Read Batak Karo JEREMIA 39 Bible Online

JEREMIA 39 - Batak Karo bible

JEREMIA 39

¹Bulan sepuluh, pesiwah tahunken Sedekia enggo jadi raja Juda, reh Nebukadnesar raja Babilon ras kerina tenterana nerang Jerusalem.

²I bas wari siwah, bulan peempatken tahun pesepuluh sadaken Sedekia jadi raja, benteng-benteng kuta e enggo pecah. (

³Tupung Jerusalem enggo italuken, kerina perwira tinggi kerajan Babilon reh dingen kundul i Pintu Gerbang Tengah. Kalak enda e me: Nergal Sareser, Samgar Nebo, Sarsekim dingen Nergal Sareser si deban.)

⁴Tupung Raja Sedekia ras kerina tenterana meteh kai si enggo jadi, tupung berngi icubakenna lompat i bas kuta e nari. Lompat ia arah peken raja, erdalan arah dalan ndarat si mperdemuken dua tembok terus kempak Baluren Lau Jordan.

⁵Tapi iayaki tentera Babilon ia, e maka itunduksa Sedekia i bas taneh kendit deher Jeriho. Ibabana man Raja Nebukadnesar si tupung e sangana i Ripla i daerah Hamat lako ndabuhken ukumen man bana.

⁶I Ripla, raja Babilon munuh kerina anak Sedekia, janah si enda ilakoken i lebe-lebena, pegawai-pegawai kerajan Juda pe igelehi kerina.

⁷Kenca bage ipulditkenna mata Sedekia, jenari igarikenna ibabana ku Babilon.

⁸Tupung si e iciluk kalak Babilon istana kerajan ras rumah-rumah kalak Juda, benteng-benteng Jerusalem iruntuhkenna.

⁹Kedungenna, Nebusaradan, e me puanglima tentera Babil e, ngangkut ku Babilon kerina kalak si ringan i Jerusalem rikut ras kalak si enggo erpihak man bana.

¹⁰Tapi si musil-musil si la lit kadena pe itadingkenna i Juda dingen iberekenna peken anggur ras perjumanna.

¹¹Tapi iperentahken Nebukadnesar puanglima tenterana Nebusaradan guna nehken perentah enda:

¹²“To dahi Jeremia bahanlah si mehuli man bana. Ola seh tanndu man bana, tapi lakokenlah rikutken sura-surana.”

¹³E maka Nebusaradan radu ras pegawai-pegawai tinggi Nebusaradan ras Nergal Sareser, bage pe perwira-perwira tentera kerajan Babilon,

¹⁴ngelegi aku i bas kesain pengawal istana nari. Iendeskenna aku ku bas kuasa Gedalya anak si Ahikam kempu si Sapan, si ngawasi aku mulih ku rumah, alu tenang. E maka tading aku i tengah-tengah jelma si nterem.

¹⁵Tupung aku ipenjaraken denga i bas kesain pengawal istana, reh kata TUHAN man bangku,

¹⁶gelah kukataken man Ebedmelek kalak Sudan e, maka TUHAN si Mada Kuasa, Dibata nu Israel enggo ngataken man bangku bagenda, “Sue ras si enggo Kukataken, Kubereken me ateKu man kuta enda cilaka labo kiniulin. Tupung kejadin e kam me i je ngidahsa.

¹⁷Tapi Aku kap TUHAN, si ngkawali kam, dingen kam labo iendesken kempak kalak si ibiarindu.

¹⁸Aku si njagai kam, janah labo ibuat kesahndu. Kam terkelin nge erkiteken pengarapenndu itamakenndu man bangKu. Aku kap TUHAN si enggo melasken kata enda.”