Read Batak Karo JEREMIA 48 Bible Online

JEREMIA 48 - Batak Karo bible

JEREMIA 48

¹Enda me kata TUHAN si Mada Kuasa, Dibata nu Israel kerna Moap, “O andiko kalak Nebo, enggo kernep kal kutandu. Kiryataim enggo talu, benteng-bentengna si enteguh enggo runtuh, juru kal iakap kalak si ringan i je. [79†]

²Kemulian Moap enggo bene, Hesbon enggo italuken musuh, erpekat kalak engkernepken Moap, Kuta Madmen enggo melungun enggo reh tentera nalukenca.

³Dengkehkenlah! Nderkuh kalak Horonaim. Enggo kernep! Enggo meripuk!

⁴Moap enggo kernep, dengkehken perserko danak-danak.

⁵Begiken danak-danak kesi-kesi; gedang-gedang dalan ku Luhit: sora tangis kalak si itindih, gedang-gedang dalan ngincuah ku Horonaim.

⁶Nina kalak enda, ‘Kiamken, kelini, kelini kesahndu! Kiamken bagi kelede kerangen si meliar!’

⁷O, Moap ernalem kam kempak gegeh dingen kebayakenndu, tapi genduari irebut me kam. Dewandu Kemos iangkut me ku pembuangen, ikut ras pengulu-pengulu ras imam-imamna.

⁸La lit sada kuta pe pulah, kerina iradasken subuk berneh-berneh entah taneh kendit. Aku TUHAN kap si enggo melasken kata enda.

⁹Pajekken sada batu kubur man Moap, nandangi ikernepken me ia. Kuta-kutana jadi batu si ergun-gun, lanai ise pe si tading i je.” (

¹⁰Cilakalah kalak si ndahiken dahin TUHAN alu ukur la si tutus. Cilakalah kalak si la nampul dingen munuh!)

¹¹Nina TUHAN, “Moap nai-nai nari tetap aman, la pernah iangkut tertaban. Moap desken lau anggur si teneng kap, la pernah iuseken ku guci si deban e maka la sambar-sambar bauna, nanamna pe tetap gelgel.

¹²E maka genduari enggo seh paksana Aku nuruh kalak nguseken Moap desken anggur. Ipelumena me guci anggur e, jenari idampeskenna maka meripuk.

¹³E maka erkadiola Moap kempak dewana Kemos, bali ras tupung Israel erkadiola kempak Betel dewa penalemenna.

¹⁴O kalak Moap, ngkai maka ikatakenndu kam pahlawan-pahlawan tentera si mbisa pang iuji i bas perang?

¹⁵Moap ras kuta-kutana enggo kernep, anak peranna si terpilih enggo igelehi. Aku kap Raja, TUHAN si Mada Kuasa, Aku kap si enggo melasken kata enda.

¹⁶Cilaka man Moap nandangi reh me, keruntuhenna enggo ndeher.

¹⁷O kam kalak si ndeher rassa, tangisilah Moap, o kam kerina si meteh kinibelinen gelarna. Katakenlah: Kuasana enggo meripuk, kemulian dingen gegehna lanai lit.

¹⁸O kam kalak si tading i Dibon, nusurlah i bas inganndu si mehamat nari, kundulkenlah i bas abu taneh. Si engkernepken Moap enggo ndeher, benteng-bentengna jadi runtuh.

¹⁹O kam si tading i Arur tedislah kam nimai i tepi dalan sungkuni kalak si kiam sungkuni ia kerna kai si enggo jadi.

²⁰Bagenda me jabapna, ‘Moap enggo guling, tangisilah enggo mela kal iakapna. Momokenlah i gedang-gedang Lau Arnon, maka Moap enggo kernep!’

²¹Pengukumen enggo reh man kuta-kuta si lit i taneh kendit i deleng-deleng e me: Holon, Jahas, Mepat,

²²Dibon, Nebo, Bet-Diblataim,

²³Kiryataim, Betgamul, Betmeon,

²⁴Keriot ras Besrah. Ukumen enggo reh ku kerina kuta-kuta Moap, subuk ndeher entah ndauh.

²⁵Kuasa Moap enggo pecah, gegehna enggo bene. Aku TUHAN kap si enggo melasken kata enda.”

