Read Batak Karo JEREMIA 51 Bible Online

JEREMIA 51 - Batak Karo bible

JEREMIA 51

¹Nina TUHAN, “Kubaba angin si engkernepken Babilon ras kalak si ringan i je.

²Kusuruh me bangsa si deban ngkernepken Babilon desken angin engkabangken segal. Tupung wari pengkernepen e enggo seh, itadingkenna negeri e lume.

³Ola bereken waktu man tentera-tenterana manahken anak panahna. Ola pediat ia make baju besina. Ola cidahken perkuah ate man anak peranana! Kernepken kerina tenterana!

⁴Kerina me ia luka dingen maten i gedang-gedang dalan kuta-kutana.

⁵Aku, TUHAN Dibata si Mada Kuasa langa nadingken Israel ras Juda, aminna pe ia enggo erdosa man bangKu, Aku si Badia nu Israel.

⁶Pedas tadingken Babilon! Lompatken guna engkelini kesahndu! Ola kam mate erkiteken dosa-dosa Babilon. Genduari erbalas ateKu dingen ngukumsa rikutken patutna.

⁷Babilon desken calung emas kap i bas tanKu, erbahan kerina belang-belang doni enda mabuk. Bangsa-bangsa doni enda minem anggur taresa, erbahanca kerina enggo mehado. [89†]

⁸Babilon rempet me guling dingen kernep! Erceda atelah kerna si e! Tambari min lukana, mbera-mbera malem denga ia.

⁹Nina kalak pertandang si tading i je, ‘Enggo si cubaken nambari Babilon, tapi enggo melawenca. Sitadingkenlah ia genduari, ota kita mulih ku kutanta. Babilon enggo iukum Dibata alu kerina gegehna dingen enggo keri ikernepkenna.’ ” [90†]

¹⁰Nina TUHAN, “Nina bangsangKu, ‘Enggo icidahken TUHAN maka kita nge si payo. Ota kita mulih gelah situriken man kalak si ringan i Jerusalem kai si enggo ilakoken TUHAN Dibatanta.’ ”

¹¹ TUHAN enggo nuruh raja-raja Medi, sabap ateNa engkernepken negeri Babilon. Bagenda me Ia erbalas erkiteken Rumah Pertoton si enggo ceda. Nina puanglima-puanglima tentera, “Telapi anak panahndu!

¹²Sikapkenlah ampang-ampangndu! Angkatlah panji-panji nerang benteng-benteng Babilon. Pegegehi penjagan! Tamaken si erjaga-jaga. Suruh kalak si nggempangi!” TUHAN enggo ngelakoken rikutken kataNa nandangi kalak Babilon.

¹³I bas negeri enda melala lau mbelin, melala erta-erta si meherga, tapi paksana enggo seh, tinali kegeluhen itek-tek. [91†]

¹⁴TUHAN si Mada Kuasa enggo ersumpah i bas dirina jine, maka isuruhNa me nterem tentera nerang Babilon desken labang si erkemut dingen ersurak ia kerina perban menang.

¹⁵Alu gegehNa, TUHAN enggo njadiken doni enda, alu kepentarenNa enggo itepaNa pertibi enda, janah alu pengertinNa langit ikimbangkenNa.

¹⁶I bas perentahNa ergeruhguh lau i datas langit, ibabaNa embun i bas tampuk doni nari. Ibabana kilap i bas udan, isuruhna angin rembus i bas penimpanenna nari.

¹⁷Ngidah si e, kepeken kerina manusia motu kepe, la erpemeteh kalak si mahan gana-gana mela iakapna, sabap gana-gana si ibahanna la tuhu, la lit kegeluhen i bas ia.

¹⁸Kerina ia sia-sia dingen penipu nandangi kernep me ia tupung TUHAN reh ngukumsa.

¹⁹Tapi Dibata nu Jakup la kap seri rassa, Ia kap si enggo njadiken si nasa lit. Dingen Ia kap si enggo milih Israel jadi bangsaNa jine. TUHAN si Mada Kuasa, e kapen gelarNa.

²⁰Nina TUHAN, “O Babilon, kam ndube pergudamKu, senjatangKu i bas perang. Kupake kam ngeripukken bangsa-bangsa ras kerajan-kerajan,

²¹ngeripukken kuda ras si ngersaksa, ngeripukken gereta kuda ras si mabasa,

²²munuhi kerina dilaki ras diberu, munuhi kerina orangtua ras anak si nguda, munuhi anak perana, ras si nguda-nguda,

²³nggelehi permakan ras rarasenna, nggelehi kalak si nenggala ras lembu penenggalana, ngeripukken si erkuasa ras puanglimana.”

