Read Batak Karo JEREMIA 42 Bible Online

JEREMIA 42 - Batak Karo bible

JEREMIA 42

¹Kenca bage kerina puanglima tentera e, e me Johanan, anak Kareah, bage pe Asaria anak Hosaya radu ras kerina bangsa e, subuk si erpangkat entah lang, reh ndahi aku

²jenari nina, “Lakoken min pemindon kami man bandu. Totokenlah kami man TUHAN Dibatandu. Totoken kami enda kerina si nggeluh denga. Mbarenda nterem kal kami tapi genduari sitik nari ngenca tading bagi si idahndu.

³Totoken maka icidahken TUHAN Dibatandu min man kami dalan si man dalanen bage pe kai si arus ibahan kami.”

⁴Ningku ngaloisa, “Merandal adi bage. Aku notokenca man TUHAN Dibatanta sue ras pemindondu, janah kai si ikatakenNa kuturiken man bandu. Kai pe la lit si kubuniken man bandu.”

⁵Kenca bage nina man bangku, “TUHANlah jadi saksi si tuhu-tuhu man kami, maka ipatuhi kami kerina perentah TUHAN Dibatandu si niberekenNa man kami arah kam.

⁶Mehuli entah lang, tetap kami erkemalangen man TUHAN Dibatanta. Man baNa kap kam isuruh kami ertoto. Kune ikutken kami Ia, si mehuli kap kerina jadi man kami.”

⁷Kenca sepuluh wari, reh me kata TUHAN man bangku,

⁸e maka kudilo Johanan, kerina puanglima tentera si lit rassa dingen kerina kalak si deban.

⁹Ningku kempak ia, “Enggo isuruhndu aku nehken pemindonndu man TUHAN Dibata nu Israel. E maka bagenda nina,

¹⁰‘Adi tetap atendu tading i negeri enda, Kupanteki dage kam la Kuruntuhken. Kusuan dage kam la Kuruah. Cilaka si enggo Kubaba man bandu erbahan ceda ukurKu.

¹¹Ola nai kam mbiar man raja Babilon. Aku ras kam, dingen Aku si mulahi kam i bas kuasana nari.

¹²Erkiteken Aku perkuah, kubahan maka mekuah atena ngenehen kam jenari ipediatna kam mulih ku kutandu. Aku TUHAN kap si enggo melasken kata enda.’ ”

¹³ [13-15] Tapi kam, kalak si tading denga i Juda, la banci la erkemalangen man TUHAN Dibatandu, dingen tetaplah ukurndu tading i negeri enda. Ola ikatakenndu maka nindu: ‘Lang, lawes nge kami ku Mesir. I jah ndauh kami i bas perang nari, la ibegi kami sora terompet peperangen janah la kami kelihen.’ Adi ibelaskenndu si e, TUHAN si Mada Kuasa, Dibata nu Israel bagenda me nina man bandu, ‘Adi tetap atendu nadingken negeri enda, janah tading i Mesir,

¹⁶perang si ibiarindu la banci lang itundukna me kam; kelihen si isilahkenndu ngikut-ngikut kam, janah i Mesir mate me kam.

¹⁷Kerina bangsa si enggo tetap atena nadingken negeri e lako tading i Mesir, mate me, subuk i bas perang, kelihen tah penakit. La lit sekalak si tading. Sekalak pe la banci pulah i bas cilaka si ateKu Kubaba man bana.’

¹⁸Bagenda me nina TUHAN si Mada Kuasa, Dibata nu Israel, ‘Bagi nembeh ras rawangKu si gara enggo kuse ku babo kalak Jerusalem, bage me pe rawangKu si gara kuse ku babondu kune kam lawes ku Mesir. Mejin akap kalak ngidah kam, ihina kalak kam. Gelarndu ipake jadi sumpah. Asa ndigan pe lanai nari idahndu negeri enda.’

¹⁹Kuumputi ngerana ningku, “Enggo ikataken TUHAN man bandu si tading denga i Juda gelah ola lawes ku Mesir. E maka kupersingeti kam,

²⁰maka enggo mbelin kal lepakndu. Isuruhndu aku ertoto man TUHAN Dibatanta guna man bandu. Janah erpadan kam maka ipatuhindu kerina si iperentahkenNa.

²¹Genduari enggo kuturiken man bandu, tapi la ikutkenndu kai si ikataken TUHAN Dibatanta arah aku.

²²E maka ingetlah. Kam la banci la mate i bas perang, kelihen ras penakit, i bas negeri ku ja atendu lawes lako tading i je.”