²⁶Nina TUHAN, “Bahan maka mabuk Moap, erkiteken ia ngelawan Aku. Erguling-guling ia i bas utahna jine. Tawa kalak ngenehenca.

²⁷O Moap ingetndu kang, uga kam nai nguru-nguru kalak Israel? Ngupir kam ngenenca tempa-tempa ia enggo itangkap gerombolan penamun.

²⁸O kam kalak si tading i Moap, tadingkenlah kutandu! Laweslah dingen tadinglah i bas lingling batu. Jadilah bali ras nderapati si rasar i bas embang.

²⁹Lanai kap tanggung megombangna Moap. Enggo Kubegi uga megombangna ia, sombong, beluh iakapna bana, seh kal iakapna ganjangna bana.

³⁰Aku TUHAN, Kueteh kap uga ia gombangna. Rananna meganjang la erguna janah pengelakona la erpepah.

³¹E maka ngandung Aku erkiteken kerina kalak Moap, ras kerina kalak si tading i Kir Heres.

³²Serko Aku guna Sibma lebihen asangken perserkongKu man kalak Jaser. O kuta Sibma, kam bali kap ras batang anggur si dahan-dahanna njoler ngepar Lawit Mati seh kempak Jaser. Tapi genduari enggo kernep kal kerina buahndu tupung paksa perlego.

³³Kemalemen ate ras keriahen enggo ibuat negeri Moap si mehumur nari. Aku si erbahanca maka lau anggur lanai maler i bas pengeriken nari. Lanai lit kalak si ngerik anggur janah ersurak perban riahna.

³⁴O kalak Hesbon ras Eleale, serkoken. Perserkona terbegi seh ku Jahas. Kalak si i Soar pe megisa, terus kempak Horonaim ras Eglat-Selisia. Lau anak Nimrim pe enggo kerah.

³⁵Lanai Kubere kalak Moap mereken persembahen gelehen i bas ingan-inganna ersembah. Lanai ia Kubere nggeleh persembahen man gana-ganana. Aku TUHAN kap si enggo melasken kata enda.

³⁶E maka ceda ateKu ngenen kalak Moap, ras man kalak Kir Heres, bali ras gogona ate kalak si erbahan lagu tangis-tangis alu ngembus surdam. Sabap kebayakenna enggo lesap kal kerina.

³⁷Kerina ia enggo itakal-tabuken, janggutna enggo icukurna. Kerina ia enggo nggarusi tanna, dingen tep-tep kalak enggo make uis guni tanda ate ceda.

³⁸Kerina ingan ngada-ngada i datas rumah kalak Moap, kerina tanah lapang ingan jelma si nterem la lit kalak la rate ceda. Sabap enggo Kudampesken Moap bali ras guci si lanai ipake kalak.

³⁹Moap enggo getem! Tangisken! Enggo bene kemulian Moap. Enggo runtuh ia, kerina bangsa sekelewetna nguru-nguru ia. Aku TUHAN kap si enggo melasken kata enda.”

⁴⁰ TUHAN erpadan sada bangsa nangkis Moap desken rajawali engkimbangken kabengna.

⁴¹Kerina kuta ras benteng-bentengna italuken. I bas paksa e, tentera Moap gentar bali ras sekalak pernanden mupus.

⁴²Ikernepken me Moap janah lanai ia jadi sada bangsa sabap brontak ia ngelawan aku.

⁴³Kebiaren, lubang, siding itogeng man kalak Moap. TUHAN kap si ngerana enda.

⁴⁴Kalak si kiam atena i bas kebiaren nari, ndabuh ia ku lubang. Kalak si atena ngelompati lubang kena siding ia. Sabap TUHAN enggo netapken sada paksa guna ngukum Moap.

⁴⁵Pengongsi-pengongsi si lanai ergegeh icubakenna ndatken pengkawali i kuta Hesbon, kuta si pernah iperentah Raja Sihon, tapi kuta e enggo meseng. Api enggo engkernepken perdempaken ras takal kalak Moap si pet erperang e.

⁴⁶Mekuah kal ate ngenen Moap. Kalak si nembah man Kemos enggo kernep. Anakna si dilaki ras diberu enggo iangkut tertaban.

⁴⁷Tapi i bas wari-wari si reh ibahan TUHAN ka nge maka Moap makmur ka mulihi. Enda me kerina si ikataken TUHAN kerna Moap.