e me sekretaris kerajan. Ingan kamarna e i bas kesain si arah datas deherken dalan bengket arah pintun gerbang si mbaru ku bas Rumah Pertoton.

¹¹Mikaya anak Gemaria, kempu si Sapan megi kai si enggo ikataken TUHAN arah gulungen si iogeken Baruh.

¹²Jenari lawes ia ku istana kerajan ku bas bilik sekretaris istana kerajan. I je sangana pulung runggu kerina peminpin-peminpin, e me Elisama, sekretaris kerajan, Delaya anak Semaya, Elnatan anak si Akbor, Gemaria anak Sapan, Sedekia anak Hanania dingen kerina peminpin-peminpin si deban lit i je.

¹³Ikataken Mikaya kerina kai si enggo ibegina iogeken Baruh man bangsa e.

¹⁴E maka isuruh peminpin-peminpin e Jahudi anak Netania, kempu si Selemia, kempu-kempu si Kusi ngatakenca man si Baruh gelah ibabana gulungen si enggo iogeken man perpulungen e. Ibaba Baruh gulungen e man bana.

¹⁵Nina peminpin-peminpin e, “Kundulken, jenari iogeken gulungen e man kami.” E maka iogeken Baruh.

¹⁶Kenca enggo dung iogekenna, si nehenen peminpin-peminpin e sapih-sapih ia perban biarna jenari nina man Baruh, “La banci la ilapurken kami enda man raja.”

¹⁷Nina kalak e, “Turiken man kami uga penulisindu kerina? Jeremia kin si melaskenca man bandu?”

¹⁸Nina Baruh enjabapsa, “Jeremia melaskenca tep-tep kata man bangku, jenari kusuratken e alu tinta i bas gulungen e.”

¹⁹Nina kalak enda man Baruh, “Cebunilah kam ras Jeremia. Ola ise pe bahan si ngetehsa i ja kam.”

²⁰Peminpin e namaken gulungen ndai i bas bilik Elisama, sekretaris kerajan e, jenari lawes ku istana raja ngelapurkenca kerina man raja.

²¹Kenca bage isuruh raja si Jahudi ngelegi gulungen e. Ibuatna i bas bilik si Elisama nari jenari iogekenna man raja ras man kerina pegawaina si sangana tedis ngkeleweti ia.

²²Tupung e paksa perudan e maka raja sangana kundul-kundul i bas inganna cicudu deherken api.

²³Tep-tep Jahudi enggo dung ngogeken telu tah empat teran kata, ikeret raja bagin e alu rawit jenari iambekkenna ku bas api. Bage me ibahanna seh ngayak kerina gulungen e enggo keri meseng.

²⁴Tapi subuk raja bage pe pegawai-pegawaina la lit sada pe sengget entah encidahken tanda atena ceda.

²⁵Tapi aminna bage gia mindo nge Elnatan, Delaya, Gemaria man raja gelah ola itutungna gulungen e tapi la diate raja pe.

²⁶Jenari isuruh raja putra mahkota Jerahmeel ras Seraya anak si Asrel bage pe Selemia anak Abdel nangkap aku ras sekretarisku Baruh. Tapi TUHAN enggo muniken kami.

²⁷Kenca gulungen si enggo kubelasken man Baruh itutung raja Joyakim reh kata TUHAN man bangku

²⁸lako muat gulungen si deban dingen nuratken i je tep-tep kata si enggo lit i bas gulungen si pemena.

²⁹Isuruh TUHAN aku melasken kata enda man raja, “Enggo icilukndu gulungen e, dingen enggo isungkunndu Jeremia, ngkai maka isuratkenna i je maka reh me raja Babilon engkernepken negeri enda, munuhi kerina rayatna dingen asuh-asuhenna.

³⁰E maka genduari Aku, TUHAN, ngatakenca man bandu, o Raja Joyakim, maka asa ndigan pe lanai lit kesusurenndu jadi raja i bas kinirajan Daud. Bangkendu iambengken ku bas ingan si iparpari las matawari tupung suari, kena embun tupung berngi.

³¹Erkiteken dosa-dosa si enggo ibahanndu Kuukum kam, kesusurenndu, ras pegawai-pegawaindu. Subuk kam, kalak Jerusalem ras Juda sada pe la mperdiateken persinget si rehna i bas Aku nari. Erkiteken si e Kudabuhken me man bandu kerina cilaka si enggo Kubelasken e.”

³²Kenca bage kubuat gulungen si deban jenari kubereken man sekretarisku Baruh; isuratkenna tep-tep kata si Kubelasken man bana, Isuratkenna kerina si enggo isuratken i bas gulungen si pemena.