Read Batak Karo JEREMIA 41 Bible Online

JEREMIA 41 - Batak Karo bible

JEREMIA 41

¹Bulan pitu i bas tahun si e, Ismael anak Netania kempu Elisama anggota keluarga kerajan, sekalak puanglima raja, lawes ku Mispa ras sepuluh kalak temanna njumpai Gedalya. Sangana ia man ras-ras, [71†]

²Ismael ras temanna si sepuluh kalak e nintak pedangna jenari ibunuhna Gedalya.

³Kalak Ismael si tading ras Gedalya i Mispa, bage pe tentera Babilon si sangana i je kerina ibunuh Ismael.

⁴Pepagina, ope denga ise pe meteh kematen Gedalya,

⁵reh waluh puluh kalak i Sikem, Silo ras Samaria nari. Janggutna icukurna, uisna icaingkenna, badanna ilukaina. Ibabana persembahen pangan ras si merim-merim guna ipersembahken i bas Rumah Pertoton.

⁶Kenca bage ndarat si Ismael i Mispa nari njumpai si waluh puluh kalak ndai erdalan janahna tangis. Kenca ia jumpa nina, “Ota sinehen Gedalya.”

⁷Kenca ia bengket ku bas kuta, Ismael ras teman-temanna rempet munuhsa janah maitna idabuhkenna ku bas sada sumur.

⁸Tapi sepuluh i bas si waluh puluh kalak e nari mindo man Ismael nina, “Ola kami bunuhndu! Sabap lit buni-buni kami i tengah-tengah juma e me: jaba, gandum, minak saitun ras tengguli.” E maka ipulahi kalak ndai.

⁹Sumur ingan Ismael ndabuhi mait-mait si ibunuhina galang kal. Raja Asa si engkuruksa tupung iserang Baasa raja Israel. Bangke-bangke e itamaken Ismael ku sumur e.

¹⁰Kenca bage iangkut Ismael jadi tabanenna kerina putri raja, radu ras kerina kalak si tading i Mispa si enggo iendesken Puanglima Nebusaradan ku bas kuasa Gedalya. Iangkut Ismael ia kerina jadi tabanen jenari berkat ngepar ku daerah Amon.

¹¹Johanan ras kerina tentera megi kerina kejahaten Ismael.

¹²E maka ia ras tentera ngayaki kalak ndai, janah tunduksa i deherken kolam mbelin i Gibeon.

¹³Kenca tabanen Ismael ngidah si Johanan dingen kerina pengulu tentera si rassa, meriah kal ukurna,

¹⁴itadingkenna Ismael, idahina Johanan.

¹⁵Tapi Ismael ras waluh kalak temanna pulah i bas Johanan nari, lompat ia ku negeri Amon.

¹⁶Kenca bage Johanan ras pengulu-pengulu tentera si lit rassa nenahken kalak si iangkut Ismael jadi tabanen i Mispa nari kenca ibunuhna Gedalya. -- Kerina tentera, diberu-diberu, anak-anak ras pegawai-pegawai kerajan.

¹⁷ [17-18] Mbiar ia man kalak Babilon erkiteken Ismael enggo munuh Gedalya, si enggo iangkat raja Babilon jadi gubernur i negeri e. E maka lawes ia ku Mesir gelah lompat i bas kalak Babilon nari. I bas perdalanen ku Mesir e, ngadi ia i Kimkam deherken Betlehem.