²⁴Nina TUHAN, “Idahndu me Aku erbalas man Babilon ras man kalak si ringan i je, erkiteken perbahanenna si jahat nandangi Jerusalem.

²⁵O Babilon, kam desken deleng si engkernepken doni enda kap, tapi Aku TUHAN jine jadi imbangNdu. Kutangkap me kam, Kuradasken ku taneh, Kubahan kam jadi abu.

²⁶Asa ndigan pe lanai lit batu i bas runtuhenndu nari si ipake guna majekken. Kam tetap jadi gurun pasir seh rasa lalap. Aku TUHAN kap si enggo melasken kata enda.

²⁷Pajekken panji guna erperang! Embus terompet gelah kerina bangsa-bangsa doni enda megisa! Sikapken bangsa-bangsa lako erperang ras Babilon! Kataken man raja-raja Ararat. Mini ras Askenas gelah iserangna. Angkat sekalak si minpin perang e. Baba kuda desken labang si erkemut.

²⁸Sikapken bangsa-bangsa kerina gelah ia erperang ras Babilon. Suruh kalak ngataken ndahi raja-raja Media, peminpin-peminpinna ras pegawai-pegawaina bage pe tentera si lit i teruh kuasana gelah ia ersikap.

²⁹Enggirgir dingen mundu-undu doni enda erkiteken sura-sura TUHAN mahan Babilon jadi gurun pasir, la lit kalak si nggeluh i je.

³⁰Tentera-tentera Babilon enggo ngadi erperang janah sinik saja ia i bas bentengna. Enggo bene ukurna dingen enggo bali ia ras pernanden. Pintu gerbang kuta enggo runtuh, rumah-rumah enggo iciluk.

³¹Kenca pertenahen enggo kiam ngatakenca man raja Babilon reh ka kiam pertenahen si deban ngatakenca maka arah apai pe Babilon enggo runtuh.

³²Musuh-musuh enggo engkuasai ingan ngepar lau mbelin. Benteng-benteng enggo iciluk. Enggo bene kal ukur tentera Babilon.

³³Rempet ia itabah musuh jenari idedehi kalak bagi gandum i bas ingan pengeriken. Aku TUHAN si Mada Kuasa Dibata nu Israel, kap si enggo melasken kata enda.”

³⁴Jerusalem enggo melumat igat-gati raja Babilon jenari ipanganina. Ipelumena kuta e desken ngkuseken guci, desken naga galang si enggo nelen kuta e. Ibuatna kerina si ngena atena, si debanna isampetkenna.

³⁵Bagendalah nina kalak Sion, “Babilon la banci la iukum erkiteken perbahanenna man banta!” Bagendalah nina kalak Jerusalem, “Babilon la banci la iukum erkiteken kiniseran si ibahanna banta!”

³⁶E maka nina TUHAN kempak kalak Jerusalem, “Aku si ngerunggui perkarandu. Aku erbahanca maka musuh-musuhndu ngaloken ukumen bagi kai si enggo ilakokenna man bandu. Kupekerah sumbul lau Babilon, maka kerah lau belinna kerina.

³⁷Negeri e jadi runtuh-runtuhen si ergun-gun man ingan rubia-rubia si meliar nggeluh. Jadi mejin me ingan e. La lit sekalak pe si nggeluh i je, janah asa kalak si ngidah enggirgir ia.

³⁸Kerina kalak Babilon erdengum desken singa, dingen merawa bagi anak singa.

³⁹Sangkar kin kalak enda? Kusikapken me man bana sada pesta dingen Kubahan maka mabuk dingen ersurak-surak ia. Tunduh me ia jenari asa ndigan pe lanai keke.

⁴⁰Kutamaken ia kupenggelehen desken anak lembu, kambing dingen anak biri-biri. Aku TUHAN kap si enggo melasken ranan enda.”

⁴¹Nina TUHAN kerna Babilon, “Negeri si ipuji kerina doni enda enggo italuken! Andiko, mejin kal Babilon iakap bangsa-bangsa doni enda kerina!

⁴²Lawit ergulung i babo Babilon, Babilon enggo itutupi galumbang-galumbang si ergeruhguh.

⁴³Kuta-kutana enggo seh kal mejinna, dingen enggo bali ras gurun pasir si kerah. La lit sekalak pe si nggeluh entah mentas arah e.

