Read Batak Karo JEREMIA 49 Bible Online

JEREMIA 49 - Batak Karo bible

JEREMIA 49

¹Enda me si ikataken TUHAN kerna Amon, “I ja kin kalak Israel? Lanai kin lit kalak si mpertahanken negerina? Engkai maka ipediatna kalak si nembah man Moloh muat darehna i bas suku Gat nari? Engkai maka ipelepasna ia ringan i je! [80†]

²Tapi seh me paksana maka kalak si tading i ibukota Raba megi gegehna peperangen, dingen runtuh me ia. Kenca bage kuta-kutana iciluk radu ras taneh. E maka ibuat Israel me taneh e mulihi i bas kalak si ngerebutca nari.

³O kalak Hesbon, tangiskenlah! Ai enggo kernep! O pernanden-pernanden Raba, erceda atelah! Pakeken uis guni tanda atendu ceda, ngandungkenlah! Kiamkenlah alu ukurndu gulut. Dewa Molohndu la banci la iangkut ku pembuangen, radu ras imam-imamna dingen pengulu-penguluna.

⁴Engkai maka iagahkenndu bandu, o bangsa si la patuh? Gegehndu enggo bene. Engkai maka kam ernalem man gegehndu jine? Engkai maka ikatakenndu la lit kalak si pang ngelawan kam?

⁵Kubahan maka kebiaren lit i sekelewetndu. Kiam me kam kerina. Tapi kalak kiam guna kesahna janah la lit si pepulungsa mulihi.

⁶Tapi dungna kubahan ka maka Amon makmur mulihi. Aku TUHAN kap si enggo melasken kata enda.”

⁷Enda ikataken TUHAN si Mada Kuasa kerna Edom, “Enggo kin bene kebeluhen ertimbang i Teman nari? Lanai kin banci penasehatna nuriken kai si arus man dahinna? Enggo bene kin kerina kepentarenna? [81†]

⁸O kalak Dedan, mulihken janah kiamken! Cebuniken! Kukernepken ateKu kesusuren Esau, sabap enggo seh paksana man bangKu ngukumsa.

⁹Tupung kalak mutiki buah anggur itadingkenna deba. Tupung pinangko reh berngi, si iperlukenna ngenca ibuatna.

¹⁰Tapi enggo kutilanjangi kesusuren Esau. Inganna cebuni enggo talang e maka la nai ia banci cebuni. Kerina kalak Edom enggo kernep. Lanai lit si tading.

¹¹Anak-anakndu si enggo melumang tadingken ras Aku, Aku si pekena-kenasa. Diberu-diberu si enggo mbalu banci ernalem man bangKu.

¹²Sedangken kalak si aturna la iukum, enggo minem tare calung pengukumen e, iakapndu kin maka kam la iukum? La banci la kam minem tare calung e!

¹³Sabap enggo jine Kusumpahken maka Bosra la banci la mejin dingen jadi gurun pasir. Iuru-uru kalak me ia dingen gelarna ipake kalak i bas numpahi. Kerina kuta-kuta si ndeher rassa, runtuh asa lalap. Aku TUHAN kap si enggo melasken ranan enda.”

¹⁴Ningku, “O Edom enggo kualoken kata i bas TUHAN nari. Enggo isuruhna sekalak persuruhen ngataken man bangsa-bangsa maka ipepulungna tenterana gelah ia ersikap nerang kam.

¹⁵Ate Dibata maka kote kam ibahanna, janah lanai lit kalak si nghamati kam.

¹⁶Kinigombangenndu enggo nipu kam. Lanai lit kalak si mbiar man bandu bagi pengakapndu. Kam nggeluh i babo ling-ling batu, i datas ancuk-ancuk deleng. Tapi aminna kam nggeluh bali ganjangna ras rajawali, TUHAN kap si pesusur kam. TUHAN kap si melasken kata enda.”

¹⁷Nina TUHAN, “Cilaka si ndabuhi Edom lanai kap tanggung serana. E maka kerina kalak si mentas arah e sengget dingen gentar.

