Read Batak Karo JEREMIA 4 Bible Online

JEREMIA 4 - Batak Karo bible

JEREMIA 4

¹Nina TUHAN, “O kalak Israel, adi atendu jera, banci kam reh mulihken ndahi Aku. Adi iambengkenndu gana-gana si ciga ateKu dingen erkemalangen man bangKu,

²e maka banci kam ersumpah i bas gelarKu. E maka kerina bangsa-bangsa mindo pasu-pasu man bangKu, jenari ipujina Aku.”

³Nina TUHAN kempak kalak Juda ras kalak Jerusalem, “Tenggalai jumandu si langa i tenggalai; ola kam nuan i tengah rambah duri. [4†]

⁴Cikep perpadanenndu ras Aku TUHAN, o kalak Juda ras Jerusalem, jenari endesken dirindu man bangKu. Adi la bage, gara me pernembehKu erkiteken perbahanenndu si jahat, janah la lit sekalak pe si ngasup nimpetisa.”

⁵Embuslah terompet i belang-belang negeri enda, erlebuh alu megerning asa gangna. Turiken man kalak Jerusalem ras Juda, maka kiam ia ku kuta-kuta si lit bentengna.

⁶Dalani ku Sion kiamken ola pelawen-lawen, gelah kam terkelin. Reh me cilaka i Utara nari ibaba TUHAN cilaka si maba kecedan si mbelin.

⁷Desken singa si luar i bas inganna cebuni nari, si encedai bangsa-bangsa enggo reh. Reh me ia ngkernepken Juda, maka kerina kuta Juda runtuh, lanai lit sekalak pe i je si nggeluh.

⁸E maka pakelah uis guni, jenari tangis ngandunglah, erkiteken pernembeh ate TUHAN si gara, lalap la nimpet nandangi Juda.

⁹Nina TUHAN, “I bas wari e pagi kerina raja-raja ras pegawai-pegawai bene kal ukurna, imam-imam tumpat ukurna, nabi-nabi kemamangen.”

¹⁰E maka ningku, “O TUHAN si Mada Kuasa, ipertakikenNdu kal kap kalak Jerusalem enda! Nindu maka dame nge i je, tapi pedang nge i bas kerahungna.”

¹¹Seh me paksana ikataken man kalak Jerusalem maka angin melas enggo rembus i gurun pasir nari. Angin e labo angin si lumang-lumang, si erguna ngangini page,

¹²tapi angin si ersiu-siu si rehna i bas TUHAN nari. TUHAN jine kap si ndabuhken ukumen man bangsaNa.

¹³Nehenlah, ena me reh musuh desken embun. Gereta perangna bali ras angin kalinsungsung. Kudana teren asangken rajawali. Bene me kita! Cilaka kal kita!

¹⁴O Jerusalem, bersihken min pusuhndu i bas si jahat nari, gelah kam terkelin. Asa kai nari dekahna kam muniken sura-sura si jahat?

¹⁵Dengkehkenlah berita si ibaba anak kuta Dan ras deleng-deleng Eperaim. Ia reh maba berita kebiaren.

¹⁶Ia reh mereken kata persirangen man Jerusalem maka musuh enggo reh i bas ingan si ndauh nari. Musuh-musuh e erlebuh i bas kuta-kuta Juda,

¹⁷jenari ikepungna Jerusalem desken kalak si ngiani juma, erkiteken pendudukna enggo ngelawan TUHAN. TUHAN kap si ngerana.

¹⁸O Juda, si enda kerina jadi bandu erkiteken lagu langkah dingen perbahanenndu jine. Bene me kam dingen pagit akapndu seh ku bas pusuhndu.

¹⁹Mesui! Lanai tertahan suina! Pusuhku! Pusuhku debet-debet la teralang. Lanai tersinikken nari; kubegi sora terompet, sora surak-surak peperangen.

²⁰Cilaka reh si ayak-ayaken; kerina negeri enggo radas. Kerina kemah kelayap i bas sengkumirep saja; kire-kire meribak mecaing-caing.

²¹Asa kai nari dekahna kuidah panji perang? Asa kai nari dekahna kubegi sora terompet?

²²Nina TUHAN, “BangsangKu seh kal kap motuna; Aku la itandaina. Bagi danak-danak si bodoh la lit pengertinna. Ngelakoken kejahaten pentar ia, tapi erbahan si mehuli la itehna.”

²³Kutatap doni enda kerina enggo rontang; dingen terulang. Kutare ku langit lanai lit i je terang.

²⁴Kupernehen kempak deleng-deleng, mugur-ugur kerina, kutatap ku uruk-uruk, mundu-undu kap ia.

²⁵Kutatap lanai lit kuidah manusia i je, Perik-perik pe enggo kabangen kerina.

²⁶Taneh mehumur enggo jadi gurun pasir; kuta-kutana enggo runtuhen, erkiteken pernembeh ate TUHAN si gara. (

²⁷Enggo ikataken TUHAN maka kerina doni enda jadi taneh mesawang tapi la keri kal iradasken.)

²⁸Doni enda dem ate ceda, langit jadi gelap. TUHAN si enggo ngerana, janah la erkusur ukurNa. Enggo itetapkenNa ukurNa, janah ndigan pe lanai Ia nggit surut.

²⁹Erkiteken sora kalak pemanah ras si ngersak kuda, kerina kalak kiam. Lit si kiam ku kerangen, lit deba nangkih ku das batu galang. Kerina kuta lume itadingken, lanai lit kalak si tading i je.

³⁰O Jerusalem, enggo cilaka me kam. Engkai maka ipakendu uis megara? Engkai maka ipakendu permata janah icelakndu matandu? Ipetikndu bandu guna si sea-sea; si ngena atendu enggo nulak kam, jenari ibunuhna atena kam.

³¹Kubegi sora nderkuh bali ras sora diberu sanga mupus. Randih-andih bagi diberu tangtangna mupus, sora tangis Jerusalem mengkap-engkap; idudurkenna tanna jenari nina, “Enggo aku cilaka. Reh me ia munuh aku.”