Read Batak Karo JEREMIA 47 Bible Online

JEREMIA 47 - Batak Karo bible

JEREMIA 47

¹Ope denga raja Mesir reh nerang Gasa, reh kata TUHAN man bangku kerna Pilisti, [78†]

²nina, “Nehenlah! Mulsak me lau belin i Utara nari, jenari ergalun desken sada lau belin banjir. Ilembana kerina negeri ras kerina si lit i je, subuk kuta-kuta ras kalak si nggeluh i je, serko kalak mindo penampat, kerina kalak si ringan i doni enda nderkuh kerina.

³Ibegina sora perkiam nahe kuda, ibegina sora gereta si erderak-derak, sora rodana si erdengik-dengik. Perbapan lanai mulihken ndahi anak-anakna, kote tanna lanai ergegeh.

⁴Enggo seh paksana Pilisti ikernepken, i ja penampat si rehna i Tirus ras Sidon nari. Aku TUHAN, ugapa Pilisti pe Kukernepken, e me kerina kalak si reh i pulau Kreta nari.

⁵Kiniseran si mesangat enggo reh engkenai kalak Gasa, Askelon enggo sip. Asa kai nari dekahna ceda ate kalak Pilisti si deban?

⁶Nindu serko, ‘O pedang TUHAN! Ndigan kam ngadi nebak? Mulih kam min ku sembungndu, i je kam tading dingen ringan!’

⁷Tapi uga banci pedang TUHAN ngadi, adi Kusuruh kin ia erdahin? Enggo Kuperentahken ia ngeradasken Askelon; dingen kalak si ringan i tepi lawit.”