Read Batak Karo JEREMIA 38 Bible Online

JEREMIA 38 - Batak Karo bible

JEREMIA 38

¹Sepatia anak Matan, Gedalya anak Pashur, Juhal anak Selemia, Pashur anak Malkia, ibegina cakapku man bangsa e.

²Kupeseh kata Dibata man bangsa e ningku, “Kasa kalak si tading i bas kuta enda la banci la mate erkiteken perang, kelihen ras penakit. Tapi si nadingkenca dingen ngendesken diri kempak bangsa Babilon la ia mate. Kesahna terkelin.”

³Kukataken pe man bana maka TUHAN enggo ngataken, “Kuendesken ateKu kuta enda kempak tentera Babilon gelah irebutna.”

⁴Kenca bage lawes pegawai e ndahi raja nina, “Kalak enda la banci la iukum mate. Pengeranana kap erbahanca bene ukur tentera ras kalak si deban si tading i kuta enda. Nampati pe atena lang tapi erbahan mesui ate jelma si nterem ngenca.”

⁵Nina Raja Sedekia njabapsa, “Merandal adi bage, bahanlah uga iakapndu mehuli. Labo kam kuolang-olangi.”

⁶Itangkapna aku jenari itantanna aku alu tinali ku bas sumur anak raja si Malkia gelarna i bas kesain pengawal istana kerajan. Sumur e la erlau, kubang ngenca lit i je e maka lucut aku ku bas.

⁷Tupung e, lit sekalak suruh-suruhen gelarna si Ebedmelek. Ia kalak Sudan. Ibegina maka aku enggo itamaken kalak ku bas sumur e. Paksa e raja sangana runggu i bas Pintu Gerbang Benyamin.

⁸E maka idahi Ebedmelek raja ndai ku je, jenari nina,

⁹“O raja salah kap perbahanen kalak ah, sabap Jeremia enggo itamaken ku bas sumur. La banci la mate kelihen me ia sabap lanai kap lit roti i bas kuta enda.”

¹⁰E maka isuruh Raja Ebedmelek muat telu kalak teman lako ngerintak aku nangkih i bas sumur e nari ope denga aku mate.

¹¹Kenca bage lawes Ebedmelek ras teman-temanna ku bas gudang jenari ibahanna piga-piga paken bekas itantanna kuteruh salu tinali man bangku.

¹²Isuruhna aku namaken uis merigat-merigat e ndai i bas teruh kikikku maka ola kuakap mesui. Kulakoken bage.

¹³E maka iangkatna aku i bas sumur e nari. Kenca si e i bas kesain pengawal istana kerajan aku itahan.

¹⁴I bas paksa si deban isuruh Raja Sedekia aku ku pintu si peteluken i bas Rumah Pertoton jenari nina, “Nungkun ateku man bandu gelah iturikenndu si tuhuna.”

¹⁵Ningku enjabapsa, “Adi kuturiken man bandu si tuhuna tentu ibunuhndu aku, dingen adi kuajarken pe kam labo diatendu pe.”

¹⁶E maka erpadan Raja Sedekia man bangku alu erbuni-buni nina, “Ersumpah aku i bas gelar Dibata si nggeluh, Dibata si mereken kegeluhen man banta, maka la kam kubunuh entah pe ngendesken kam man kalak si atena munuh kam.”

¹⁷Kenca bage maka kuturiken man Sedekia kai si enggo ikataken TUHAN si Mada Kuasa Dibata nu Israel, “Adi iendeskenndu dirindu man tentera raja Babilon, geluhndu ikelini janah kuta enda la iciluk. Kam ikelini subuk keluargandu.

¹⁸Tapi adi la iendeskenndu dirindu, kuta enda iendesken kempak kalak Babilon si nutung kuta enda, janah kam pe la pulah i bas ia nari.”

¹⁹Tapi nina raja ngaloi, “Mbiar aku man temanta sada bangsa si enggo lawes ku pihak Babilon. Banci jadi iendeskenna aku man kalak e guna isiksa.”

²⁰Ningku, “La bo kam iendesken kempaksa. Mindo aku man bandu gelah ikutkenndu kata TUHAN. Janah jadi nge si mehuli man bandu janah geluhndu ikelini.

²¹Tapi TUHAN enggo encidahken pengenehenen man bangku kerna kai sijadi kune kam la ngendesken diri.

²²I bas pengenehenen e kuidah diberu-diberu si tading denga i bas istana kerajan ibaba ndarat ngadap man opsir-opsir Babilon. Dengkehkenlah kai si ikatakenna tupung ia lawes: ‘Raja enggo ibabai teman-temanna papak, enggo ikuasaina ia. Genduari kerina nahena enggo lucut ku bas kubang, teman-temanna enggo nadingken ia.’ ”

²³Ningku tole, “Kerina kemberahenndu, ras anak-anakndu, iendesken man kalak Babilon, janah kam pe la pulah. Kam jadi tabanen raja Babilon janah kuta enda iciluk radas ku taneh.”

²⁴Nina Sedekia ngaloi, “Ola ise pe bahan meteh kerna percakapen enda, maka ola bahaya geluhndu.

²⁵Kune ieteh pegawai kerajan maka aku enggo ngerana ras kam, reh me ia nungkun man bandu. Jenari erpadan man bandu maka kam la ibunuhna adi iturikenndu kerina isi percakapennta e man bana.

²⁶Kataken saja man bana maka kam nehken pemindondu man bangku gelah kam ola iulihken ku bas penjara dingen mate i je.”

²⁷Kenca bage reh me kerina pegawai-pegawai dingen nungkun man bangku: Kukataken rikutken kai si niperentahken raja. La banci kai pe ibahanna sabap la lit ise pe si megi percakapen e.

²⁸Jenari itamaken aku i bas kesain pengawal istana seh ngayak paksa Jerusalem italuken. [69†]