Read Batak Karo JEREMIA 40 Bible Online

JEREMIA 40 - Batak Karo bible

JEREMIA 40

¹Kata TUHAN seh man bangku kenca Nebusaradan puanglima tentera e enggo mbebasken aku i Rama. Aku ibaba ku jah teriket radu ras kalak Jerusalem ras Juda si sangana iangkut tertaban ku Babilon.

²Ikusikken puanglima tentera e man bangku nina, “TUHAN Dibatandu enggo ngancam negeri enda alu cilaka.

³Genduari enggo ilakokenNa kai si ikatakenNa, kerina si enda jadi erkiteken bangsandu erdosa kempak TUHAN janah la erkemalangen man bana.

⁴Genduari kutangtangi me gari si lit i bas pergelangen tanndu kubebasken me kam. Adi atendu ikut ras aku ku Babilon, banci aku si pekena-kena kam. Tapi adi atendu la ikut, kam metehsa. Kam milihsa inganndu i belang-belang negeri enda; bebas kam ku ja atendu.”

⁵Perbahan la aku ngaloi e maka nina Nebusaradan, “To dage dahi mulihken si Gedalya anak Ahikam kempu si Sapan, si iangkat raja Babilon jadi gubernur Juda. Banci kam tading rassa nggeluh i tengah-tengah bangsa e, tah pe banci kam lawes ku ja atendu lawes.” Kenca bage iberekenna pemerena man bangku, rikut ras pangan, jenari ipeberkatna aku.

⁶Lawes aku tading ras Gedalya i Mispa janah nggeluh i tengah-tengah bangsa e si tading denga i bas negeri e.

⁷Piga-piga puanglima ras tentera Juda lit denga langa talu janah tading i mbalmbal. Ibegina maka raja Babilon enggo ngangkat Gedalya jadi gubernur i negeri e janah enggo itugaskenna ia ngurusi kerina kalak si la iangkut ku Babilon: dilaki, diberu ras anak-anak bage pe si musil-musil si tading i negeri e. [70†]

⁸E maka Ismael anak Netania, Johanan anak Kareah, Seraya anak Tanhumet, kerina anak Epai i Netopa nari, ras Jesania i Maaka nari ras anak buahna, lawes ndahi Gedalya i Mispa.

⁹Nina Gedalya man kalak enda, “Kukataken man bandu maka la kam perlu biar-biaren ngendesken dirindu man kalak Babilon. Tadinglah i negeri enda, erdahinlah guna raja Babilon e maka kerina jadi si menuli man bandu.

¹⁰Aku jine me si tading i Mispa janah jadi wakilndu tupung kalak Babilon reh ku jenda. Tapi banci ipepulungndu jadi simpanenndu anggur, buah kayu, minak saitun jenari tadinglah i bas kuta-kuta si enggo iinganindu.”

¹¹Sanga e pe, kerina kalak Israel si ringan i Moap, Amon, Edom ras i bas ingan-ingan si deban, megi maka ipediat raja Babilon sisa kalak Israel tading i Juda dingen enggo iangkatna Gedalya jadi gubernurna.

¹²E maka itadingkenna negeri inganna ihuntakken ndube jenari mulih ia ku Juda. Idahina Gedalya ku Mispa. Mbue kal ipepulungna i je anggur ras buah kayu.

¹³Kenca bage, Johanan ras kerina puanglima tentera si langa talu e reh ndahi Gedalya i Mispa,

¹⁴jenari nina man Gedalya, “Itehndu kang maka Baalis raja Amon enggo nuruh Ismael anak Netania munuh kam?” Tapi la tek Gedalya.

¹⁵Kenca bage nina Johanan man Gedalya alu erbuni-buni, “Enta aku lawes dingen munuh Ismael janah sekalak pe labo meteh kerna si e. Engkai maka ipelepas ia munuh kam. Adi ibunuhna kam marpar pagi kerina kalak Jahudi si enggo pulung i sekelewetndu dingen si e maba cilaka man kerina kalak si tading denga i Juda.”

¹⁶Tapi nina Gedalya ngaloisa, “Ola bage! Si ikatakenndu kerna Ismael guak kap e!”