¹⁸Jadi man Edom bali ras si enggo jadi kempak Sodom ras Gomora tupung ia ras kuta-kuta si ndeher rassa ikernepken. Lanai sekalak pe si pernah nari nggeluh i je. Aku TUHAN kap si enggo melasken kata enda. [82†]

¹⁹Bali ras singa reh i bas kerangen tua gedang-gedang Lau Jordan nari nangkeng ku mbalmbal, bage me Aku reh dingen Kubahan maka rempet bangsa Edom ngerbul nadingken negerina. Kenca bage raja pilihenKu me si engkuasai bangsa e. Ise kin si seri ras Aku? Ise kin pang ngelawan Aku? Apai kin pemerentah si pang erlawan ras Aku?

²⁰E maka dengkehkenlah rencana si Kubahan lako ngelawan Edom. Dingen kai ateKu si Kubahan man kalak si ringan i kuta Teman. Anak-anakna pe la banci la isaren, kerina kalak gentar.

²¹Tupung Edom ndabuh, terbegi me sora si megang seh maka kerina doni enda mugur-ugur. Sorana serko terbegi me seh ku Teluk Akaba.

²²Iserang musuh me Bosra bali ras rajawali nangkis alu kabengna si kimbang. I bas paksa e kerina tentera Edom bali biarna ras sekalak pernanden si sangana mupus.”

²³Enda me si ikataken TUHAN kerna Damaskus, “Kalak si ringan kuta-kuta Hamat ras Arpad lit i bas aru ate dingen mbiar erkiteken enggo ibegina berita si la uli. Kearun ate ergalun i bas ia bagi galumbang lawit e maka sitik pe lanai ia teneng. [83†]

²⁴Enggo kote kalak Damaskus jenari kiam ia perban biarna. Mesui dingen aru kal atena bali ras sekalak pernanden sangana mupus.

²⁵Kuta si terberita e si biasana dem alu keriahen enggo terulang tuhu-tuhu.

²⁶I bas paksa e kerina anak peranana ibunuh i bas gedang-gedang dalan kuta e janah tenterana ikernepken.

²⁷Tembok-tembok Damaskus Kuambengken kempak api. Istana Raja Benhadad iciluk. Aku TUHAN si Mada Kuasa kap si enggo melasken ranan enda.”

²⁸Enda me kata TUHAN kerna suku Kedar ras kerna daerah si ikuasai Hasor si enggo italuken raja Babilon Nebukadnesar, “Perangilah kalak Kedar dingen kernepkenlah suku-suku si arah Timur!

²⁹Rampasilah kemah-kemahna ras rarasen biri-birina, kire-kire kemah ras kerina si lit i bas kemah e. Buatlah kerina untana jenari kataken man bana, ‘Ena, kebiaren i sekelewetndu.’

³⁰O kalak Hasor, Aku, TUHAN, Kupersingeti kam, maka ndauh kam kiam dingen cebunikenlah. Nebukadnesar raja Babilon enggo erpekat ngelawan kam. Enda me katana,

³¹‘Ota! Siperang kalak ah, si niakapna aman man bana dingen iakapna bana paguh! Kutana la lit pintu gerbangna la lit eruk-erukna.’

³²Buatlah unta dingen kerina asuh-asuhenna! Kukencahken maka merap kalak si erpangkas gendek enda. Janah i jenari pe Kubereken man bana cilaka.

³³Hasor tetap me jadi gurun pasir rasa lalap. Serigala ngenca ringan i je. Lanai ise pe si nggeluh i je. Aku kap TUHAN si enggo melasken kata enda.”

³⁴Kenca Sedekia itangkuhken jadi raja Juda, minter reh kata TUHAN si Mada Kuasa man bangku kerna negeri Elam.

³⁵Nina, “Kubunuh me kerina kalak Elam si beluh manah, si erbahanca negeri e seh paguhna.

³⁶Kubahan maka i ja nari pe reh angin ngembuskenca. Kukencahken me ia maka merap, seh maka lanai lit negeri la jadi inganna mengongsi.

³⁷Kubahan maka mbiar kal Elam man imbang-imbangna si ersura-sura munuh ia. Alu rawangKu si mbelin Kukernepken me kalak Elam. Kusuruh me tentera merangsa seh maka masap ia kerina.

³⁸Raja-raja ras peminpin-peminpinna Kukernepken jenari Kupajekken kursi kinirajanKu i je.

³⁹Tapi denggo Kubahan maka makmur ka mulihi Elam. Aku TUHAN kap si enggo melasken kata enda.”