Read Batak Karo JEREMIA 46 Bible Online

JEREMIA 46 - Batak Karo bible

JEREMIA 46

¹Enda me kata TUHAN man bangku kerna bangsa-bangsa,

²si pemena e me kerna Mesir. Enda me kata TUHAN kerna tentera Neko, raja Mesir, si italuken Nebukadnesar raja Babilon i Karkemis deher Lau Eprat i bas peempat tahunken Joyakim anak Josia jadi raja Juda: [75†]

³“Nina puanglima-puanglima Mesir, ‘Sikapken ampang-ampangndu, ota kita ku peperangen!

⁴Pasanglah kudandu, ersaklah. Erbarislah, pakelah topi wajandu. Garut lembingndu Pake baju besindu!’ ”

⁵Nungkun TUHAN nina, “Kai si ibahanndu? Alu nggirgir mulihken ia. Tentera surut kerina si mbisana gentar, ngerbul kerina asa gegehna lanai itulihkenna pe ku pudi.

⁶Si kiam e lanai ngasup kiam, tenterana lanai banci pulah. I Utara, i tepi Lau Eprat, tertuktuk dingen guling kap ia.

⁷Ise kin ah si keke desken Lau Nil, desken lau belin si enggo mulsak launa?

⁸Kalak Mesir kap ah, si keke bali ras Lau Nil bagi lau belin si enggo mulsak launa. Nina Mesir, ‘Keke aku nutupi doni enda. Kulemba kerina kuta ras kalak si nggeluh i je.

⁹Suruh maka lawes kerina kuda suruhlah maka erdalan gereta perangna. Suruhlah kerina serdadu kalak Sudan, kalak Libia maba ampang-ampang bage pe kalak si beluh manah i Lidia nari.’ ”

¹⁰Enda wari TUHAN si Mada Kuasa si Erdolat. Erbalas ateNa sendah, sendah iukumna ateNa imbang-imbangNa. PedangNa mangani seh besur, ngincep dareh seh puas. Sendah TUHAN erbahan persembahen gelehen, i Utara i tepi Lau Eprat.

¹¹O kalak Mesir laweslah ku Gileat darami i jah tambar! Sia-sia nge kerina tambarndu! Sada pe la ngasup mereken kejuah-juahen man bandu.

¹²Enggo tereteh man bangsa-bangsa maka mela kal iakapndu. Kerina kalak enggo megi perserkondu. Tep-tep tentera terantuk kempak tentera si deban, dingen duana ia guling ku taneh.

¹³Tupung Nebukadnesar raja Babilon reh nerang Mesir seh kata TUHAN man bangku nina, [76†]

¹⁴“Momokenlah i bas kuta-kuta Mesir, i Migdol, Mempis, Tahpanhes: ‘Ersikaplah, pertahankenlah, kerina kelewetndu enggo ilemba perang!

¹⁵Engkai maka guling Apis dibatandu si medolat? Perban igudam TUHAN!’

¹⁶Kerina tenterandu tertuktuk e maka guling. Sekalak ngerana man si debanna nina: ‘Pedasken! Ota kita mulih ku bangsanta, maka ola kita ipan pedang imbangta!’

¹⁷Bahanlah gelar si mbaru man raja Mesir, ‘Si meganjang ngerana si bene kesempatenna.’

¹⁸Aku TUHAN si Mada Kuasa, Aku kap Raja. Aku kap Dibata si nggeluh, ningKu: Bagi Deleng Tabor ganjangen asangken deleng si deban, bagi Deleng Karmel tedis i babo lawit, bage me gegehna kalak si reh ngelawan kam.

¹⁹O kalak Mesir ersikaplah kam guna iangkut tertaban! Mempis jadi me bagi gurun pasir, jadi radas me, lanai sekalak pe si nginganisa.

²⁰Mesir bali kap ras lembu nguda si mbur, iserang sada untung-untung i Utara nari.

²¹Tentera-tentera si iupahina pe bali ras anak lembu mbur si la ergegeh. Lanai terbanca tedis, lanai terbanca erperang, kerina ia mulih jenari ngerbul. Enggo seh wari cilaka man bana e me paksa kebenenna.

²²Perkiam kalak Mesir, erdeso bagi sora nipe tupung reh deherna tentera musuhna. Imbangna reh maba kapak bali ras kalak si nabah batang kayu

²³si ngeradasken kerangen tua. Teremna la terbeligai tenterana teremen asangken labang.

²⁴Juru kal iakap bangsa Mesir ia italuken bangsa si reh i Utara nari, Aku TUHAN kap si enggo melasken kata enda.”

²⁵Nina TUHAN si Mada Kuasa, Dibata nu Israel, “Kuukum me Amon, gana-gana Tebes, rikut ras Mesir, dibata-dibatana, ras raja-rajana. Kulegi me raja Mesir ras kerina kalak si ernalem man bana,

²⁶jenari ngendeskenca kempak kalak si ersura-sura munuh ia, e me Nebukadnesar raja Babilon ras tenterana. Kenca si e lit kang kalak si tading i Mesir bagi si nggona. Aku TUHAN kap si enggo melasken kata enda.”

²⁷“O bangsangKu, ola kam mbiar, o Israel ola kam gentar. I bas negeri si ndauh e: Kupulahi me kam, i bas negeri inganndu tertaban nari. Mulih me kam ku negerindu dingen alu dame nggeluh kam i je. Kam aman dingen la lit si erbanca kam mbiar. [77†]

²⁸Reh me Aku ngkelini kam. Kukernepken me bangsa-bangsa, inganndu genduari kuerapken tapi kam, la kukernepken. Labo kam la Kuukum, tapi Kuukum kam, bujur kap pengukumKu. Aku TUHAN kap si enggo melasken kata enda.”