Read Batak Karo JEREMIA 5 Bible Online

JEREMIA 5 - Batak Karo bible

JEREMIA 5

¹O kalak Jerusalem, kiamlah arah pasar-pasarndu! Pernehen kelewet, tatap alu matandu jine, pepayo kerina tiga inganndu erbinaga. Lit kin kam jumpa sekalak lah gia, si ngelakoken kai si mehuli, si ersura-sura erkemalangen man Dibata? Adi lit kam jumpa sekalak lah gia, banci ialemi TUHAN kuta Jerusalem.

²Aminna pe nindu maka nembah nge kam man TUHAN, tapi si tuhuna lain si ibelaskenndu, lain i bas pusuhndu.

³Tentu idarami TUHAN ketutusen kalak, iligasNa kam, tapi la diatendu pe. IripukkenNa kam tapi la kam nggit erlajar. Ibahanndu mekeng pusuhndu e maka la kam nggit nadingken dosandu.

⁴E maka nina ukurku, “Kitik kap kalak enda! Bodoh kap ia la ietehna sura-sura Dibata, si ngena ate TUHAN la ietehna.

⁵Kudahi ateku kalak si erkuasa, ngerana ateku rassa. Pasti ietehna kai sura-sura Dibata, kai peraten TUHAN si man dalanenken.” Tapi kerina enggo nulak kuasa TUHAN janah la nggit patuh.

⁶E me sabapna reh singa i bas kerangen nari munuh kalak enda, serigala i gurun pasir nari reh encaing-caing ia. Arimo gawah-gawah arah tengah kutana. Ise si ndarat la banci la ijerngemna perban melala kal dosa-dosana, dingen lalap la erngadi-ngadi itundalkenna Dibata.

⁷Nungkun Dibata nina, “Engkai maka arus Kualemi dosa bangsangKu? Itundalkenna kap Aku, nembah ia man dibata-dibata si la tuhu. Kubere nakan bangsangKu seh besur, tapi kenca besur lawes ia erlua-lua ikerikenna wari-warina ras diberu si pencarinna erlua-lua.

⁸Desken kuda kiringen si dem kerincuhen, erngih-ngih man ndehara temanna.

⁹Engkai maka la arus Kuukum ia erkiteken kerina si e, ngkai maka la Aku erbalas man bangsa si bage?

¹⁰Kusuruh musuh nabahi batang anggur bangsangKu, tapi la keri kal iradasken. Kukataken man musuh e gelah itastasina dahan-dahanna, sabap dahan-dahan e labo Aku empuna.

¹¹Kalak Israel ras Juda tuhu-tuhu enggo Aku itipuna. Aku, TUHAN, kap si ngerana.”

¹²Bangsa Israel enggo mersoken TUHAN nina, “Labo kai pe si ibahanNa. Labo kita ikenai paksa si mesera. Labo kita ngenanami peperangen ras kelihen.”

¹³[13-14] Ikataken bangsa e maka nabi-nabi labo kai pe ertina; desken angin saja nge ngenca. Labo lit ibabana berita i bas TUHAN nari. Ngerana TUHAN si Mada Kuasa nina, “O Jeremia erkiteken enggo bage pengerana bangsa enda, Kubahan maka katangKu Kutamaken ku babahndu bali ras api. BangsangKu bali ras ranting, jenari ipan api e ia seh keri.”

¹⁵O bangsa Israel, ibaba TUHAN me sada bangsa i bas ingan si ndauh nari nerang kam. Bangsa e megegeh tuhu-tuhu dingen nai nari enggo lit janah la iantusindu cakapna.

¹⁶Tukang pemanahna tentera si mbisa. Ibunuhina kalak, sitik pe la atena mekuah.

¹⁷Itelenna kerina ulih jumandu ras panganndu; ibunuhina anakndu si dilaki ras si diberu. Igelehina lembu ras biri-birindu, jenari ikernepkenna batang anggur dingen batang ara. Kuta-kutandu si erbenteng si jadi penalemenndu, ikernepkenna salu tenterana.

¹⁸Nina TUHAN, “Tapi i bas paksa si e pe labo keri Kulesapken bangsangKu.

¹⁹O Jeremia, adi isungkunna kam ngkai maka bagenda jadina, turiken man bana, maka si enda kerina jadi erkiteken enggo itundalkenna Aku, jenari jadi budak dibata-dibata si deban i bas negerina jine. Dage ia pe iperbudak me i bas negeri si labo negerina jine.”

²⁰Nina TUHAN, “Kataken man kesusuren Jakup, turiken man kalak Juda.

²¹Perdiatekenlah, o kam kalak longor, kam kalak bodoh! Lit matandu tapi la erpengidah. Lit cupingndu tapi la erpemegi. [5†]

²²Aku kap TUHAN; ngkai maka la kam mbiar man bangKu? Engkai maka la nggirgir i adep-adepenKu? Kuamparken kersik jadi baleng lawit, jadi baleng si rasa lalap si la banci ikeparina. Aminna pe galumbangna ergalun dingen ergeruhguh tapi labo terlewatisa. [6†]

²³Tapi bangsa enda bangsa si mekeng pusuhna dingen pemberontak. Kam enggo erkusur jenari itadingkenndu Aku.

²⁴Aminna pe Kupesusur udan i bas paksana ras Kubereken pe man bandu paksa peranin tep-tep tahun, tapi labo pernah iukurindu uga erbahan mehamat man Bangku.

²⁵Tapi dosa-dosandu ngolangi si mehuli e i bas kam nari.

²⁶Kalak jahat nggeluh i tengah-tengah bangsangKu. Nimai janah nggempangi ia desken peniding-niding nangkap perik-perik, bage me itogengna sidingna lako nangkap manusia.

²⁷Bali ras perburu ndemi ranjangna alu perik, bage me pe kalak enda ndemi rumahna alu barang rampasen. E me erbahanca maka ia erkuasa dingen bayak,

²⁸si erbahanca ia mbur dingen cukup panganna. La ersibar kejahaten si ibahanna. La iberekenna hak man anak melumang. La iberekenna keadilen man kalak si itindih.

²⁹Tapi erkiteken si e, Aku TUHAN la banci lang ngukum ia. Erbalas Aku man bangsa enda.

³⁰Kiniseran ras cilaka jadi i negeri enda.

³¹Nabi-nabi melasken kata la tuhu, imam-imam merentah sue ras si iperentahken nabi-nabi, janah bangsangKu la melasken keberatenna. Tapi kai nari pagi ibahanna adi enggo seh paksa pendungina?”