Read Batak Karo JEREMIA 44 Bible Online

JEREMIA 44 - Batak Karo bible

JEREMIA 44

¹Reh kata TUHAN man bangku kerna kerina kalak Israel si tading i Mesir i kuta Migdol, Tahpanhes ras Mempis ras arah bagin Selatan negeri e.

²Nina TUHAN si Mada Kuasa, Dibata nu Israel, “Enggo idahndu jine cilaka si Kubaba man Jerusalem ras kerina kuta-kuta i Juda. Seh ngayak genduari kuta-kuta e tetap denga runtuh-runtuhen, dingen la lit kalak si tading i je,

³erkiteken rayatna ngelakoken si jahat si erbahanca keke rawangKu. Iberekenna persembahen man dibata-dibata si deban. Isembahna gana-gana si la pernah isembahna, si la pernah isembahndu, ntah isembah nini-ninindu.

⁴Gelgel nari tetap Kusuruhi nabi-nabi suruh-suruhenKu. Kukataken arah ia maka ola ilakoken si jahat si ciga ateKu,

⁵tapi la ibegikenndu, la diatendu pe. La itadingkenndu perbahanenndu si jahat mereken persembahen man dibata-dibata si deban.

⁶E maka gara me rawangKu, Kukuseken ku babo kerina kuta-kuta Juda dingen ku babo dalan-dalan i Jerusalem, jenari Kuciluk alu api. Kuta-kuta e enggo runtuhen, enggo mejin seh ngayak genduari enda.

⁷E maka Aku, TUHAN si Mada Kuasa, Dibata nu Israel, nungkun: Engkai maka jahat perbahanenndu man dirindu jine. Ibabandu kin atendu cilaka man dilaki, diberu, danak-danak ras man anak gara-gara, maka sada pe lanai lit bangsandu si tading?

⁸Engkai maka ilegindu rawangKu alu nembah man gana-gana dingen mereken persembahen man dibata-dibata si deban i Mesir inganndu si genduari enda? Ibahanndu kin si enda lako ngkernepken dirindu jine gelah kerina bangsa-bangsa nggombangi kam? Maka isumpahken kalak gelarndu?

⁹Lanai kin ingetndu kerina si jahat si enggo ibahan nini-ninindu, raja-raja Juda ras kemberahenna, si ibahanndu ras ndeharandu, i bas kuta-kuta Juda ras i bas dalan-dalan Jerusalem?

¹⁰Tapi seh ngayak wari si sendah la ipeterukndu bandu. La ihamatindu Aku, la kam nggeluh sue ras undang-undang si enggo Kubereken man bandu ras man nini-ninindu.

¹¹E maka Aku TUHAN si Mada Kuasa, Dibata nu Israel, ngelawan Kam dingen ngkernepken bangsa Juda.

¹²Kalak Juda si tading denga dingen enggo tetap atena lawes ku Mesir, guna ringan i jah, Kubahan maka kerina la banci la ikernepken. Kerina ia mate i Mesir, subuk kitik entah mbelin, kerina mate i bas perang entah erkiteken kelihen. Jadi me si mejin man bana. Ihina kalak ia janah gelarna jadi sumpah.

¹³Kuukum me asa kalak si tading i Mesir, bali ras pengukumKu Jerusalem alu perang, kelihen ras penakit.

¹⁴Sekalak pe kalak Juda si lawes dingen ringan i Mesir la banci pulah dingen tetap nggeluh. Sekalak pe ia lanai bo mulih ku Juda amin pe tedeh atena. La lit ise pe si mulihken seakatan piga-piga pengungsi.”

¹⁵E maka kerina dilaki si meteh maka ndeharana mereken persembahen man dibata-dibata si deban, ras kerina diberu-diberu si ringan i je, subuk kalak Israel si ringan Selatan Mesir, e me sada perpulungen si meriah ngerana man bangku nina,

¹⁶“La kami nggit megiken kai si ikatakenndu i bas gelar TUHAN.

¹⁷Kai ate kami ibahan kami, e nge ilakoken kami. Ibereken kami me persembahen dibata-dibata kami Ratu Langit dingen ipirpirken kami anggur si ipersembahken man bana, bagi si ibahan nini-nini kami, raja-raja kami ras peminpin-peminpin kami i kuta-kuta Juda dingen i bas gedang-gedang pasar kuta Jerusalem. Paksa si e melala nakan pangan kami senang akap kami dingen la lit kiniseran kami.

¹⁸Tapi kenca kami ngadi mereken persembahen man Ratu Langit, dingen kenca kami lanai mirpirken anggur si ipersembahken man bana, kade kami pe la lit. Bangsa kami maten i bas perang ras kelihen.”

¹⁹Nina diberu-diberu e, “Tupung ituang kam ampam, bagi gambaren Ratu Langit, mpersembahken man bana, janah mpersembahken lau anggur, ma kin isetujui perbulangen kami nge e?”

²⁰E maka ningku ngaloi kalak enda, dilaki ras diberu si enggo ngaloi aku bagi si ndai,

²¹“Bagi persembahen si ipersembahkenndu, si ipersembahken nini-ninindu, raja-rajandu ras si ipersembahken peminpin-peminpinndu dingen kalak perjuma mpersembahken i bas kuta-kuta Juda dingen i bas gedang-gedang dalan Jerusalem -- iakapndu kin e la iperdiateken TUHAN? Entah iakapndu mawen Ia lupa?

²²Seh sendah pe negerindu enggo jadi pinugun runtuh-runtuhen, lanai lit ise pe tading i je. Enggo mejin negeri e, enggo isumpahken kalak pe erkiteken lanai tertahan TUHAN kejahaten dingen lagu langkahndu si macik.

²³Cilaka enda ngkenai kam erkiteken persembahenndu man dibata-dibata si deban dingen erdosa man TUHAN perbahan la ikutkenndu perentahNa.”

²⁴ [24-25] Kukataken man bangsa-bangsa e terlebih man diberu-diberu kai si ikataken TUHAN si Mada Kuasa, Dibata nu Israel man kalak Juda si tading i Mesir, “Subuk kam bage pe ndeharandu kerina, enggo ersumpah padan man Ratu Langit. Ipadankenndu mereken persembahen man bana, dingen mirpirken persembahen lau anggur kempak ia. Merandal adi bage! Cikeplah padanndu! Sehkenlah sumpahndu!

²⁶Tapi genduari dengkehken sumpahKu, TUHAN, si Kubahan i bas kinibelinen gelarKu, man kerina kam kalak Israel si tading i Mesir. Asa ndigan pe lanai Kupediat ipakendu gelarKu i bas sumpah alu ngataken i bas gelar Dibata si nggeluh!

²⁷Kuperdiateken tuhu-tuhu maka labo kam makmur tapi ikernepken. Kerina kam la banci la mate subuk i bas perang entah penakit, seh maka lanai kam lit si tading nggeluh.

²⁸Tapi piga-piga i bas kam nari pulah i bas kematen dingen mulih ku Juda i Mesir nari. E maka kalak si tetap nggeluh, meteh ranan ise si payo, cakapKu entah cakapna.

²⁹Aku TUHAN si mereken man bandu tanda maka kam Kuukum i bas negeri enda. Maka padanKu ngeradasken kam payo tuhu jadi.

³⁰Kuendesken Hopra, raja Mesir man musuh-musuh si atena munuh ia, bali ras pengendeskenKu Raja Sedekia i Juda nari kempak Nebukadnesar raja Babilon, imbangna si atena munuh Sedekia.” [73†]