⁴⁴Bel, dewa Babilon la banci la Kuukum. Kubahan maka iutahkenna barang-barang si itangkona. Asa ndigan pe ia lanai isembah bangsa-bangsa doni enda. Tembok-tembok Babilon enggo runtuh.

⁴⁵Kalak Israel kiam ije nari! Kelinilah bandu i bas rawangKu si gara nari.

⁴⁶Ola bene ukurndu, ola mbiar erkiteken berita-berita si ibegindu. Tep-tep tahun mbar erbage-bage berita -- berita-berita kalak jahat i negeri enda, dingen berita-berita kerna raja siperangen.

⁴⁷E maka enggo me seh paksana Aku ngukum gana-gana Babilon. Belang-belang negeri e mela iakapna. Kerina si ringan i je la banci la ibunuh.

⁴⁸Kerina si lit i bas doni ras datas langit ersurak-surak tupung Babilon ndabuh ku teruh kuasa bangsa si reh i Utara nari lako engkernepkenca. [92†]

⁴⁹Babilon si erbahanca mate kerina kalak i belang-belang doni enda. E maka genduari Babilon la banci la mate erkiteken kematen nterem kalak Israel. Aku TUHAN kap si enggo melasken ranan enda.” [93†]

⁵⁰Nina TUHAN man bangsana i Babilon, “Kam enggo pulah i bas kematen nari! Genduari laweskenlah! Olanai timai! Aminna pe kam ndauh i bas Aku nari, ingetlah Aku, TUHANndu, ingetlah Jerusalem.

⁵¹Nindulah, ‘Enggo juru dingen mela kal iakap kami. Enggo tuhu medungu kal kita erkiteken kalak asing si enggo muat ingan-ingan si badia i bas Rumah Pertoton.’

⁵²Dage Kukataken maka enggo seh me paksana Aku ngukum gana-gana Babilon. Kalak si luka ndehereng i belang-belang doni enda.

⁵³Aminna Babilon banci nangkih ku langit dingen majekken benteng-benteng si paguh i jah, Kusuruh nge kalak ngerontaskenca. Aku TUHAN kap si enggo melasken kata enda.”

⁵⁴Nina TUHAN, “Dengkehkenlah sora serko i Babilon, ceda ate erkiteken negeri e enggo kernep.

⁵⁵Kukernepken ateKu Babilon, Kupesip ateKu ia. Tentera si nerangsa bali ras galumbang si ergeruhguh, alu sora si gejek.

⁵⁶Enggo reh ia ngkernepken Babilon tentera Babilon enggo talu panahna enggo penggel. Aku Dibata si ngukum kalak jahat. Kubalas me man bana bagi patutna.

⁵⁷Kubahan maka mabuk penguasana, kalak pentar, peminpin-peminpin ras tenterana. Tunduh me ia, asa ndigan pe lanai keke. Aku, Raja kap si ngerana enda, Aku kap TUHAN si Mada Kuasa.

⁵⁸Tembok-tembok Babilon si enteguh la banci la radas ras taneh, janah menara pintu-pintu gerbang si meganjang pe meseng. Kerina pendahin bangsa-bangsa la kap lit ertina, kerina kelatihenna kempak api kap perlawesna. Aku kap TUHAN si Mada Kuasa si ngerana enda.”

⁵⁹Suruh-suruhen Raja Sedekia e me Seraya anak si Neria kempu si Mahsea. I bas tahun peempatken Sedekia jadi raja Juda, lawes Seraya rassa ku Babilon, dingen kubereken man bana piga-piga perentah.

⁶⁰Kusuratken i bas sada buku kerina cilaka si nandangi engkenai Babilon, subuk kerna kerina perkara-perkara si deban kerna Babilon.

⁶¹Ningku kempak Seraya, “Kenca kam seh i Babilon, alu megang ogekenlah kerina si tersurat i jenda man bangsa e.

⁶²Kenca bage ertotolah kam nindu, ‘O TUHAN, enggo ikatakenNdu maka ikernepkenNdu ateNdu negeri enda, gelah lanai lit i je si nggeluh, subuk manusia bage pe rubia-rubia, dingen jadi taneh si melungen me negeri e seh rasa lalap.’

⁶³O Seraya, kenca enggo dung iogekenndu surat enda man bangsa e, iketken ku bas sada batu jenari ambekken ku Lau Eprat,

⁶⁴jenari nindulah, ‘Bagenda me jadina man Babilon, gedap me ia dingen asa ndigan pe lanai keke, erkiteken cilaka si nandangi idabuhken TUHAN ku je.’ ” Sibar enda kedungen ranan si Jeremia. [94†]